ନୂଆଦିଲ୍ଳୀ: ସଂସଦର କେନ୍ଦ୍ରୀୟ ହଲ୍ରେ ଆଜି ବିଜେପି ନେତୃତ୍ୱାଧୀନ ନ୍ୟାସନାଲ ଡେମୋକ୍ରାଟିକ୍ ଆଲାଏନ୍ସ (ଏନଡିଏ) ବୈଠକ ଆୟୋଜିତ ହୋଇଯାଇଛି। ବୈଠକରେ ନରେନ୍ଦ୍ର ମୋଦୀଙ୍କୁ ନୂତନ ଭାବେ ନିର୍ବାଚିତ ସାଂସଦ ସେମାନଙ୍କ ନେତା ମନୋନୀତ କରିଛନ୍ତି। ତୃତୀୟ ଥର ପାଇଁ ପ୍ରଧାନମନ୍ତ୍ରୀ ଭାବରେ ଶପଥ ଗ୍ରହଣ କରିବାର ବାଟ ଫିଟିଥିବା ବେଳେ ନରେନ୍ଦ୍ର ମୋଦୀଙ୍କୁ ଏନଡିଏ ସାଂସଦଙ୍କ ନେତା ଭାବେ ମନୋନୀତ କରିବା ପାଇଁ ଏହି ସଭା ଆରମ୍ଭ ହୋଇଥିଲା। ଶୁକ୍ରବାର ସମ୍ବିଧାନ ଭବନରେ ଏନଡିଏ ସଂସଦୀୟ ଦଳର ବୈଠକ ବସିଥିଲା। ରାଜନାଥ ସିଂହ ଦଳର ବୈଠକରେ ମୋଦୀଙ୍କୁ ନେତା କରିବାର ପ୍ରସ୍ତାବ ରଖିଥିଲେ। ଯାହାକି ସର୍ବସମ୍ମତି କ୍ରମେ ପାସ୍ ହେଇଛି। ଏହି ସଂସଦୀୟ ଦଳ ବୈଠକରେ ବିଜେପିର ନବ ନିର୍ବାଚିତ ସାଂସଦଙ୍କ ସହିତ ଏନଡିଏରେ ସାମିଲ ଥିବା ବିଭିନ୍ନ ଦଳର ନେତା ସାମିଲ ଥିଲେ । ଟିଡିପି ମୁଖ୍ୟ ଚନ୍ଦ୍ରବାବୁ ନାଇଡୁ ଏବଂ ବିହାର ମୁଖ୍ୟମନ୍ତ୍ରୀ ନୀତିଶ କୁମାର ମଧ୍ୟ ଏହି ବୈଠକରେ ଯୋଗ ଦେଇଥିଲେ।
ପୂର୍ବାହ୍ନ ୧୧.୩୦ରେ ଏହି ବୈଠକ ଆୟୋଜିତ ହୋଇଥିଲା। ପୁରୁଣା ସଂସଦର ସମ୍ବିଧାନ ସଦନ ହଲ୍ରେ ମୋଦୀ- ମୋଦୀ ନାରା ଶୁଣିବାକୁ ମିଳିଥିଲା। ମୋଦୀଙ୍କ ନେତା ଭାବେ ଚ୍ରନ କରିବା ପରେ ନୀତିଶ କୁମାର ଓ ନାଇଡୁ ସେମାନଙ୍କ ବକ୍ତବ୍ୟ ଦେଇଥିଲେ। ମୋଦୀ ମଧ୍ୟ ସେଠାରେ ନଜର ମତବ୍ୟକ୍ତ କରିଥିଲେ। ଦେଶର ବିକାଶରେ ଓଡ଼ିଶା ପ୍ରମୁଖ ସ୍ଥାନ ନେବ ବୋଲି କହିଛନ୍ତି ମୋଦି । ମହାପ୍ରଭୁ ଜଗନ୍ନାଥ ହେଉଛନ୍ତି ଗରିବଙ୍କ ଦେବତା। ଓଡ଼ିଶାର ଫଳାଫଳ ବିକଶିତ ଭାରତର ସ୍ୱପ୍ନକୁ ନୂଆ ଗତି ଦେବ । ଓଡ଼ିଶାରେ କ୍ରାନ୍ତି ଆସିଛି । ଏହି କ୍ରାନ୍ତି ହିଁ ବିକାଶକୁ ନୂଆ ଦିଶା ଦେବ । ଦିନ ରାତି ପରିଶ୍ରମ କରି ଦେଶକୁ ନୂଆ ଦିଗ ଦେବାକୁ ଆହ୍ୱାନ ଦେଇଛନ୍ତି ପ୍ରଧାନମନ୍ତ୍ରୀ । ଆଗାମୀ ୨୫ ବର୍ଷ ପର୍ଯ୍ୟନ୍ତ ଦେଶର ବିକାଶ ଇଂଜିନରେ ଓଡ଼ିଶା ପ୍ରମୁଖ ସ୍ଥାନ ନେବ । ଓଡ଼ିଶା ହେବ ଦେଶର ବିକଶିତ ଇଂଜିନ ବୋଲି କହିଛନ୍ତି ପ୍ରଧାନମନ୍ତ୍ରୀ ।
