ମକର ସଂକ୍ରାନ୍ତିରେ ଅସହାୟମାନଙ୍କୁ ଗ୍ରାମବାସୀଙ୍କ ସହାୟତା ପ୍ରଦାନ
ଭଦ୍ରକ: ଭଦ୍ରକ ଜିଲା ତିହିଡ଼ି ବ୍ଲକ ମହରମପୁର ପଂଚାୟତ ଅଧୀନ ଷାଠିବାଟୀ ଗାଁର ୧୨୨ବର୍ଷର ନିଆରା ପରମ୍ପରା ରହିଛି। ପରମ୍ପରା ଅନୁଯାଇ ମକର ସଂକ୍ରାନ୍ତିରେ ଏହି ଗାଁର ଗ୍ରାମବାସୀ ମିଳିତଭାବେ ଏକଜୁଟ ହୋଇ ଅସହାୟମାନଙ୍କୁ ଖାଦ୍ୟ ସମେତ ବସ୍ତ୍ର ପ୍ରଦାନ କରିଥାନ୍ତି। ଅନ୍ୟପଟେ ଅସହାୟମାନେ ଗାଁର ପରମ୍ପରାକୁ ଯଥୋଚିତ ସମ୍ମାନ ଦେବା ସହିତ ବିନା ଦ୍ୱିଧାରେ ଗାଁକୁ ଆସି ଏହି ଦିନରେ ଗାଁର ଲୋକମାନଙ୍କ ସହାୟତା ଗ୍ରହଣ କରିଥାନ୍ତି। ଆଜିର ସମାଜରେ ଅସହାୟମାନଙ୍କୁ ଚିହ୍ନଟ କରିବା ବଡ଼ ମୁସ୍କିଲି ହୋଇଥିବାବେଳେ ମକର ସଂକ୍ରାନ୍ତୀରେ ଏହି ଗାଁକୁ ଶହଶହ ଅସହାୟମାନେ ଛୁଟି ଆସିଥାନ୍ତି। ଆଉ ଗାଁର ଅଧିବାସୀମାନେ ବଡ଼ ଉତ୍କଣ୍ଠା ସହିତ ସେମାନଙ୍କୁ ସସମ୍ମାନେ ଚର୍ଚ୍ଚା କରିଥାନ୍ତି। ସେହିପରି ଏହି ଗାଁର ପରମ୍ପରାକୁ ରକ୍ଷା କରିବା ପାଇଁ ନାଥ ଓ ଭାଟ ବର୍ଗର ଲୋକେ ମକର ସଂକ୍ରାନ୍ତୀର ପୂର୍ବଦିନ ରାତିରେ ଏହି ଗାଁକୁ ଆସିଥାନ୍ତି ଏବଂ ଅତିଥିଭାବେ ରହିଥାନ୍ତି। ସଂକ୍ରାନ୍ତି ଦିନ ଭୋରୁ ଉଠି ନିତ୍ୟକର୍ମ ସାରି ଗାଁ ସାରା ବୁଲି ସହାୟତା ଗ୍ରହଣ କରିଥାନ୍ତି। ପ୍ରତି ଘରର ଦୁଆରେ ମହିଳାମାନେ ଟୋକେଇରେ ଚାଉଳ ଧରି ବସିଥାନ୍ତି ଏବଂ ଅସହାୟମାନେ ଆସିଲେ ସେମାନଙ୍କୁ ନମସ୍କାର ଜଣାଇ ଚାଉଳ, ପୋଡ଼ପିଠା ଆଦି ପ୍ରଦାନ କରିଥାନ୍ତି। ତେବେ ସାଂପ୍ରତିକ ଚଳଣିକୁ ଦୃଷ୍ଟିରେ ରଖି ଅସହାୟମାନଙ୍କୁ କେବଳ ଚାଉଳ ଓ ପିଠା ପ୍ରଦାନରେ ସୀମିତ ନକରି ଯୁବଗୋଷ୍ଠୀମାନେ ନୂତନ ବସ୍ତ୍ର ଯଥା ଶାଢୀ, ଧୋତି, ଗାମୁଛା, ପୋଷାକ ଓ କମ୍ବଳ ପ୍ରଦାନ କରୁଛନ୍ତି। ଚଳିତ ବର୍ଷ ବିଶିଷ୍ଟ ଶିକ୍ଷାବିତ୍ ଭାଗିରଥି ଆଚାର୍ଯ୍ୟଙ୍କ ପ୍ରତ୍ୟକ୍ଷ ତତ୍ୱାବଧାନରେ ସହାୟତା ପ୍ରଦାନ କରାଯାଇଛି। ସମାଜସେବୀ ସୁଶାନ୍ତ ପତି, ହରେକୃଷ୍ଣ ବେହେରା, ସୁବ୍ରତ ଲେଙ୍କା, ଚଗୁଲୁ ବେହେରା, ସୁଦାମ ପାତ୍ର, ଶଶିକାନ୍ତ ସେଠୀ, ବିକ୍ରମ ଦାସ, ତପୁ ବାରିକ, ଉତମ ପତି, ବିଜୟ ଜେନା, ସମ୍ବିତ ନାୟକ, ସିପୁନୁ ଆଚାର୍ଯ୍ୟ, ରବିନାରାୟଣ ପାତ୍ର, ନିରଂଜନ ବେହେରା, ହରେକୃଷ୍ଣ ପାତ୍ର ପ୍ରମୁଖ ଗାଁର ସମସ୍ତ ଯୁବଗୋଷ୍ଠୀ ସହଯୋଗ କରିଥିଲେ।
