ଭୁବନେଶ୍ୱର : ବିଧାନସଭା ଆରମ୍ଭରୁ ହଟ୍ଟଗୋଳ। ତୃତୀୟ ଦିନରେ ଗୃହ ଅଚଳ। ଧାନମଣ୍ଡି ସମସ୍ୟା, କଟନୀ ଛଟନୀ, ଚାଷୀ ମାରଣ ନୀତିକୁ ନେଇ ବିଧାନସଭା ହୁଲୁସ୍ତୁଲୁ। ପ୍ରଶ୍ନକାଳରେ ପ୍ଲାକାର୍ଡ ଧରି ବିରୋଧୀଙ୍କ ହଙ୍ଗାମା। ବିଜେଡି ଓ କଂଗ୍ରେସ ସଦସ୍ୟମାନେ ଧାନର ଅଭାବୀ ବିକ୍ରିକୁ ନେଇ ଗୃହ ମଧ୍ୟରେ ଜୋରଦାର ହଟଗୋଳ କରିବା ଯୋଗୁଁ ଆଜି ବି ବିଧାନସଭାରେ ପୂର୍ବାହ୍ନରେ କୌଣସି କାର୍ଯ୍ୟ ହୋଇପାରି ନାହିଁ। ପ୍ରଶ୍ନକାଳ ଓ ଶୂନ୍ୟକାଳରେ ଦୁଇ ବିରୋଧିଦଳ ଗୃହ ମଧ୍ୟରେ ବ୍ୟାନର ଓ ପୋଷ୍ଟର ପ୍ରଦର୍ଶନ କରିବା ସହିତ ସରକାର ବିରୋଧି ଧ୍ୱନିମାନ ଦେଇଥିବାରୁ ଗୃହକାର୍ଯ୍ୟ ବାଧାପ୍ରାପ୍ତ ହୋଇଛି ।
ଆଜି ପ୍ରଶ୍ନକାଳ ଆରମ୍ଭ ମାତ୍ରେ ଉଭୟ ବିଜେଡି ଓ କଂଗ୍ରେସର ସଦସ୍ୟମାନେ ହାତରେ ପୋଷ୍ଟର, ବ୍ୟାନର ଆଦି ଧର ଗୃହ ମଧ୍ୟକୁ ଆସିଥିଲେ । ଧାନର ଅଭାବି ବିକ୍ରି ନେଇ ସେମାନେ ବିଭିନ୍ନ ଧ୍ୱନିମାନ ଦେଉଥିବାବେଳେ ବାଚସ୍ପତି ସୁରମା ପାଢୀ ବିଧାୟିକା ସଞ୍ଜଳି ମୁର୍ମୁଙ୍କ ପ୍ରଶ୍ନର ଉତ୍ତର ଦେବାପାଇଁ ସଂସଦୀୟ ବ୍ୟାପାର ମନ୍ତ୍ରୀ ମୁକେଶ ମହାଲିଙ୍ଗଙ୍କୁ ଡାକିଥିଲେ । ଗୃହରେ ପ୍ରବଳ ହଟଗୋଳ ଯୋଗୁଁ ମନ୍ତ୍ରୀ ଦେଉଥିବା ଉତ୍ତର ଶୁଣାଯାଇନଥିଲା । ବାଚସ୍ପତି ଶ୍ରୀମତୀ ପାଢୀ ସଦସ୍ୟମାନଙ୍କୁ ନିଜ ନିଜ ଆସନକୁ ଫେରି ପ୍ରଶ୍ନତ୍ତୋର କାର୍ଯ୍ୟକ୍ରମରେ ଅଂଶଗ୍ରହଣ ପାଇଁ ବାରମ୍ବାର ଅନୁରୋଧ କରିଥିଲେ ମଧ୍ୟ ତାହାକୁ ବିରୋଧି ସଦସ୍ୟମାନେ ଶୁଣନଥିଲେ । ହଟଗୋଳ ଯୋଗୁଁ ବାଚସ୍ପତି ଗୃହକୁ ପ୍ରଥମେ ୧୧ଟା ୩୦ ପର୍ଯ୍ୟନ୍ତ ମୁଲତବି ଘୋଷଣା କରିଥିଲେ ।
