ଭୁବନେଶ୍ୱର: ଓଡିଶା ଉର୍ଦ୍ଦୁ ଏକାଡେମୀ ଗତ ସପ୍ତାହରେ କଟକ ପାନ୍ଥ ନିବାସରେ ଏକ ରାଜ୍ୟ ସ୍ତରୀୟ ମୁଶାଏରା, ଉର୍ଦ୍ଦୁ କବି ସମ୍ମିଳନୀ, ଆୟୋଜନ କରିଥିଲା। ସ୍ୱାଧୀନତା ଦିବସ ପାଳନ ଅବସରରେ ଆୟୋଜିତ ଏହି କାର୍ଯ୍ୟକ୍ରମରେ ପ୍ରାୟ କୋଡ଼ିଏ ଉର୍ଦ୍ଦୁ କବି ସେମାନଙ୍କ କବିତା ପାଠ କରିଥିଲେ। ମୁଶାଏରା ପାଠ ସମୟରେ ଦର୍ଶକମାନେ ପ୍ରତ୍ୟେକଙ୍କୁ “ୱା-ୱା” ଏବଂ କରତାଳି ଦେଇ ଉତ୍ସାହିତ କରିଥିଲେ କାର୍ଯ୍ୟକ୍ରମରେ ଯୋଗ ଦେଇଥିବା କବିମାନେ ସମ୍ବଲପୁର, ରାଉରକେଲା, ଭଦ୍ରକ, କଟକ ସହର ଏବଂ ଏହାର ନିକଟବର୍ତ୍ତୀ ଅଞ୍ଚଳରୁ ଆସିଥିଲେ। ଜନାବ ମୁସ୍ତାକ୍ ଗହର ଏହି କାର୍ଯ୍ୟକ୍ରମରେ ସଂଯୋଜନା କରିଥିଲେ।
ରାଜସ୍ୱ ବିଭାଗୀୟ କମିଶନରଙ୍କ କଟକ କାର୍ଯ୍ୟାଳୟରେ ସ୍ୱତନ୍ତ୍ର ସଚିବ ସୟଦ ମହମ୍ମଦ ଆକଦାସ ଓ ଉର୍ଦ୍ଦୁ ଭାଷାର ପ୍ରୋତ୍ସାହନ ପାଇଁ ଜାତୀୟ ପରିଷଦର ସାଧାରଣ ସଦସ୍ୟ ସୟଦ ମୁଶିର ଆଲାମ ଉତ୍ସବରେ ଅତିଥି ଭାବରେ ଯୋଗ ଦେଇଥିଲେ। ଏକାଡେମୀ ସଭାପତି ଖାଲିଦ ରହୀମ , ଉପ-ସଭାପତି ନଫିସ ମଞ୍ଜର ହାସନ ଏବଂ ଏକାଡେମୀ ସଚିବ ସୁଚିସ୍ମିତା ମନ୍ତ୍ରି ମଧ୍ୟ ଏହି କାର୍ଯ୍ୟକ୍ରମରେ ଉପସ୍ଥିତ ଥିଲେ।
ବିଶିଷ୍ଟ ଉର୍ଦ୍ଦୁ କବି ଯେଉଁମାନେ ଏହି କାର୍ଯ୍ୟକ୍ରମରେ ସେମାନଙ୍କର କବିତା ପାଠ କରିଥିଲେ, ସେମାନଙ୍କ ମଧ୍ୟରେ ସୟିଦ୍ ରେହମାନି, ନୁର ଇଲାହି ନାତିକ, ଅବଦୁଲ ହକ ବେତାବ, ସାକିର ୱାର୍ସି, ମୁଜିବୁର ରହମାନ ମେହେକାସ ଏବଂ ୟୁନୁସ ଆସିମ ଅନ୍ତର୍ଭୁକ୍ତ । ସେହିଭଳି ବିଭିନ୍ନ ସ୍ଥାନରୁ ଆସିଥିବା କବି ମଧ୍ୟରେ ସୁଙ୍ଗଡାରୁ ଖୱାର ନକିବ, ଭଦ୍ରକରୁ ଜଫର ଡାନିସ୍ ଓ ମୁନିର୍ ଅରମାନ, ସମ୍ବଲପୁରରୁ ନାସିର ଫରାଜ ଓ ମମତାଜ ସାଉର , ରାଉରକେଲା ରୁ ମୁକତାର ରାହୀ ଏବଂ କାକଟପୁରରୁ ଇସାକ ଅନୱାର ଅନ୍ତର୍ଭୁକ୍ତ। ଏହି ଅବସରରେ ବିଶିଷ୍ଟ ଉର୍ଦ୍ଦୁ କବି ଅବଦୁଲ ହକ ବେତାବଙ୍କ ଦ୍ୱାରା ଲିଖିତ କବିତା ପୁସ୍ତକ “ ରେଜା ରେଜା ଅହସାସ ” ମୁକ୍ତିଲାଭ କରିଥିଲା।
