ମୋହନ ସରକରାଙ୍କୁ ଦୁଇ ବର୍ଷ ପୂରି ତୃତୀୟ ବର୍ଷ ଚାଲିଲାଣି । ହେଲେ ଗାଁ ଭୋଟରଙ୍କ ମନ ଜିଣିବାକୁ ଆଗକୁ ଏକ ବଡ଼ କାର୍ୟ୍ୟକ୍ରମ ହାତକୁ ନେବାକୁ ଯାଉଛନ୍ତି ସରକାର । ଗ୍ରାମାଂଚଳ ଲୋକଙ୍କ ପାଇଁ ଭଣ୍ଡାର ଖୋଲି ବର୍ଷକୁ ବିଭିନ୍ନ ଯୋଜନା ପାଇଁ ୩ କୋଟି ଟଙ୍କା ଦେବ ପଂଚାୟତିରାଜ ବିଭାଗ । ଆଉ ଏହାକୁ ନେଇ ରାଜନୀତିର ଗନ୍ଧ ବାରିଛନ୍ତି ।
ଆଉ କେଇ ମାସ ପରେ ବାଜିବ ପଂଚାୟତ ନିର୍ବାଚନର ବିଗୁଲ। ଏବେଠୁ ଗ୍ରାମାଂଚଳର ଭୋଟରଙ୍କ ମନ କିଣିବାକୁ ମେଗା ପ୍ଲାନ ପ୍ରସ୍ତୁତ କରିଛି ପଂଚାୟତିରାଜ ବିଭାଗ । ଗାଁରେ ମିଳିବ ସହରୀ ସୁବିଧା। ଗ୍ରାମ ସମ୍ପଦ କାର୍ୟ୍ୟକ୍ରମ ଆଣିବ ପଞ୍ଚାୟତିରାଜ ବିଭାଗ। ପଞ୍ଚାୟତର ବିକାଶ ପାଇଁ ବର୍ଷକୁ ମିଳିବ ପ୍ରାୟ ୩ କୋଟି ଟଙ୍କା। ସହର ପରି ଗାଁରେ ଆସେଟ ତିଆରି କରିବେ ରାଜ୍ୟ ସରକାର। ଏହି କାର୍ୟ୍ୟକ୍ରମ ଅଧୀନରେ ଆଦର୍ଶ କଲ୍ୟାଣ ମଣ୍ଡପ, ଆଦର୍ଶ ଗ୍ରାମୀଣ ପାର୍କ, ଆଦର୍ଶ ଗ୍ରାମୀଣ ହାଟ, ଆଦର୍ଶ ଖେଳ ପଡ଼ିଆ, ଆଦର୍ଶ ପୋଖରୀ, ଆଦର୍ଶ ଶ୍ମଶାନ ନିର୍ମାଣ ହେବ। କେନ୍ଦ୍ର ଏବଂ ରାଜ୍ୟ ସରକାରଙ୍କ ବିଭିନ୍ନ ଯୋଜନା ବା କାର୍ୟ୍ୟକ୍ରମ ଅଧୀନରେ ଆସୁଥିବା ଅର୍ଥକୁ ମିଳିତ ଭାବେ ମିଶାଇ ଗ୍ରାମୀଣ ଆସେଟ ତିଆରି କରାଯିବ ।
ସରକାର ଆଣୁଛନ୍ତି ଆମ ସମ୍ପଦ କାର୍ୟ୍ୟକ୍ରମ
ପ୍ରକଳ୍ପ ବ୍ୟୟବରାଦ
ଆଦର୍ଶ ଖେଳପଡ଼ିଆ ୬୫ ଲକ୍ଷ ୭୫ ହଜାର
କଲ୍ୟାଣ ମଣ୍ଡପ ୪୯ ଲକ୍ଷ
ପୋଖରୀ ଓ ଜଳାଶୟ ୩୪ ଲକ୍ଷ
ଶ୍ମଶାନ ୨୨ ଲକ୍ଷ
ଗ୍ରାମୀଣ ପାର୍କ ୨୦ ଲକ୍ଷ
ଗାଁ ହାଟ ୧୬ ଲକ୍ଷ ୫୦ ହଜାର
ଟଙ୍କା ଖର୍ଚ୍ଚ ହେବ। ଏ ନେଇ ରାଜ୍ୟ ସରକାର ଏସ୍ଓପି ପ୍ରସ୍ତୁତ କରୁଥିବା କହିଛନ୍ତି ପଞ୍ଚାୟତିରାଜ ମନ୍ତ୍ରୀ ରବି ନାୟକ ।ସରକାରଙ୍କ ଯୋଜନାକୁ ସ୍ବାଗତ କରିଛନ୍ତି ବିରୋଧୀ ହେଲେ ଉଦ୍ଦେଶ୍ୟକୁ ନେଇ ପ୍ରଶ୍ନ କରିଛନ୍ତି । ବିଜେଡ଼ି କହିଛି, ପଞ୍ଚାୟତିରାଜ ବିଭାଗ ବଜେଟ୍ ଅର୍ଥ ଖର୍ଚ୍ଚ କରିବାରେ ସବୁଠାରୁ ତଳେ। କଥା ଆଉ ବାସ୍ତବତା ଭିତରେ ବହୁ ପାର୍ଥକ୍ୟ। ସେପଟେ କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି କହିଛନ୍ତି ପଞ୍ଚାୟତ ନିର୍ବାଚନକୁ ଆଖିରେ ରଖି ବିଜେପି ସରକାର ଏଭଳି ଘୋଷଣା କରିଛନ୍ତି। ଦିନରେ ଗୋଲାପୀ ସ୍ୱପ୍ନ ଦେଖୁଛନ୍ତି। ଗାଁରେ କାମ କିଛି ହେଉନି। କେବଳ ଲୋକଙ୍କ ଆଇୱାସ୍ ପାଇଁ ଏପରି କରିଛନ୍ତି।
ପୂର୍ବ ସରକାର ଗାଁର ବିକାଶ ପାଇଁ ଆମ ଓଡ଼ିଶା ନବୀନ ଓଡ଼ିଶା ସ୍କିମ ଆଣିଥିଲେ, ଏହାକୁ ପରିବର୍ତ୍ତନ କରି ବିଜେପି ସରକାର ବିକଶିତ ଗାଁ ବିକଶିତ ଓଡ଼ିଶା ଯୋଜନା ପ୍ରଣୟନ କଲେ । ଉଦ୍ଦେଶ୍ୟ ଥିଲା, ଏହି ଯୋଜନାରେ ଗାଁର ସାମଗ୍ରିକ ବିକାଶ । ଆଉ ଆଗକୁ ଆସୁଛି ଆମ ସମ୍ପଦ କାର୍ୟ୍ୟକ୍ରମ ।
