ଭୁବନେଶ୍ୱର: ଓଡ଼ିଶାର ଅର୍ଥନୈତିକ ପ୍ରଗତି କ୍ଷେତ୍ରରେ ଏକ ବଡ଼ ସଫଳତା ଦେଖିବାକୁ ମିଳିଛି। ୨୦୨୪-୨୫ ଆର୍ଥିକ ବର୍ଷରେ ରାଜ୍ୟର ମୁଣ୍ଡପିଛା ନିଟ୍ ଘରୋଇ ଉତ୍ପାଦ ୧,୬୮,୯୬୬ ଟଙ୍କାରେ ପହଞ୍ଚିଛି। କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ସଂସଦରେ ଉପସ୍ଥାପିତ କରିଥିବା ଭାରତର ଅର୍ଥନୈତିକ ସର୍ଭେ (୨୦୨୫-୨୬) ରିପୋର୍ଟକୁ ଆଧାର କରି ମୁଖ୍ୟମନ୍ତ୍ରୀ ମୋହନ ଚରଣ ମାଝି ଏହି ସୂଚନା ଦେଇଛନ୍ତି। ରାଜ୍ୟର ମୋଟ ନିଟ୍ ଘରୋଇ ଉତ୍ପାଦ୨୦୨୩-୨୪ର ୬.୯୯ ଲକ୍ଷ କୋଟି ଟଙ୍କାରୁ ବୃଦ୍ଧି ପାଇ ୨୦୨୪-୨୫ରେ ୭.୯୦ ଲକ୍ଷ କୋଟି ଟଙ୍କାରେ ପହଞ୍ଚିଛି। ଏହି ଅଭିବୃଦ୍ଧି ହାର ୧୩.୦୪ ପ୍ରତିଶତ ରହିଛି।
କୃଷି କ୍ଷେତ୍ରରେ ଓଡ଼ିଶାର ଦବଦବା ବଢିବାରେ ଲାଗିଛି। ବର୍ତ୍ତମାନ ଦେଶର ଟପ୍-୩ ସୂର୍ଯ୍ୟମୁଖୀ ଉତ୍ପାଦନକାରୀ ରାଜ୍ୟ ମଧ୍ୟରେ ଓଡ଼ିଶା ସ୍ଥାନ ପାଇଛି। ସେହିପରି ରାଜ୍ୟରେ ବ୍ୟାଙ୍କ ଜମା ପରିମାଣ ୫.୮୩ ଲକ୍ଷ କୋଟି ଟଙ୍କାକୁ ବୃଦ୍ଧି ପାଇଛି, ଯାହା ଲୋକଙ୍କ ସଞ୍ଚୟ ଏବଂ ନିବେଶ କ୍ଷମତା ବଢୁଥିବାର ସୂଚନା ଦେଉଛି। ମୁଖ୍ୟମନ୍ତ୍ରୀ କହିଛନ୍ତି ଯେ, ”ଏହି ରିପୋର୍ଟ ଓଡ଼ିଶାର ସ୍ଥାୟୀ ଏବଂ ସମାବେଶୀ ବିକାଶକୁ ପ୍ରମାଣିତ କରୁଛି। ରାଜ୍ୟର ଆର୍ଥିକ ସ୍ଥିତି ସୁଦୃଢ଼ ରହିଥିବାରୁ ଶିକ୍ଷା, ଭିତ୍ତିଭୂମି ଏବଂ ସମାଜ ମଙ୍ଗଳ କାର୍ଯ୍ୟରେ ଅଧିକ ପୁଞ୍ଜି ନିବେଶ କରାଯାଉଛି। ପ୍ରତିଟି ଓଡ଼ିଆଙ୍କ ଜୀବନଶୈଳୀରେ ଉନ୍ନତି ଆଣିବା ଏବଂ ଗୁଣାତ୍ମକ ନିଯୁକ୍ତି ସୁଯୋଗ ସୃଷ୍ଟି କରିବା ପାଇଁ ସରକାର ପ୍ରତିଶ୍ରୁତିବଦ୍ଧ। ଆଗାମୀ ଦିନରେ ଏହି ଅଭିବୃଦ୍ଧିକୁ ତୃଣମୂଳ ସ୍ତରରେ ପହଞ୍ଚାଇବା ଆମର ଲକ୍ଷ୍ୟ।”
