ଭୁବନେଶ୍ବର: ବିଜେଡି ନେତା ଭିକେ ପାଣ୍ଡିଆନ ଆଜି ବଲାଙ୍ଗୀର ଜିଲ୍ଲା ଟିଟିଲାଗଡ, କଣ୍ଟାବାଞ୍ଜି ଓ ପାଟଣାଗଡ଼ରେ ନିର୍ବାଚନୀ ପ୍ରଚାର କରିଛନ୍ତି। ପ୍ରଚାର କରିବା ସହ ଦଳୀୟ ପ୍ରାର୍ଥୀଙ୍କ ପାଇଁ ଭୋଟ ମାଗିଛନ୍ତି। ପ୍ରଚାର ଆଳରେ ସେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଟାର୍ଗେଟ କରିଥିବା ବିଜେପି ରାଷ୍ଟ୍ରୀୟ ଅଧ୍ୟକ୍ଷଙ୍କୁ କଣ୍ଟାବାଞ୍ଜିରୁ ଜବାବ ଦେଇଛନ୍ତି। ସେ କହିଛନ୍ତି, ଯଦି ବିରୋଧୀ ନବୀନଙ୍କୁ ସ୍ୱଚ୍ଛ କହୁନାହାନ୍ତି ତେବେ ଏମାନେ ସ୍ୱଚ୍ଛତାର ଅର୍ଥ ଜାଣିନାହାନ୍ତି। ମୁଖ୍ଯମନ୍ତ୍ରୀ ସୂର୍ଯ୍ୟ ପରି ସ୍ବଚ୍ଛ । ତାଙ୍କ ସ୍ବଚ୍ଛତା ନେଇ ପ୍ରଶ୍ନ କରିବା ସୂର୍ଯ୍ୟଙ୍କୁ ଟର୍ଚ୍ଚ ଦେଖାଇବା ସହ ସମାନ । ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେ.ପି. ନଡ୍ଡାଙ୍କୁ ବରିଷ୍ଠ ବିଜେଡି ନେତା କାର୍ତ୍ତିକ ପାଣ୍ଡିଆନ ଏମିତି ଢଙ୍ଗରେ ଦେଇଛନ୍ତି କଡ଼ା ଜବାବ । ବଲାଙ୍ଗୀରର ବିଭିନ୍ନ ନିର୍ବାଚନୀ ସଭାରେ ଯୋଗଦେଇ ସେ କହିଛନ୍ତି- ନିର୍ବାଚନ ଆସିଲେ ବିଜେପିର ମାଳମାଳ ମୁଖ୍ୟମନ୍ତ୍ରୀ ଓ କେନ୍ଦ୍ରମନ୍ତ୍ରୀ ପର୍ଯ୍ୟଟକଙ୍କ ଭଳି ପ୍ରଚାରକୁ ଆସି ଲୋକଙ୍କୁ ମିଛ କହୁଛନ୍ତି । ମାତ୍ର ଭୋଟର ଏହାର ଜବାବ ଦେବେ ।
ମୋତେ ଏବେ କୁହାଗଲା ବିଜେପି ଦଳର ରଷ୍ଟ୍ରୀୟ ଅଧ୍ୟକ୍ଷ କହୁଛନ୍ତି ସ୍ୱଚ୍ଛ ମୁଖ୍ୟମନ୍ତ୍ରୀ ଦେବେ, ନବୀନ ପଟ୍ଟନାୟକଙ୍କ ସ୍ୱଚ୍ଛତା ନାହିଁ। ଯଦି ନବୀନ ସ୍ୱଚ୍ଛ ନାହାନ୍ତି। ତେବେ ସେମାନେ ସ୍ୱଚ୍ଛତାର ଅର୍ଥ ଜାଣିନାହାନ୍ତି। ସେମାନେ ଚେଷ୍ଟା କରୁଛନ୍ତି ସୂର୍ଯ୍ୟକୁ ଟର୍ଚ୍ଚ ଲାଇଟ ପକାଇବାକୁ। ନବୀନ ସୂର୍ଯ୍ୟଙ୍କ ଭଳି ସ୍ୱଚ୍ଛ ହେଲେ ସେମାନଙ୍କର ହିଁ ସ୍ୱଚ୍ଛତା ନାହିଁ। ତାଙ୍କ ପ୍ରାର୍ଥୀମାନଙ୍କ ନାଁରେ କ୍ରିମିନଲା କେସ ଅଛି। ଏମିତି ଲୋକଙ୍କୁ ପ୍ରାର୍ଥୀ କରି ଏମାନେ ନବୀନଙ୍କୁ ସ୍ୱଚ୍ଛତା ଶିଖାଇବେ। ଏମାନେ ବାହାରୁ ଆସି ବଡ଼ବଡ଼ କଥା କହୁଛନ୍ତି ଆମ ମୁଖ୍ୟମନ୍ତ୍ରୀଙ୍କୁ ଅସମ୍ମାନ କରୁଛନ୍ତି। ଏମାନଙ୍କୁ ଆପଣ ୨୦ ତାରିଖରେ ଉଚିତ ଜବାବ ଦେବେ।