ସହଯୋଗୀ ତଥା ନବନିର୍ବାଚିତ ପ୍ରାର୍ଥୀମାନଙ୍କୁ ସମ୍ବୋଧିତ କରି ନରେନ୍ଦ୍ର ମୋଦୀ କହିଛନ୍ତି ଯେ ଏନଡିଏ ବିଭିନ୍ନ ଦଳର ଏକ ଗୋଷ୍ଠୀ ନୁହେଁ, ଯାହା କ୍ଷମତା ପାଇଁ ଏକାଠି ହୋଇଛି। ‘ଦେଶକୁ ପ୍ରଥମ’ ଅଗ୍ରାଧିକାର ଦେଉଥିବା ଏହା ଏକ ମିଳିତ ମଞ୍ଚ। ସେ କହିଛନ୍ତି ଯେ ଭାରତ ଇତିହାସରେ ଏହା ହେଉଛି ସବୁଠାରୁ ସଫଳ ମିଳିତ ମଞ୍ଚ, ସମସ୍ତ ନିଷ୍ପତ୍ତି ସର୍ବସମ୍ମତ ହେବା ଆମର ଲକ୍ଷ୍ୟ ହେବ। ସେ କହିଛନ୍ତି ଯେ, ‘‘୨୦୨୪ ଲୋକସଭା ଫଳାଫଳକୁ ନେଇ ବିରୋଧ ଏନ୍ଡିଏକୁ ଥଟା କରୁଛି। ମାତ୍ର ସେମାନେ ଜାଣନ୍ତି ଯେ ଆମେ କେବେ ହାରି ନାହୁଁ। ଗ୍ରାଣ୍ଡ ପୁରୁଣା ଦଳ କଂଗ୍ରେସ ୧୦ ବର୍ଷ ପରେ ବି ୧୦୦ ଛୁଇଁ ପାରିବ ନାହିଁ। ସେ କହିଛନ୍ତି ଯେ ଗତ ତିନିଟି ଲୋକସଭା ନିର୍ବାଚନରେ ସେମାନଙ୍କର ମୋଟ ଆସନ କେବଳ ଆମର ଏହି ନିର୍ବାଚନ ତୁଳନାରେ କମ୍ ଅଟେ। ଏନଡିଏ ସଂସଦୀୟ ଦଳର ନେତା ଭାବେ ନିର୍ବାଚିତ ହେବା ପରେ ମୋଦୀ କହିଛନ୍ତି, ଏନଡିଏ ହେଉଛି ଭାରତର ସବୁଠୁ ସଫଳ ନିର୍ବାଚନ ପୂର୍ବବର୍ତ୍ତୀ ମେଣ୍ଟ । ଏଥିସହ ତାଙ୍କୁ ଏହି ମେଣ୍ଟର ନେତା ଭାବେ ନିର୍ବାଚିତ କରିଥିବାରୁ ସେ ସମସ୍ତଙ୍କୁ ଧନ୍ୟବାଦ ଦେଇଛନ୍ତି । ଏଥିସହ ନୂଆକରି ବିଜୟୀ ହେଇ ଆସିଥିବା ସାଂସଦଙ୍କୁ ଧନ୍ୟବାଦ ଦେଇଛନ୍ତି ମୋଦୀ। ଆଉ କହିଛନ୍ତି , ଏହା ତାଙ୍କର ସୌଭାଗ୍ୟ, ସର୍ବସମ୍ମତି କ୍ରମେ ତାଙ୍କୁ ନେତା ଭାବେ ନିର୍ବାଚିତ କରାଯାଇଛି ।
ଏନଡିଏକୁ ସମ୍ବୋଧିତ କରି ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ଭାରତର ମହାନ ଗଣତନ୍ତ୍ରର ଶକ୍ତି ଭାବେ ଦେଶର ୨୨ଟି ରାଜ୍ୟର ଲୋକମାନେ ଏନଡିଏକୁ ସରକାର ଗଠନ କରିବାର ସୁଯୋଗ ଦେଇଛନ୍ତି। ଆମର ଏହି ମେଣ୍ଟ ପ୍ରକୃତରେ ଭାରତର ପ୍ରାଣ ଏବଂ ମୂଳରେ ରହିଛି। ଆମ ଦେଶର ୧୦ଟି ରାଜ୍ୟରେ ଆଦିବାସୀଙ୍କ ସଂଖ୍ୟା ନିର୍ଣ୍ଣାୟକ ଅଟେ। ସେଥିମଧ୍ୟରୁ ୭ ଟି ରାଜ୍ୟରେ ଏନଡିଏ ସରକାର ଗଠନ କରାଯାଇଛି। ମୋଦୀ କହିଛନ୍ତି ସରକାର ଚଳାଇବା ପାଇଁ ସଂଖ୍ୟାଗରିଷ୍ଠତା ଆବଶ୍ୟକ। କିନ୍ତୁ ଦେଶ ଚଳାଇବା ପାଇଁ ସର୍ବସମ୍ମତି ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ସ୍ୱାଧୀନତାର ୭୫ ବର୍ଷ ମଧ୍ୟରୁ ଏନଡିଏ ତିନି ଦଶନ୍ଧି ଧରି ସରକାରରେ ରହିଆସିଛି। ଏହା ଏକ ସାଧାରଣ କଥା ନୁହେଁ । ଏନଡିଏ ପ୍ରଥମେ ଜାତୀୟତା ପ୍ରତି ପ୍ରତିଶ୍ରୁତିବଦ୍ଧ। ଅଟଳ ବିହାରୀ ବାଜପେୟୀ, ବାଲା ସାହେବ ଠାକରେ ଏବଂ ଜର୍ଜ ଫର୍ଣ୍ଣାଣ୍ଡିସଙ୍କ ପରି ଲୋକମାନଙ୍କ ଦ୍ୱାରା ବୁଣାଯାଇଥିବା ଏହି ମଞ୍ଜିକୁ ଦେଶର ଲୋକମାନେ ଜଳସେଚନ କରି ଏକ ବଡ଼ ବାଉଁଶ ଗଛରେ ପରିଣତ କରିଛନ୍ତି।
ଏନଡିଏ ସରକାରରେ, ଆମେ ଆଗାମୀ ୧୦ ବର୍ଷ ମଧ୍ୟରେ ନାଗରିକଙ୍କ ଜୀବନରେ ଉତ୍ତମ ଶାସନ, ବିକାଶ ଏବଂ ଜୀବନଶୈଳୀ ଆଣିବାକୁ ଚେଷ୍ଟା କରିବୁ। ମୋର ବ୍ୟକ୍ତିଗତ ସ୍ୱପ୍ନ ହେଉଛି ନାଗରିକଙ୍କ ଜୀବନରେ ସରକାର କମ୍ ହସ୍ତକ୍ଷେପ କଲେ ଗଣତନ୍ତ୍ର ଅଧିକ ଶକ୍ତିଶାଳୀ ହେବ। ଆମେ ବିକାଶର ଏକ ନୂତନ ଅଧ୍ୟାୟ, ଜନସାଧାରଣଙ୍କ ଅଂଶଗ୍ରହଣର ଏକ ନୂତନ ଅଧ୍ୟାୟ ଲେଖିବା ଏବଂ ମିଳିତ ଭାବରେ ଆମେ ଏକ ବିକଶିତ ଭାରତର ସ୍ୱପ୍ନକୁ ସାକାର କରିବା।
ମୋଦୀ କହିଛନ୍ତି ଗୃହରେ ଥିବା ଯେକୌଣସି ଦଳର ପ୍ରତିନିଧୀ ହୋଇଥାନ୍ତୁ ସମସ୍ତେ ମୋ ପାଇଁ ସମାନ। ଲୋକସଭା ହେଉ କିମ୍ବା ରାଜ୍ୟସଭା ହେଉ, ସମସ୍ତେ ଆମ ପାଇଁ ସମାନ। ଏହି ଭାବନା ଯୋଗୁ, ଏନଡିଏ ୩୦ ବର୍ଷ ଧରି ସଫଳତାର ସହ କାର୍ଯ୍ୟ କରୁଛି। ଦକ୍ଷିଣ ଭାରତ ସମ୍ପର୍କରେ ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ଏନଡିଏ ଦକ୍ଷିଣ ଭାରତରେ ଏକ ନୂତନ ରାଜନୀତିର ମୂଳଦୁଆକୁ ମଜବୁତ କରିଛି। ଏହା ଅଗାମୀ ଦିନରେ ଅଧିକ ସଫଳ ହେବ।
