ଜାନୁଆରୀ ୬ରେ ଲୋକସେବା ଭବନ ସମ୍ମୁଖରେ ପ୍ରତିବାଦ
ଭୁବନେଶ୍ବର : ନିତ୍ୟ ବ୍ୟବହାର୍ଯ୍ୟ ଜିନିଷର ଦର ବୃଦ୍ଧି ସହ ରାଜ୍ୟରେ ବିଜେପି ସରକାର ଯେଉଁଭଳି ଭାବେ ଲୋକଙ୍କୁ ପ୍ରତିଶ୍ରୁତି ଦେଇ ପ୍ରତାରଣା କରିଛି, ତାହାକୁ ନେଇ ରାସ୍ତାକୁ ଓହ୍ଲାଇବ ବିଜେଡି। ଏନେଇ ବିଜେଡି କାର୍ଯ୍ୟକ୍ରମ କାର୍ଯ୍ୟକାରୀ କମିଟିର ଆବାହକ ସଞ୍ଜୟ ଦାସବର୍ମା କହିଛନ୍ତି ଆସନ୍ତା ଜାନୁଆରୀ ୬ରେ ଦରଦାମ ବୃଦ୍ଧି ବିରୋଧରେ ଆନ୍ଦୋଳନ କରି ରାଜରାସ୍ତାକୁ ଓହ୍ଲାଇବ ବିଜେଡି। ଦର ଦାମ ନିୟନ୍ତ୍ରଣ ନ ହେଲେ ସାରା ରାଜ୍ୟରେ ଆନ୍ଦୋଳନ ହେବ। ନୂଆ ସରକାରଙ୍କୁ ବିରୋଧ କରାଯିବା ସହ ଲୋକସେବା ଭବନ ଆଗରେ ବିକ୍ଷୋଭ ହେବ। ନୂଆ ସରକାରର ଗଠନର ଛ ମାସରେ ଦରଦାମ ବଢ଼ି ଚାଲିଛି। ସରକାର ଯେଉଁ ପ୍ରତିଶୃତି ଦେଇ ଆସିଥିଲେ, ଯାହା କୁଆଡେ ଗଲା ବୋଲି ସଞ୍ଜୟ ଦାସବର୍ମା ପ୍ରଶ୍ନ କରିଛନ୍ତି।
ସେହିପରି ବିଜେଡିର ବରିଷ୍ଠ ନେତା ତଥା ବିଜେଡି ସମନ୍ୱୟ କମିଟି ଅଧ୍ୟକ୍ଷ ଦେବୀ ମିଶ୍ର କହିଛନ୍ତି ଜାନୁଆରୀ ୬ରେ ଦରଦାମ ବୃଦ୍ଧି ବିରୋଧରେ ବିଜେଡି ଆନ୍ଦୋଳନକୁ ଓହ୍ଲାଇବ । ବିଜେପି ନିଜର ପ୍ରତିଶୃତି ପାଳନ ନ କରିବା, ଦରଦାମ ବୃଦ୍ଧି କଥାକୁ ସମସ୍ତଙ୍କ ପାଖରେ ପହଞ୍ଚାଇବୁ। ଆସନ୍ତା ଜାନୁଆରୀ ୬ ତାରିଖରେ ଭୁବନେଶ୍ଵରରେ ବିରାଟ ଆନ୍ଦୋଳନ କରାଯିବ। ଦରଦାମରେ ଲୋକେ ଯେମିତି ଅତିଷ୍ଠ ହେଲେଣି, ତାକୁ ନେଇ ସଚେତନ କରାଯିବ ବୋଲି କହିଛନ୍ତି ଦେବୀ ମିଶ୍ର।
ସେହିପରି ବିଜେଡି ମହିଳା ଜନତା ଦଳ ସଭାନେତ୍ରୀ ସ୍ନେହାଙ୍ଗିନୀ ଛୁରିଆ କହିଛନ୍ତି ସ୍ୱାମୀ ଆୟରେ ଗୃହିଣୀ ଘର ଚଳାଏ। ହେଲେ ଅହେତୁକ ଦର ବୃଦ୍ଧି ଯୋଗୁଁ ହାଣ୍ଡିଶାଳରେ ଚଡକ ପଡିଛି। ଡବଲ ଇଂଜିନ ସରକାର ବିକାଶ ନାରା ଦେଇଥିଲେ,ହେଲେ ଅର୍ଥନୀତି ପରିଚାଳନାରେ ବିଫଳ ହୋଇଛନ୍ତି। ୨୦୧୪ରୁ NDA ସରକାର ଆସିବା ଦିନରୁ ଦର ବୃଦ୍ଧି ହୋଇ ଚାଲିଛି। ମଧ୍ୟବିତ୍ତ ଓ ଉଚ୍ଚ ମଧ୍ୟବିତ୍ତ କ୍ଷତି ସହୁଛନ୍ତି। ସେପଟେ ବିନା କଟନୀ ଛଟନୀରେ ଧାନ କିଣିବା ସହ ୩୧୦୦ ଟଙ୍କା ଏମ୍ଏସ୍ପି ଘୋଷଣା କରିଥିଲେ, ହେଲେ ଏବେ ଟୋକନ ଆସିନି। ମୁଁ ବି ଚାଷୀ, ମୋର ବି ଟୋକାନ ଆସିନି। ଆନାଲାଇଜର ଯୋଗୁଁ ୮-୯ କିଲୋ କଟନୀ ଛଟନୀ ହେଉଛି। ମିଲରଙ୍କୁ ସୁହାଇବାକୁ ଆନାଲାଇଜର ଲଗା ଯାଇଛି।
କେନ୍ଦ୍ର ଓ ରାଜ୍ୟରେ ବିଜେପି ସରକାର କରିଛି। ଅଛେ ଦିନ ଆଣିବା କଥା କହି ଆସିଥିଲେ।ହେଲେ ଏହା କଥାରେ ରହି ଯାଇଛି। ସାରା ଦେଶରେ ଦରଦାମ ହୁ ହୁ ହୋଇ ବଢିଚାଲିଛି। ପୂର୍ବରୁ ନବୀନ ସରକାର ସମୟରେ ରାଜ୍ୟର ଦରଦାମ ନିୟନ୍ତ୍ରଣ ଭିତରେ ରହୁଥିଲା, ହେଲେ ବିଜେପି ସରକାର ଆସିବାର ଛଅ ମାସ ଭିତରେ ଦରଦାମ ହୁ ହୁ ହୋଇ ବଢିଗଲା। ଦର ବୃଦ୍ଧିରେ ଏବେ ଓଡ଼ିଶା ଦେଶରେ ଦ୍ଵିତୀୟ ସ୍ଥାନରେ ରହିଛି। ଏହା ଚିନ୍ତାଜନକ କଥା,ହେଲେ ସରକାର ବେଫିକର ହୋଇ ବସିଛନ୍ତି। ବିଜେଡିରେ ଛାମୁଆ ସଂଗଠନ ଏହା ବିରୋଧରେ ଆନ୍ଦୋଳନ କରି ସରକାରଙ୍କ ନିଦ୍ରା ଭଙ୍ଗ କରାଯିବ। ସାରା ରାଜ୍ୟରେ ଆନ୍ଦୋଳନ ବ୍ୟାପକ ହେବ ବୋଲି କହିଛନ୍ତି ଯୁବ ବିଜେଡି ସଭାପତି ବ୍ୟୋମକେଶ ରାୟ।