ପୁର୍ନବାର ଗୃହକାର୍ଯ୍ୟ ଆରମ୍ଭ ମାତ୍ରେ ବିଜେଡି ଓ କଂଗ୍ରେସ ସଦସ୍ୟମାନେ ପୂର୍ବଭଳି ଗୃହ ମଧ୍ୟରେ ବିରୋଧ ପ୍ରଦର୍ଶନ କରିଥିଲେ । ତେବେ ହଟଗୋଳ ମଧ୍ୟରେ ଶୂନ୍ୟକାଳରେ ଚାରି ଜଣ ମଧ୍ୟ ବିଧାୟକ କହିବାର ସୁଯୋଗ ପାଇଥିଲେ । ବିଜେପି ବିଧାୟକ ଜଲେନ ନାୟକ ପିଇବା ପାଣି ପ୍ରସଙ୍ଗ ଉଠାଇଥିବାବେଳେ ମନୋ ରଞ୍ଜନ ଦ୍ୟାନ ସମାନ୍ତ ରାୟ ଶିକ୍ଷକ ନଯୁକ୍ତି ପ୍ରସଙ୍ଗ ଉଠାଇ ପାଠ ପଢାଇବାପାଇଁ ଅବସରପ୍ରାପ୍ତ ଶିକ୍ଷକ ବି ମିଳୁନଥିବା କହିଥିଲେ । ବିଜେପି ବିଧାୟକ ଦୁଷ୍ମନ୍ତ ସ୍ୱାଇଁ ନୀଳମାଧମ ମନ୍ଦିରର ବିକାଶ ପ୍ରତି ସରକାର ଧ୍ୟାନ ଦେବାକୁ କହିଥିଲେ।
ବିଜେପି ବିଧାୟକ ଅମରେନ୍ଦ୍ର ଦାସ କହିଥିଲେ ଯେ ଜଗତ୍ସିଂହପୁର ଜିଲ୍ଲାରେ ବାଲିଘାଟ ସଂଖ୍ୟା ୧୬ରୁ ବଢି ୨୭ରେ ପହଞ୍ଚିଥିବାବେଳେ ଟେଣ୍ଡର ବାବଦ ଅର୍ଥ ଆଦାୟ ହୋଇପାରୁ ନାହିଁ । ଲିଜ୍ଧାରୀମାନେ ୧୮ ପ୍ରତିଶତ ଜିଏସ୍ଟି ବି ଦେଉନାହାନ୍ତି । ନିଲାମଧାରୀଙ୍କ ଉପରେ ଟଙ୍କା ପଡି ରହୁଛି । ଅନ୍ୟ ପକ୍ଷରେ ବାଲି ପରିବହନ ଯୋଗୁଁ ରାସ୍ତାଘାଟ ଓ ପୋଲ ଆଦି ଖରାପ ହେବାରେ ଲାଗିଛି । ସରକାର ଏହା ଉପରେ ଦୃଷ୍ଟି ଦେବାକୁ ଶ୍ରୀ ଦାସ ଦାବି କରିଥିଲେ । ବାଚସ୍ପତିଙ୍କ ବାରମ୍ବାର ଅନୁରୋଧ ସତ୍ୱେ ହଟଗୋଳ ଜାରି ରହିବାରୁ ବାଚସ୍ପତି ସୁରମା ପାଢୀ ଗୃହକୁ ଅପରାହ୍ନ ୪ଟି ପର୍ଯ୍ୟନ୍ତ ମୁଲତବୀ ଘୋଷଣା କରିଥିଲେ ।
