ଘୋଡ଼ା ବେପାର ନେଇ ପରସ୍ପରକୁ କଲେ ଆକ୍ଷେପ
ଭୁବନେଶ୍ଵର: ଦିନକ ପରେ ରାଜ୍ୟସଭା ନିର୍ବାଚନ। ଆରୋପ-ପ୍ରତ୍ୟାରୋପରେ ଉଠୁଛି ପଡୁଛି ରାଜ୍ୟ ରାଜନୀତି। ସମୟ ଯେତିକି ଗଡ଼ୁଛି ନେତାଙ୍କ ଛାତିକି ସେତିକି ଧଡ଼ଧଡ଼ ହେଉଛି। ବିଧାୟକ ଲକ୍ଷ୍ମଣରେଖା ଡେଇଁବେନି ତ… ? କ୍ରସ୍ ଭୋଟିଂ ହେବନି ତ… ? ଏହି ଭୟରେ ଦଳମାନେ ହ୍ଵିପ୍ ଜାରି କରିଛନ୍ତି। ଏହି ମଧ୍ୟରେ ବିଜେଡି ସୁପ୍ରିମୋ ବଡ଼ ବୟାନ ଦେଇଛନ୍ତି। ସେ କହିଛନ୍ତି ବିଜେପି ଘୋଡ଼ା ବେପାର କରୁଛି। ବିଜେପି ପ୍ରାର୍ଥୀମାନେ ଘୋଡ଼ା ବେପାର ଚେଷ୍ଟା ଜାରି ରଖିଛନ୍ତି । ଗଣତାନ୍ତ୍ରିକ ବ୍ୟବସ୍ଥାରେ ଏହା ଏକ ଅପରାଧ । ରାଜ୍ୟ ସଭା ନିର୍ବାଚନ ନେଇ ବିଧାନସଭାରେ ବିଜେଡିର ମକ ପୋଲିଂ ଚାଲିଛି। ଆଜି ସନ୍ଧ୍ୟାରେ ନବୀନ ନିବାସରେ ବିଜେଡି ବିଧାୟକମାନଙ୍କର ଏକ ବଡ଼ଧରଣର ବୈଠକ ରହିଛି। ସନ୍ଧ୍ୟା ୫.୩୦ରେ ବିଜେଡି ସଭାପତି ନବୀନ ପଟ୍ଟନାୟକ ପ୍ରଶିକ୍ଷଣ ଦେବେ। ରାଜ୍ୟ ସଭା ନିର୍ବାଚନ ପରିଚାଳନା ଉପରେ ନବୀନ ପଟ୍ଟନାୟକ ଗୁରୁତ୍ୱ ଦେବେ। ବିଜେଡି ବିଧାୟକମାନେ ଯୋଗ ଦେଇ ନିର୍ବାଚନ ପ୍ରକ୍ରିୟା ବାବଦରେ ବୁଝିବେ।
ନବୀନଙ୍କ ଏଭଳି ପ୍ରତିକ୍ରିୟା ପରେ ବିଜେପି ବିଧାୟକ ଜୟନାରାୟଣ ମିଶ୍ର ପାଲଟା ଆକ୍ଷେପ କରିଛନ୍ତି। ଜୟନାରାୟଣ କହିଛନ୍ତି ଯେ, ଆମର ନୁହେଁ ନବୀନଙ୍କର ଘୋଡ଼ା ବେପାର ଅଭିଜ୍ଞତା ଅଛି। ନବୀନ ବାବୁ ମୁଖ୍ୟମନ୍ତ୍ରୀ ଥିବାବେଳେ ତାଙ୍କର ଘୋଡା ବେପାରର ଅଭିଜ୍ଞତା ଅଛି। କାମଳ ରୋଗୀଙ୍କୁ ସବୁ ହଳଦିଆ ଦେଖାଯାଏ। ଆମେ ଘୋଡା ବେପାର କରୁନାହୁଁ। ସେମାନେ ଆମକୁ ଭୋଟ ଦେଉଛନ୍ତି ଆମେ ନେଉଛୁ। ଆମେ କେବଳ ବିବେକାନୁମୋଦିତ ଭୋଟ୍ ମାଗିଛୁ। ଏପରି ମନ୍ତବ୍ୟ ଦେଇ ନବୀନ ସ୍ଵୀକାର କରିଦେଲେ ଯେ ସେ ହାରି ସାରିଲେଣି। ବିଜେଡି ହେଉଛି ବୁଡ଼ିଲା ଡଙ୍ଗା, ସେ ଡଙ୍ଗାରେ କିଏ ବସିବ ? ବୋଲି ଜୟ ପ୍ରଶ୍ନ କରିଛନ୍ତି।.
ସୂଚନା ଥାଉକି, ସୋମବାର ରାଜ୍ୟସଭାର ୪ ଆସନ ପାଇଁ ହେବ ମତଦାନ । ସବୁ ଦଳ, ୫ ପ୍ରାର୍ଥୀ ପୂରା ଦମ୍ ଲଗାଇ ଲାଗି ପଡ଼ିଛନ୍ତି । ବିଶେଷ କରି ଚତୁର୍ଥ ଆସନକୁ ନେଇ ଜୋରଦାର କସରତ ଚାଲିଛି। ବିରୋଧୀ ଦଳ ବିଜେଡି ଓ କଂଗ୍ରେସ ନିଜ ବିଧାୟକଙ୍କୁ ଏକାଠି ରଖିବାକୁ ସବୁ ପ୍ରକାର ଉଦ୍ୟମ ଜାରି ରଖିଛନ୍ତି । ବିଧାୟକଙ୍କୁ ଏକାଠି ରଖିବାକୁ ବିଜେଡି ପାଠଶାଳ ଆୟୋଜନ କରିଥିବା ବେଳେ ବିଜେପି ନିଜ ବିଧାୟକଙ୍କୁ ରିସୋର୍ଟରେ ରଖିଛି। ଏହା ପଛରେ ସବୁ ଦଳର ଗୋଟିଏ ଲକ୍ଷ୍ୟ, କେମିତି ବିଧାୟକମାନେ ବିରୋଧୀଙ୍କ ଦ୍ୱାରା ପ୍ରଭାବିତ ନହୁଅନ୍ତୁ। ହେଲେ ଘଡ଼ିକେ ଏଠି ଘୋଡ଼ା ଛୁଟୁଛି । ଆଗକୁ କଣ ହେବ ତାହା ସମୟ କହିବ।
