ଝାରସୁଗୁଡ଼ା, ୧୬/୮(ଆଶିଷ ରଞ୍ଜନ ଦାଶ)ଝାରସୁଗୁଡ଼ା ଜିଲ୍ଲା ଲଖନପୁର ତହସିଲ ଅନ୍ତର୍ଗତ ବଞ୍ଜାରୀ ଓ କୁଡ଼ାଲୋଇ ମୌଜାରେ କୁଡ଼ାଲୋଇ (ଏ) ଉତ୍ତର କୋଇଲା ଖଣି ପ୍ରକଳ୍ପ ପାଇଁ ଜମି ଅଧିଗ୍ରହଣ ପ୍ରକ୍ରିୟାକୁ ନେଇ ସ୍ଥାନୀୟ ଅଞ୍ଚଳରେ ଅସନ୍ତୋଷ ପ୍ରକାଶ ପାଇଛି। ପ୍ରଶାସନିକ ଚିଠି ଏବଂ ଗ୍ରାମ ପଞ୍ଚାୟତ ଦ୍ବାରା ଜାରି ନୋଟିସ ମଧ୍ୟରେ ଥିବା ତାଳମେଳ ନ ରହୁଥିବା କୁ ନେଇ କ୍ଷତିଗ୍ରସ୍ତ ଜମିମାଲିକ ଓ ଗ୍ରାମବାସୀ ପ୍ରଶ୍ନ ଉଠାଇଛନ୍ତି।ଅତିରିକ୍ତ ଜିଲ୍ଲାପାଳ (ରାଜସ୍ବ) ଙ୍କ ପତ୍ର ସଂଖ୍ୟା ୨୦୫/୨୦୨୬ ଏବଂ ଲଖନପୁର ବିଡ଼ିଓ ଙ୍କ ପତ୍ର ସଂଖ୍ୟା ୨୪୧୨/୨୦୨୬ ଅନୁଯାୟୀ,ଆରଏଫସିଟିଏଲଏଆରଆର ଆକ୍ଟ ୨୦୧୩ ର ଧାରା ୧୧(୨) ଅନୁସାରେ ଆସନ୍ତା ୨୦ ଅଗଷ୍ଟ ୨୦୨୬ ସୁଦ୍ଧା ଗ୍ରାମସଭା ଡାକିବାକୁ ନିର୍ଦ୍ଦେଶ ଥିଲା। କିନ୍ତୁ କୁଡ଼ାଲୋଇ ଗ୍ରାମ ପଞ୍ଚାୟତ ନୋଟିସ ନମ୍ବର ୩୮/୨୦୨୬ ଓ ବଞ୍ଜାରୀ ଗ୍ରାମପଞ୍ଚାୟତ ର ନୋଟିସ ନମ୍ବର ୮୧/୨୦୨୬ ଅନୁସାରେ ଅଗଷ୍ଟ ୧୮ ତାରିଖରେ ହେବାକୁ ଥିବା ବୈଠକ ନୋଟିସରେ ଗ୍ରାମସଭା ଶବ୍ଦର ସ୍ପଷ୍ଟ ଉଲ୍ଲେଖ ନାହିଁ। ଦୀର୍ଘ ୧୭ ଦିନ ପରେ ବୈଠକ ରଖାଯିବା ସହ ପୂର୍ବରୁ ଆବଶ୍ୟକୀୟ ଲୋକ ସଚେତନତା କରାନଯିବା ଆଇନଗତ ନିୟମାବଳୀର ଉଲ୍ଲଂଘନ ବୋଲି ଗ୍ରାମବାସୀ ଅଭିଯୋଗ କରିଛନ୍ତି।ବର୍ତ୍ତମାନ ବର୍ଷା ଦିନ ଥିବାରୁ ଚାଷୀ, ଭାଗଚାଷୀ ଓ କୃଷି ଶ୍ରମିକମାନେ ବିଲରେ ତଳି ରୋପଣ ଓ ସୁଆଡ଼ି କାର୍ଯ୍ୟରେ ବ୍ୟସ୍ତ ଅଛନ୍ତି। ଏହି ସମୟରେ ବୈଠକ କଲେ ଅଧିକାଂଶ ଚାଷୀ ଯୋଗ ଦେଇପାରିବେ ନାହିଁ, ଯାହା ସେମାନଙ୍କ ଗଣତାନ୍ତ୍ରିକ ଆପତ୍ତି ଜଣାଇବାର ଅଧିକାରକୁ କ୍ଷୁଣ୍ଣ କରିବ।ଏ ଦୁଇ ଗ୍ରାମପଞ୍ଚାୟତ ବାସୀ ଆସନ୍ତା ଅଗଷ୍ଟ ୧୮ ତାରିଖର ନୋଟିସକୁ ତୁରନ୍ତ ବାତିଲ କରାଯାଉ।ଚାଷ କାର୍ଯ୍ୟ ସମ୍ପୂର୍ଣ୍ଣ ସରିବା ପର୍ଯ୍ୟନ୍ତ ଧାରା ୧୧(୧) ଅଧୀନରେ ହେବାକୁ ଥିବା ସମସ୍ତ ଗ୍ରାମସଭା ଓ ଜମି ଅଧିଗ୍ରହଣ ପ୍ରକ୍ରିୟାକୁ ସ୍ଥଗିତ ରଖାଯାଉ।ଭବିଷ୍ୟତରେ ପ୍ରଭାବିତ ପଡ଼ା କିମ୍ବା ୱାର୍ଡ ସ୍ତରରେ ଯଥେଷ୍ଟ ପ୍ରଚାର ପ୍ରସାର ସହ ନୂତନ ଗ୍ରାମସଭା କରିବା ଦାବି କରିଛନ୍ତି |ଏହି ସମସ୍ୟା ନେଇ ଆସନ୍ତା ସପ୍ତାହରେ ଜିଲ୍ଲାପାଳ, ଅତିରିକ୍ତ ଜିଲ୍ଲାପାଳ, ଲଖନପୁର ବିଡ଼ିଓ ଓ ଜନପ୍ରତିନିଧିଙ୍କୁ ଦାବୀପତ୍ର ପ୍ରଦାନ କରାଯିବ ବୋଲି କୁଡ଼ାଲୋଇ ଏବଂ ଵଞ୍ଜାରୀ ଗ୍ରାମପଞ୍ଚାୟତ ର ଜନସାଧାରଣ ପ୍ରସ୍ତୁତି ଚଳାଇଛନ୍ତି । ଏ ସମ୍ପର୍କରେ ଲଖନପୁର ବିଡ଼ିଓ ବିନୟ କୁମାର ପଟେଲଙ୍କ ପ୍ରତିକ୍ରିୟା ପାଇଁ ଯୋଗାଯୋଗ କରାଯାଇଥିଲେ ବି ସେ ଫୋନ୍ ଗ୍ରହଣ କରିନଥିଲେ।
