ମୁମ୍ବାଇ: ଆଜିକାଲି ଟାଇଗର ସରଫ ତାଙ୍କ ଚଳଚ୍ଚିତ୍ର ‘ବଡେ ମିୟାଁ ଛୋଟେ ମିୟାଁ’ର ରିଲିଜ୍ ପାଇଁ ପ୍ରସ୍ତୁତ ହେଉଛନ୍ତି। ବର୍ତ୍ତମାନ ତାଙ୍କ ଚଳଚ୍ଚିତ୍ର ୧୦ ଏପ୍ରିଲ ପରିବର୍ତ୍ତେ ୧୧ ଏପ୍ରିଲରେ ଇଦ୍ ଅବସରରେ ପ୍ରେକ୍ଷାଳୟରେ ମୁକ୍ତିଲାଭ କରିବ। ନିକଟରେ ଏକ ସାକ୍ଷାତକାରରେ ଅଭିନେତା ତାଙ୍କ ପ୍ରେମ ଜୀବନ ବିଷୟରେ ସୂଚନା ଦେଇଛନ୍ତି। ତାଙ୍କ ଶବ୍ଦରୁ ଜଣାପଡିଛି ଯେ ସେ ତାଙ୍କର ପୂର୍ବତନ ପ୍ରେମିକା ଦିଶା ପାଟାନୀଙ୍କ ସହ ପ୍ୟାଚ୍-ଅପ୍ ହୋଇଯାଇଛି।
ଉଲ୍ଲେଖଥାଉ କି, ନିକଟରେ ହୋଲି ଅବସରରେ ଦିଶା, ଟାଇଗର ଏବଂ ଅକ୍ଷୟ କୁମାର ମିଶି କରି ରଙ୍ଗ ଖେଳିଥିବାର ନଜର ଆସିଥିଲେ। ବର୍ତ୍ତମାନ ‘ଟାଇମ୍ସ ନାଓ’ ସହିତ ଏକ ବାର୍ତ୍ତାଳାପ ପରେ ଟାଇଗର ସରଫଙ୍କର ଦିଶା ପାଟାନୀଙ୍କ ସହ ପ୍ୟାଚ୍-ଅପ୍ ଗୁଜବ ସୃଷ୍ଟି ହୋଇଛି।
ତାଙ୍କୁ ପଚରା ଯାଇଥିଲା, ‘‘ଆପଣ ସିଙ୍ଗଲ୍ (ଏକାକୀ) କି? ଆପଣଙ୍କ ଜୀବନ କେଉଁ ଦିଶା (ଦିଗ)ରେ ଯାଉଛି?’’ ଯାହାର ଉତ୍ତରରେ ଟାଇଗର୍ ଏକ ମଜାଳିଆ ଅନ୍ଦାଜରେ କହିଥିଲେ, ‘‘ମୋ ଜୀବନରେ କେବଳ ଗୋଟାଏ ଦିଶା ଅଛି’’। ଅବଶ୍ୟ, ପରବର୍ତ୍ତୀ ମୁହୂର୍ତ୍ତରେ ସେ ହସି ହସି ଏହି ପ୍ରସଙ୍ଗଟିକୁ ବଦଳାଇ ଦେଇଥିଲେ। ସେ ନିଜ କାମକୁ ଗୁରୁତ୍ବ ଦେଇଥିଲେ।
ଏହାପୂର୍ବରୁ ‘ବଡେ ମିୟାଁ ଛୋଟେ ମିୟାଁ’ର ଟ୍ରେଲର ଲଞ୍ଚରେ ଦିଶା ପାଟାନୀଙ୍କ ନାମରେ ସମାନ ଶବ୍ଦର ନାଟକ ଦେଖିବାକୁ ମିଳିଥିଲା। ତା’ପରେ ସାମ୍ବାଦିକମାନେ ଅକ୍ଷୟ କୁମାରଙ୍କୁ ପଚାରିଥିଲେ ଯେ ସେ ଟାଇଗରକୁ କେଉଁ ପରାମର୍ଶ ଦେବାକୁ ଚାହୁଁଛନ୍ତି? ଏହା ଉପରେ ଅକ୍ଷୟ ହସି ହସି କହିଥିଲେ, ‘‘ମୁଁ ଟାଇଗରକୁ ସବୁବେଳେ ସମାନ ଦିଶା (ଦିଗ)ରେ ରହିବାକୁ କହିବି!’’
