ଓଡ଼ିଶାର ଭିତ୍ତିଭୂମି ବିକାଶରେ ନୂଆ ଫର୍ଦ୍ଦ ଯୋଡ଼ି ହୋଇଛି: ମୁଖ୍ୟମନ୍ତ୍ରୀ
ଭୁବନେଶ୍ବର: ଚମକିବ ଓଡ଼ିଶାର ଜାତୀୟ ରାଜପଥ। ଆମେରିକା ଭଳି ଚକାଚକ ଦେଖାଯିବ ରାଜ୍ୟର ଜାତୀୟ ରାଜପଥ। ଲୋକେ ନିର୍ଦ୍ଧାରିତ ସମୟରେ ଲକ୍ଷ୍ୟସ୍ଥଳକୁ ପହଞ୍ଚିବେ। ଏହା ଦ୍ବାରା ଲୋକଙ୍କର ସମୟ ମଧ୍ୟ ବଞ୍ଚିଯିବ। ଓଡ଼ିଶାର ଜାତୀୟ ରାଜପଥଗୁଡ଼ିକ ଆମେରିକା ଭଳି ହେବ। କେନ୍ଦ୍ର ସଡ଼କ, ପରିବହନ ଓ ଜାତୀୟ ରାଜପଥ ମନ୍ତ୍ରୀ ନୀତିନ ଗଡ଼କରୀ ଗୁରୁବାର ଭୁବନେଶ୍ବର ଗସ୍ତରେ ଏହା କହିଛନ୍ତି। ୪୦୦୦ କୋଟି ଟଙ୍କାରୁ ଅଧିକ ନିବେଶରେ ମୋଟ୍ ୧୫୪ କିମି ଦୀର୍ଘ ୧୯ଟି ସଡ଼କ ପ୍ରକଳ୍ପଗୁଡ଼ିକର ଶିଳାନ୍ୟାସ ଓ ଲୋକାର୍ପଣ ସମାରୋହକୁ ସମ୍ବୋଧିତ କରି ଶ୍ରୀ ଗଡ଼କରୀ କହିଛନ୍ତି, ପାଣି, ପରିବହନ, ଯୋଗାଯୋଗ ଭିତ୍ତିଭୂମିକୁ ବିକାଶ କରିବାକୁ ହେବ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସଡ଼କ ପଥ ଭିତ୍ତିଭୂମି ବିକାଶକୁ ଗୁରୁତ୍ବ ଦେଛନ୍ତି।
ପୁରୀ ଜିଲ୍ଲାର ସାତପଡ଼ା-କୃଷ୍ଣପ୍ରସାଦ ମଧ୍ୟରେ ୫୦୦ କୋଟି ଟଙ୍କା ବ୍ୟୟରେ ୨ଟି ପୋଲ ନିର୍ମାଣ ପାଇଁ ଡିପିଆର ଖୁବ ଶୀଘ୍ର ପ୍ରସ୍ତୁତ ହେବ। ଏଠାରେ ଭୂମିପୂଜନ ପାଇଁ ଖୁବ ଶୀଘ୍ର ଓଡ଼ିଶା ଆସିବି। ସାଧାରଣ ନିର୍ବାଚନ-୨୦୨୪ ସମୟରେ ସମ୍ବିତ ପାତ୍ରଙ୍କ ପାଇଁ ପ୍ରଚାର ସମୟରେ ଲୋକଙ୍କୁ ମୁଁ ପ୍ରତିଶ୍ରୁତି ଦେଇଥିଲି। ଏହି ପ୍ରତିଶ୍ରୁତି ପୂରା କରିବି। ଭୁବନେଶ୍ବରର ବରମୁଣ୍ଡାରେ ଆୟୋଜିତ ସଭାକୁ ସମ୍ବୋଧିତ କରି କେନ୍ଦ୍ରମନ୍ତ୍ରୀ କହିଛନ୍ତି, ୨୦୧୪ ପୂର୍ବବର୍ତ୍ତୀ ୬୦ ବର୍ଷରେ ଯାହା ହୋଇ ନାହିଁ, ତାହା ବିଗତ ୧୧ ବର୍ଷରେ ହୋଇପାରିଛି। ଓଡ଼ିଶାରେ ୨ ଲକ୍ଷ କୋଟି ଟଙ୍କାର ଜାତୀୟ ରାଜପଥ ପ୍ରକଳ୍ପ ନିର୍ମାଣ କାମ ଜାରି ରହିଛି। ଆଗାମୀ ୨ ବର୍ଷରେ ୩ ଲକ୍ଷ କୋଟି ଟଙ୍କାର ପ୍ରକଳ୍ପକୁ ପୂରା କରିବୁ। ରାଜ୍ୟରେ ଏକାଧିକ ଜାତୀୟ ରାଜପଥ ନିର୍ମାଣ କାମ ଜାରି ରହିଛି। ଏଥିରେ ରାୟପୁର-ବିଶାଖାପାଟଣା କରିଡର ମଧ୍ୟ ସାମିଲ ରହିଛି, ଯାହା ଚଳିତ ବର୍ଷ ପୂରା ହେବ। ନବରଂଗପୁରରୁ ବିଶାଖାପାଟଣା ଯିବା ପାଇଁ ଏବେ ସାଢ଼େ ୮ ଘଣ୍ଟା ସମୟ ଲାଗୁଛି। ଏହି କରିଡ଼ର ପୂରା ହେଲା ପରେ ନବରଂଗପୁରରୁ ବିଶାଖାପାଟଣା ପହଞ୍ଚିବା ପାଇଁ ୪ ଘଣ୍ଟା ଲାଗିବ। ଫଳରେ ଲୋକଙ୍କର ସାଢ଼େ ୪ଘଣ୍ଟା ସମୟ ଲାଗିବ। ରାଜ୍ୟରେ ନିର୍ମାଣାଧୀନ ସବୁ ପ୍ରକଳ୍ପ ନିର୍ମାଣ କାମ ସରିବା ପରେ ପରିବହନ ବ୍ୟବସ୍ଥାରେ ପରିବର୍ତ୍ତନ ଆସିବ।
ରାଜ୍ୟରେ ୧୯ଟି ଜାତୀୟ ରାଜପଥ ଲୋକାର୍ପଣ ଓ ଶିଳାନ୍ୟାସ କାର୍ଯ୍ୟକ୍ରମରେ ଯୋଗଦେଇ ଉପସ୍ଥିତ ଜନସାଧାରଣଙ୍କୁ ସମ୍ବୋଧିତ କରି ଶ୍ରୀ ମାଝୀ କହିଛନ୍ତି, ଓଡ଼ିଶା ପାଇଁ ଆଜି ଏକ ଐତିହାସିକ ଦିନ। ଓଡ଼ିଶାର ବିକାଶରେ ଆଜି ଏକ ନୂତନ ଅଧ୍ୟାୟ ଯୋଡ଼ି ହୋଇଯାଇଛି। ସବୁ ପ୍ରକଳ୍ପ କାମ ସଂପୂର୍ଣ୍ଣ ହେଲେ ରାଜ୍ୟରେ ଯୋଗାଯୋଗ ବ୍ୟବସ୍ଥା ଅଧିକ ସୁଦୃଢ଼ ହେବ। ଓଡ଼ିଶାର ବିକାଶକୁ ନୂଆ ବଳ ମିଳିବ। କେନ୍ଦ୍ରମନ୍ତ୍ରୀ ଶ୍ରୀ ଗଡ଼କରୀ ୨ଟି ଜାତୀୟ ରାଜପଥ ଲୋକାର୍ପଣ କରିଥିବା ବେଳେ ୧୭ଟି ଜାତୀୟ ରାଜପଥ ପାଇଁ ଶିଳାନ୍ୟାସ କରିଛନ୍ତି। ମୁଖ୍ୟମନ୍ତ୍ରୀ କହିଛନ୍ତି ଯେ, ନୂତନ ଜାତୀୟ ରାଜପଥ ନିର୍ମାଣ ହେବା ଦ୍ବାରା ରାଜ୍ୟର ଗମନାଗମନ ବ୍ୟବସ୍ଥାରେ ପରିବର୍ତ୍ତନ ଆସିବା ସହିତ ଯାତାୟତ ସୁବିଧା ହେବ। ଏଥି ସହିତ ରାଜ୍ୟର ଅର୍ଥନୀତିରେ ବିକାଶ ହେବ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସଡ଼କ ନିର୍ମାଣକୁ ଗୁରୁତ୍ବ ଦେଇଛନ୍ତି। ପୂର୍ବ ସରକାର ଦିନକୁ ୧୪କିମି ରାସ୍ତା ନିର୍ମାଣ କରୁଥିଲେ। ବିଜେପି ସରକାର ଆସିଲା ପରେ ଏହା ଦିନକୁ ୩୬ କିମି ନିର୍ମାଣ ହେଉଥିଲା। କିନ୍ତୁ ବତ୍ତର୍ମାନ ଦୈନିକ ୧୦୦କିମି ରାସ୍ତା ନିର୍ମାଣ ହେଉଛି। ଯାତାୟତର ସୁବ୍ୟବସ୍ଥା ହେଲେ ବିକାଶ ହୋଇଥାଏ।