ବିଜେପିର ବଡ଼ବଡ଼ ନେତାମାନେ ଓଡିଶା ଆସୁଛନ୍ତି। ବିଭିନ୍ନ ରାଜ୍ୟର ମୁଖ୍ୟମନ୍ତ୍ରୀମାନେ ବି ଆସୁଛନ୍ତି। କିଏ କିଏ ଓଡ଼ିଶାରେ ବୁଲୁଛନ୍ତି କାହାର ହିସାବ ନାହିଁ। ଏମାନେ ଓଡ଼ିଶା କେଉଁଠି ଅଛି ଜାଣିନାହାନ୍ତି। ଓଡିଶାବାସୀଙ୍କୁ ଜାଣିନାହାନ୍ତି। ଓଡ଼ିଶା ଉପରେ ସେମାନଙ୍କର କିଛି ତଥ୍ୟ ନାହିଁ। ଏମାନେ ସବୁ ପର୍ଯ୍ୟଟକ ଭଳି ଆସିବେ। ଅପପ୍ରଚାର କରିବେ, ବଡବଡ କଥା କହିବେ। ନିର୍ବାଚନ ସରିଲେ ଖୋଜିଲେ ବି ଆଉ ପାଇବେନି ।
କଣ୍ଟାବାଞ୍ଜିରେ ନିର୍ବାଚନ ପ୍ରଚାର ବେଳେ ପାଣ୍ଡିଆନ କହିଛନ୍ତି- ବିଜେପିରେ ବେଲରେ ଆସିଥିବା ନେତା ଓ ଦୋଷୀ ସାବ୍ୟସ୍ତ ନେତା ପ୍ରାର୍ଥୀ ହୋଇଛନ୍ତି । ୨୦୧୪ ଓ ୨୦୧୯ରେ ବିଜେପି ଦରଦାମ କମାଇବାକୁ ପ୍ରତିଶ୍ରୁତି ଦେଇଥିଲା, ଏଯାଏଁ ପୂରଣ ହେଲାନି । ନିର୍ବାଚନ ଆସିଲେ ବିଜେପିର ମାଳମାଳ ମୁଖ୍ୟମନ୍ତ୍ରୀ ଓ କେନ୍ଦ୍ରମନ୍ତ୍ରୀ ପର୍ଯ୍ୟଟକଙ୍କ ଭଳି ପ୍ରଚାରକୁ ଆସି ଲୋକଙ୍କୁ ମିଛ କହୁଛନ୍ତି । ମୁଖ୍ୟମନ୍ତ୍ରୀ କଣ୍ଟାବାଞ୍ଜିର ବିକାଶ ପାଇଁ ଏହି ଆସନରୁ ପ୍ରାର୍ଥୀ ହୋଇଛନ୍ତି । କଣ୍ଟାବାଞ୍ଜିକୁ ମୁଖ୍ଯମନ୍ତ୍ରୀ ଏକ ନମ୍ବର ନିର୍ବାଚନ ମଣ୍ଡଳୀରେ ପରିଣତ କରିବେ ।
ନିର୍ବାଚନ ସମୟରେ ବାହାର ରାଜ୍ଯର ନେତା, ମନ୍ତ୍ରୀ ଓଡ଼ିଶା ଆସି ବଡ଼ ବଡ଼ କଥା କହୁଛନ୍ତି । ଛତିଶଗଡ଼ରୁ ମନ୍ତ୍ରୀମାନେ ଆସି ଟଙ୍କା ବାଣ୍ଟୁଛନ୍ତି । ମୁଖ୍ଯମନ୍ତ୍ରୀ ନବୀନ ପଟ୍ଟନାୟକଙ୍କୁ ଅଶାଳୀନ ବ୍ଯବହାର କରୁଛନ୍ତି । ମାତ୍ର ଏହାର ଜବାବ ରାଜ୍ଯବାସୀ ଦେବେ ବୋଲି ପାଣ୍ଡିଆନ କହିଛନ୍ତି । ଟିଟିଲାଗଡରେ ଆୟୋଜିତ ନିର୍ବାଚନ ପ୍ରଚାର ସଭାରେ ଯୋଗଦେଇ ସେ କହିଛନ୍ତି- ତୁଷୁରାରେ ଥିବା ମାଆ ସମଲେଇ ମନ୍ଦିରର ରୂପାନ୍ତରଣ ସହ ବଡ଼ ଜଳସେଚନ ପ୍ରକଳ୍ପ ହୋଇଛି । ବିଜେଡି ଛଡା ଆଉ ଯିଏ ଜିତିବ ସିଏ ଟିଟିଲାଗଡ଼ ନିର୍ବାଚନମଣ୍ଡଳୀ ୨୦ରୁ ୩୦ ବର୍ଷ ପଛକୁ ନେଇଯିବ ।
ନିର୍ବାଚନ ସମୟରେ ବିରୋଧୀ ଦଳର ନେତା ଓ ବାହାର ରାଜ୍ୟର ମୁଖ୍ୟମନ୍ତ୍ରୀମାନେ ଆସୁଛନ୍ତି । ହେଲେ ସେମାନେ ଓଡିଶା କେଉଁଠି ଜାଣନ୍ତି ନାହିଁ କି ଓଡିଶାବାସୀଙ୍କୁ ଜାଣନ୍ତିନି । ପର୍ଯ୍ୟଟକ ଭଳି ଆସି ମିଛ କଥା କହି ପଳାଇବେ । ସେମାନଙ୍କ ପ୍ରତିଶ୍ରୁତିକୁ ବିଶ୍ବାସ କରନ୍ତୁନି ବୋଲି ପାଟଣାଗଡରେ କହିଛନ୍ତି ପାଣ୍ଡିଆନ। ହରିଶଙ୍କର ମନ୍ଦିରର ରୂପାନ୍ତରଣ ପାଇଁ ୨୮ କୋଟି, ବାଇପାସ ଲାଗି ୧୫୦ କୋଟି ଟଙ୍କା ଦିଆଯାଇଛି ବୋଲି ସେ କହିଛନ୍ତି । ବିଜେଡିର ଭରପୂର ନିର୍ବାଚନୀ ସଭା ଦେଖି ଛାନିଆ ହୋଇଛନ୍ତି ବିରୋଧୀ । ବିକାଶ ଧାରାକୁ କରିପାରୁନାହାନ୍ତି ଚ୍ୟାଲେଞ୍ଜ
