ଭୁବନେଶ୍ବର ୧୯।୮: କେନ୍ଦ୍ର ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କୁ ଧନ୍ୟବାଦ ଜଣାଇ ଚିଠି ଲେଖିଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଓଡ଼ିଶାର ୪ଟି ବଡ଼ ରେଳ ପ୍ରକଳ୍ପକୁ କ୍ୟାବିନେଟ୍ ମଞ୍ଜୁରୀ ମିଳିଥିବାରୁ ପ୍ରକାଶ କଲେ କୃତଜ୍ଞତା ।
୯,୪୫୦ କୋଟି ଟଙ୍କା ବ୍ୟୟବରାଦରେ ନିର୍ମାଣ ହେବ ରେଳ ମଲ୍ଟି-ଟ୍ରାକିଂ ପ୍ରକଳ୍ପ । ଏହି ପ୍ରକଳ୍ପ ଦ୍ୱାରା ଓଡ଼ିଶାର ଶିଳ୍ପ ଏବଂ ଉପକୂଳବର୍ତ୍ତୀ ଜିଲ୍ଲାଗୁଡ଼ିକର ରେଳ ସଂଯୋଗୀକରଣରେ ହେବ ବଡ଼ ସୁଧାର । କୋଇଲା, ଲୁହାପଥର, ସିମେଣ୍ଟ ଓ ଇସ୍ପାତ ପରିବାହନ ହେବ ଆହୁରି ସହଜ; ମଜବୁତ ହେବ ଓଡ଼ିଶାର ଅର୍ଥନୀତି ।
ଭିତରକନିକା, ଚାନ୍ଦିପୁର, ଶାରଳା ପୀଠ ଏବଂ ଲଳିତଗିରି ପରି ପ୍ରମୁଖ ପର୍ଯ୍ୟଟନ ଓ ଧାର୍ମିକ ସ୍ଥଳକୁ ଯୋଗାଯୋଗ ହେବ ସୁଗମ । ପର୍ଯ୍ୟଟନର ବିକାଶ ସହ ସ୍ଥାନୀୟ ଅଞ୍ଚଳରେ ଜୀବିକା ନିର୍ବାହର ସୁଯୋଗ ସୃଷ୍ଟି ହେବ ବୋଲି କହିଲେ ମୁଖ୍ୟମନ୍ତ୍ରୀ । ‘ପିଏମ୍ ଗତି ଶକ୍ତି ମାଷ୍ଟର ପ୍ଲାନ’ ଅଧୀନରେ ଓଡ଼ିଶାର ବିକାଶ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ମଧ୍ୟ ଜଣାଇଲେ ଧନ୍ୟବାଦ ।
