ଝାରସୁଗୁଡା: ଲଇକେରା ବ୍ଲକ୍ ଅଞ୍ଚଳରେ ବିପର୍ଯ୍ୟସ୍ତ ସଡ଼କ, ଭଙ୍ଗା ବ୍ରିଜ୍ ଏବଂ ଗତବର୍ଷର ବର୍ଷାଜନିତ କ୍ଷତିଗ୍ରସ୍ତ ପରିବାରଙ୍କୁ ସହାୟତା ନମିଳିବା ପ୍ରସଙ୍ଗକୁ ନେଇ ସ୍ଥାନୀୟ ନେତୃବୃନ୍ଦ ଓ ଜନସାଧାରଣଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଏନେଇ ଶନିବାର ଲଇକେରା ଠାରେ ଆୟୋଜିତ ଏକ ଗୁରୁତ୍ୱପୂର୍ଣ୍ଣ ସାମ୍ବାଦିକ ସମ୍ମିଳନୀରେ ବିଧାୟକଙ୍କ କାର୍ଯ୍ୟଶୈଳୀ ଏବଂ ପ୍ରଶାସନିକ ଅବହେଳାକୁ କଡ଼ା ସମାଲୋଚନା କରାଯାଇଛି।ସାମ୍ବାଦିକ ସମ୍ମିଳନୀରେ ଲଇକେରା ବ୍ଲକ ର ବିଜେଡି କର୍ମକର୍ତା ଏବଂ ଉପସ୍ଥିତ ଜନ ପ୍ରତନିଧି ଙ୍କ ପକ୍ଷ ରୁ କୁହାଯାଇଛି ଯେ, ଗତବର୍ଷ ପ୍ରବଳ ବର୍ଷା ଯୋଗୁଁ ଲଇକେରା ବ୍ଲକର ପାକେଲପଡ଼ା, ତିଲେଇମାଲ, ଜାମମାଲ ଆଦି ଅଞ୍ଚଳରେ ଚାଷୀଙ୍କ ଫସଲ ବ୍ୟାପକ ଭାବେ ନଷ୍ଟ ହୋଇଥିଲା। ଅନେକ ପରିବାରଙ୍କ ଘର ଭାଙ୍ଗିଯାଇ ଜୀବନଜୀବିକା ବିପନ୍ନ ହୋଇପଡ଼ିଥିଲା। ବିଧାୟକ ଘଟଣାସ୍ଥଳ ପରିଦର୍ଶନ କରି ଫଟୋ ଉଠାଇଥିଲେ ମଧ୍ୟ ଆଜି ପର୍ଯ୍ୟନ୍ତ କ୍ଷତିଗ୍ରସ୍ତ ଚାଷୀ ଓ ପରିବାରକୁ କୌଣସି ସରକାରୀ ସହାୟତା କିମ୍ବା କ୍ଷତିପୂରଣ ମିଳିପାରି ନାହିଁ।ସେହିପରି ରେଙ୍ଗାଲବେଡ଼ାରୁ ବାଗଡିହି ଶିବ ମନ୍ଦିର ନିକଟସ୍ଥ ଆରଏମସି ମାର୍କେଟିଂ ରୋଡ୍, ଡୁମେରମୁଣ୍ଡା-ସାନ-ଝୁରିଆମ୍ ବାଇପାସ୍ ଏବଂ କୁଲେମୁରା-ମୁଦ୍ରାଜୋର ବ୍ରିଜ୍ର ଅବସ୍ଥା ଅତ୍ୟନ୍ତ ଆଶୋଚନୀୟ। ଗତବର୍ଷ ବର୍ଷାରେ କୁଲେମୁରା-ମୁଦ୍ରାଜୋର ବ୍ରିଜ୍ ଭୁଶୁଡ଼ି ପଡ଼ିବା ପରେ ସ୍କୁଲ ଛାତ୍ରଛାତ୍ରୀ, ରୋଗୀ ଓ ସାଧାରଣ ଲୋକେ ଯାତାୟାତରେ ନାହିଁ ନଥିବା ଦୁର୍ଦ୍ଦଶା ଭୋଗୁଛନ୍ତି। ଡିପିଆର (DPR) ପ୍ରସ୍ତୁତ ହୋଇସାରିଛି ବୋଲି ପ୍ରଶାସନିକ ଆଶ୍ୱାସନା ମିଳିଥିଲେ ବି ବର୍ଷେ ପରେ ବି ନିର୍ମାଣ କାମ ଆରମ୍ଭ ହୋଇନାହିଁ।ଗଣମାଧ୍ୟମର ପ୍ରତିନିଧି ଏବଂ ପ୍ରଶାସନିକ ଅଧିକାରୀମାନେ କେବଳ କାଗଜପତ୍ର ଓ ଫଟୋ ପୋଷ୍ଟରରେ ସୀମିତ ନରହି ନିଜେ ଘଟଣାସ୍ଥଳ ପରିଦର୍ଶନ କରି ତୃଣ ମୂଳ ସ୍ତରର ବାସ୍ତବ ସ୍ଥିତି ଦେଖନ୍ତୁ। ପ୍ରଚାର ବଦଳରେ ପ୍ରକୃତ କାମ, ସଡ଼କ ଓ ବ୍ରିଜ୍ର ତୁରନ୍ତ ମରାମତି ଏବଂ କ୍ଷତିଗ୍ରସ୍ତଙ୍କୁ ସହାୟତା ଯୋଗାଇବାକୁ ପ୍ରେସ ମିଟ ରେ ବିଜେଡି କର୍ମକର୍ତା ଏବଂ ଜନ ପ୍ରତିନିଧି ଙ୍କ ତରଫରୁ ଦାବି କରାଯାଇଛି।ଏହି ସାମ୍ବାଦିକ ସମ୍ମିଳନୀରେ ଜିଲ୍ଲା ପରିଷଦ ସଭାପତି ଶ୍ରୀମତୀ ତୁଲାବତୀ ମିଞ୍ଜ, ଲଇକେରା ବ୍ଲକ ଉପାଧ୍ୟକ୍ଷ ସଞ୍ଜିତ ନାୟକ, ଅନିଲ ନାୟକ, କଲିମ୍ ଖାନ୍, ଗୋପାଳ ବେହେରା, ସବିତା ବାଗ, ଅଶୋକ ମାଝୀ, ଅଶ୍ୱିନ ବେହେରା, ଉମାଶଙ୍କର ପ୍ରଧାନ, ଜିତେନ ରଣା, ସୂରଜ ନାୟକ, ଦୁର୍ଗା ନାୟକ, ଦୋଳଗୋବିନ୍ଦ ନାୟକ, ପ୍ରଦୀପ ପଟେଲ, ଲିଙ୍ଗରାଜ ସାହୁ, ବୁଲୁ ସାହୁ, ଉପେନ୍ଦ୍ର, ବିନୋଦ ପଟେଲ, ପ୍ରଦୀପ ନାୟକ, ଅଶୋକ ପଟେଲ, ଭାଗବତୀ ବେହେରା, ମହେନ୍ଦ୍ର ମହାନନ୍ଦଙ୍କ ସମେତ ଅନେକ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ଥିଲେ।
