ନୂଆଦିଲ୍ଲୀ ୦୮।୦୮; ହିମାଚଳ ପ୍ରଦେଶର ବଡ ଦୁର୍ଘଟଣା । ଶନିବାର ସକାଳେ ବୈରାଗଡ଼ରୁ ଚମ୍ବା ଯାଉଥିବା ଏକ ଘରୋଇ ବସ୍ ରାସ୍ତାରୁ ୧୦୦ ଫୁଟ ତଳକୁ ଖସି ପଡ଼ିଛି । ଯାହାଫଳରେ ଡ୍ରାଇଭର ଏବଂ କଣ୍ଡକ୍ଟର ସମେତ ୭ ଜଣଙ୍କର ମୃତ୍ୟୁ ଘଟିଛି । ୧୧ ଜଣ ଆହତ ହୋଇଛନ୍ତି। ବସ୍ଟି ୧୮ ଜଣ ଯାତ୍ରୀଙ୍କୁ ନେଇଯାଉଥିଲା। ପୋଲିସ ଏବଂ ସ୍ଥାନୀୟ ଲୋକମାନେ ତୁରନ୍ତ ଫସି ରହିଥିବା ଲୋକଙ୍କୁ ଉଦ୍ଧାର କରି ଆହତମାନଙ୍କୁ ଚିକିତ୍ସା ଲାଗି ଡାକ୍ତରଖାନାରେ ଭର୍ତ୍ତି କରିଛନ୍ତି। ଏବେ ୭ ଜଣ ଆହତଙ୍କ ଅବସ୍ଥା ଗୁରୁତର ରହିଛି।
ସେମାନଙ୍କୁ ଚମ୍ବାର ପଣ୍ଡିତ ଜବାହରଲାଲ ନେହେରୁ ସରକାରୀ ମେଡିକାଲ କଲେଜ ଏବଂ ହସ୍ପିଟାଲକୁ ଚିକିତ୍ସା ପାଇଁ ପଠାଯାଇଛି। ଦୁର୍ଘଟଣା ପରେ କିଛି ଲୋକ ବସ୍ ଭିତରେ ଫସି ଯାଇଥିଲେ। ସ୍ଥାନୀୟ ଲୋକେ ଏବଂ ପଥଚାରୀ ଯାତ୍ରୀମାନଙ୍କୁ ବାହାର କରିବାରେ ସାହାଯ୍ୟ କରିଥିଲେ। ପ୍ରାରମ୍ଭିକ ରିପୋର୍ଟ ଅନୁଯାୟୀ, ସକାଳ ପ୍ରାୟ ସାଢ଼େ ୬ଟାରେ ଏକ ଘରୋଇ ବସ୍ ବୈରାଗଡ଼ରୁ ଚମ୍ବା ଅଭିମୁଖେ ବାହାରିଥିଲା। ପ୍ରାୟ ତିନି କିଲୋମିଟର ଯାତ୍ରା କରିବା ପରେ, ବସ୍ ଟିସା-ବୈରଗଡ଼ ମୁଖ୍ୟ ରାସ୍ତାର ଦେବୀକୋଠି ନିକଟରେ ଚାଲୁଜ ମୋଡ଼ରେ ନିୟନ୍ତ୍ରଣ ହରାଇ ରାସ୍ତାରୁ ଖସି ପଡ଼ିଥିଲା।
ଚମ୍ବା ଜିଲ୍ଲା ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ ସାତ ଜଣଙ୍କର ମୃତ୍ୟୁ ଏବଂ ୧୧ ଜଣ ଆହତ ହୋଇଥିବାର ନିଶ୍ଚିତ କରିଛନ୍ତି। ଦୁର୍ଘଟଣାର କାରଣ ଏବଂ ମୃତକ ଓ ଆହତଙ୍କ ପରିଚୟ ସମ୍ପର୍କରେ ସୂଚନା ଏପର୍ଯ୍ୟନ୍ତ ପ୍ରକାଶ କରାଯାଇ ନାହିଁ। ଏହା ଉଲ୍ଲେଖନୀୟ ଯେ ଚମ୍ବାରେ ସଡ଼କ ଦୁର୍ଘଟଣା ବାରମ୍ବାର ଘଟୁଛି।
