ନେପାଳ ଜଳପ୍ରଳୟରେ ବଢ଼ିଚାଲିଛି ମୃତ୍ୟୁ ସଂଖ୍ୟା ।ଏବେ ମୃତ୍ୟୁସଂଖ୍ୟା ୫ଶହ ଟପିଥିବା ବେଳେ, ଶହ ଶହ ଲୋକ ନିଖୋଜ ଅଛନ୍ତି । ସେମାନଙ୍କ ମଧ୍ୟରେ ୪ଶହରୁ ଅଧିକ ଭାରତୀୟ ନାଗରିକ ଓ ଭାରତୀୟ ମୂଳ ରହିଛନ୍ତି । ଗ୍ରାଉଣ୍ଡ ଜିରୋର ସ୍ଥିତି ଯାହା, ତାକୁ ଭାଷାରେ ବଖାଣିବା କଷ୍ଟ । କେଉଁଠି ମାଟି ତଳୁ ଜୀବନ ଖୋଜା ଚାଲିଛି, ଆଉ କେଉଁଠି ଶୁଭୁଛି କାନ୍ଦ ବୋବାଳି ।
୨ ଦିନ ତଳର ନଦୀ ଅବବାହିକା, ଏବେ ମୃତ୍ୟୁର ଉପତ୍ୟକା । ମାଟିମଟାଳ ଘରଦ୍ୱାର.. ମଶାଣି ପାଲଟିଛି ଜନବସତି । ବହୁ ଘର ମାଟିରେ ମିଶିଯାଇଛି, ଲୁଚିଯାଇଛି, ହଜିଯାଇଛି । ଆଉ ଯେଉଁ କୋଠା ଏବେ ବି ଝଡ଼ ପରର ବରଗଛ ଭଳି ଥୁଣ୍ଟା ହୋଇ ଅନାଇ ରହିଛି, ସେଠି ଏବେ ୨-୩ ମହଲା ଯାଏଁ ଜମି ରହିଛି ପଙ୍କ କାଦୁଅ । ଆଉ ସେଇ ମାଟି ତଳୁ ଚାଲିଛି ମଣିଷ ଖୋଜା । କାଳେ କାହା ପିଣ୍ଡରେ ପ୍ରାଣ ଟିକେ ରହିଯାଇଥିବ, କାଳେ କାହାକୁ ମୃତ୍ୟୁର ଆଁରୁ ଟାଣି ଆଣି ହେବ, ସେଇ ଆଶା ନେଇ ଜେସିବିରେ ମାଟି ଖୋଳୁଛନ୍ତି ଦେବଦୂତ । ହେଲେ ମାଟି କାଦୁଅ ତଳୁ କଣ ମିଳୁଛି ଜାଣିଛନ୍ତି? ମାଳ ମାଳ ଶବ… ଖଣ୍ଡ ବିଖଣ୍ଡିତ ଅଙ୍ଗ ପ୍ରତ୍ୟଙ୍ଗ । ଅନେକଙ୍କୁ ଚିହ୍ନିବା କଷ୍ଟ… ଆଉ ଯେଉଁମାନଙ୍କୁ ଚିହ୍ନଟ କରି ହେଉଛି, କାନ୍ଥରେ ସେମାନଙ୍କ ନାଁର ତାଲିକା ମରାଯାଉଛି । ଆଉ ମୃତକଙ୍କ ତାଲିକାରେ ନିଜ ଲୋକଙ୍କ ନାଁ ଦେଖିବା ପରେ, ସ୍ଥିତି ଯାହା ହେଉଥିବ, ଆପଣ ବୁଝିପାରୁଥିବେ ।
ସମୟ ଗଡ଼ୁଛି… ସଂଖ୍ୟା ବଢ଼ୁଛି… ଶଙ୍କା ବଢ଼ୁଛି । ନେପାଳ ବିପର୍ୟ୍ୟୟରେ ମୃତ୍ୟୁସଂଖ୍ୟା ୫ଶହ ଟପିଛି । ନିଖୋଜ ବ୍ୟକ୍ତିଙ୍କ ମଧ୍ୟରେ ୩୨୦ ଭାରତୀୟ ଅଛନ୍ତି । ମାନସରୋବର ଯାତ୍ରାରେ ଯାଇଥିବା ୧୦୦ ଜଣ ଭାରତୀୟ ମୂଳଙ୍କ ପତ୍ତା ମିଳୁନି । ଏସବୁ ଭିତରେ ସାମ୍ନାକୁ ଆସୁଛି ପ୍ରଳୟ ବେଳର ଏକରୁ ବଳି ଆରେକ ଛାତିଥରା ଚିତ୍ର । ଯେଉଁମାନେ ମୃତ୍ୟୁକୁ ଆଖି ସାମ୍ନାରେ ଦେଖିଥିଲେ, ଯେଉଁମାନେ ଯମ ସହ ମୁହାଁମୁହିଁ ହୋଇଥିଲେ, ସେମାନେ କଏଦ କରିଥିବା ଦୃଶ୍ୟ ଗୁଡ଼ିକୁ ଯିଏ ଦେଖୁଛି ତଟସ୍ଥ ହୋଇଯାଉଛି । କେଉଁଠି ଗାଁକୁ ଗିଳୁଛି ବନ୍ୟା, ଆଉ କେଉଁଠି ବିରାଟକାୟ ପଥରକୁ ଭସାଇ ନେଉଛି ପାଣି ।
ସୋସିଆଲ ମିଡିଆରେ ଭାଇରାଲ୍ ହେଉଛି ଆଉ ଏକ ଭୟଙ୍କର ଭିଡିଓ । ପ୍ରଳୟ ପଂଝାରେ ଏମିତି ଫସିଥିଲା କିଛି ନିରୀହ ଜୀବନ । ଘର ଚାରିପଟେ ଚାଲିଥିଲା ବନ୍ୟାର ତାଣ୍ଡବ । ଆଉ ବାଲକୋନିରେ ଜୀବନର ଭିକ ମାଗୁଥିଲେ ଏକ ପରିବାର । କଥାରେ ଅଛି, ଯାହାକୁ ରଖିବେ ଅନନ୍ତ, କି କରିପାରେ ବଳବନ୍ତ । ବନ୍ୟା ଥମିବା ବେଳକୁ ସବୁକିଛି ଛାରଖାର ହୋଇସାରିଥିଲା । ହେଲେ ଠିଆ ହୋଇରହିଥିଲା ସେଇ ଗୋଟିଏ ଘର । ବିନାଶକାରୀ ବନ୍ୟାରେ ଛାରଖାର ହୋଇଯାଇଥିବା ନେପାଳର ପ୍ରଭାବିତ ଅଞ୍ଚଳ ଗୁଡ଼ିକୁ ସ୍ୱାଭାବିକ ସ୍ଥିତିକୁ ଆସିବାକୁ ଯୁଗଟିଏ ଲାଗିଯିବ ।