ମୁଖ୍ୟମନ୍ତ୍ରୀ ଲେଖିଛନ୍ତି କି, ଅର୍ଥନୈତିକ ସର୍ଭେ ରିପୋର୍ଟ ୨୦୨୫-୨୬ ଓଡ଼ିଶାର ସ୍ଥିର ପ୍ରଗତିକୁ ପୁନର୍ବ୍ୟକ୍ତ କରିଛି । ଏହା ରାଜ୍ୟର ଆର୍ଥିକ ଶକ୍ତି ଓ ସାମାଜିକ ପ୍ରଗତିର ଏକ ସକାରାତ୍ମକ ଚିତ୍ର ଉପସ୍ଥାପନ କରୁଛି । ମୁଁ ଆନନ୍ଦିତ ଯେ ଓଡ଼ିଶାର ନେଟ୍ ଷ୍ଟେଟ୍ ଡୋମେଷ୍ଟିକ୍ ପ୍ରଡକ୍ଟ (NSDP) ୨୦୨୩-୨୪ରେ ୬.୯୯ ଲକ୍ଷ କୋଟିରୁ ୨୦୨୪-୨୫ରେ ଅନୁମାନିତ ୭.୯୦ଲକ୍ଷ କୋଟି ଟଙ୍କାକୁ ବୃଦ୍ଧି ପାଇଛି, ଯାହାର ବୃଦ୍ଧି ହାର ୧୩.୦୪ ପ୍ରତିଶତରେ ପହଞ୍ଚିଛି । ପ୍ରତି ବ୍ୟକ୍ତି NSDP ୧,୬୮,୯୬୬ ଟଙ୍କା ହୋଇଛି, ଯାହା ଲୋକଙ୍କ ଆୟ ବୃଦ୍ଧି ଓ ଜୀବନଧାରଣର ମାନ ଉନ୍ନତିକୁ ପ୍ରତିଫଳିତ କରୁଛି । କୃଷି ଆମର ବିକାଶ ରଣନୀତିର ଏକ ମୂଳ ସ୍ତମ୍ଭ ରହିଛି। ଦେଶରେ ସୂର୍ଯ୍ୟମୁଖୀ ଉତ୍ପାଦନରେ ଓଡ଼ିଶା ଶୀର୍ଷ ତିନି ରାଜ୍ୟ ମଧ୍ୟରେ ସ୍ଥାନ ପାଇଛି, ଯାହା କୃଷି କ୍ଷେତ୍ରରେ ରାଜ୍ୟର ଶକ୍ତିଶାଳୀ ଅବଦାନକୁ ଦର୍ଶାଉଛି । ବ୍ୟାଙ୍କ୍ ଡିପୋଜିଟ୍ ୫.୮୩ ଲକ୍ଷ କୋଟିରେ ପହଞ୍ଚିଛି, ଯାହା ସଞ୍ଚୟ ଓ ନିବେଶକୁ ଦୃଢ କରୁଛି। ଆମର ଆର୍ଥିକ ସ୍ଥିତି ଦୃଢ଼ ରହିଛି, ଯାହା ଇନଫ୍ରାଷ୍ଟକଚର, ଶିକ୍ଷା ଓ ସାମାଜିକ କଲ୍ୟାଣରେ ନିରନ୍ତର ନିବେଶକୁ ସମ୍ଭବ କରୁଛି । ଓଡ଼ିଶାର ଏହି ପ୍ରଗତି ନିଶ୍ଚିତ ଭାବେ ଗର୍ବର ବିଷୟ। ଆମେ ସମସ୍ତେ ମିଶି ଏହି ଯାତ୍ରାକୁ ଆହୁରି ଆଗକୁ ନେବା ।
