ଭୁବନେଶ୍ବର: ମୁଖ୍ୟମନ୍ତ୍ରୀ ଭାବେ ମୋହନ ଚରଣ ମାଝୀଙ୍କ ଏହି ପଦ ଓ ଗୋପନୀୟତାର ଶପଥ ପାଠ ସହ ରାଜ୍ୟରେ ଆରମ୍ଭ ହୋଇଛି ବିଜେପି ସରକାର । ଲେଖା ହୋଇଛି ନୂଆ ଇତିହାସ, ଆରମ୍ଭ ହୋଇଛି ରାଜ୍ୟ ରାଜନୀତିର ନୂଆ ଅଧ୍ୟାୟ । ଐତିହ୍ୟ, ସଂସ୍କୃତି ଓ ପରମ୍ପରାର ରାଜ୍ୟ ଓଡ଼ିଶାର ପଂଚଦଶ ମୁଖ୍ୟମନ୍ତ୍ରୀ ଭାବେ ଦାୟିତ୍ୱ ନେଇଛନ୍ତି କେନ୍ଦୁଝରର ଲୋକପ୍ରିୟ ଆଦିବାସୀ ଚେହେରା । ରାଜନୀତିରେ ଅଭିଜ୍ଞ ଓ ଅନୁଭବୀ ନେତା । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଗୃହମନ୍ତ୍ରୀ ଅମିତ ଶାହଙ୍କ ଉପସ୍ଥିତିରେ ଓଡ଼ିଶାର ମଙ୍ଗ ଧରିଛନ୍ତି ମୋହନ । ଓଡ଼ିଶା ସରକାରରେ ମୋହନଙ୍କ ସାଥୀ ଭାବେ ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂଦେଓ ଓ ପ୍ରଭାତୀ ପରିଡା ବି ନେଇଛନ୍ତି ପଦ ଓ ଗୋପନୀୟତାର ଶପଥ ।
ବଦଳିଛି ୨୫ ବର୍ଷର ସରକାର । ନୂଆ ଦଳ, ନୂଆ ମୁଖ୍ୟମନ୍ତ୍ରୀ । ପ୍ରଥମଥର ପାଇଁ ନିଜ ଦମ୍ଭରେ ଓଡ଼ିଶାରେ ଏକାକୀ ସରକାର ଗଢିଛି ବିଜେପି । ନିର୍ବାଚନରେ ପ୍ରଚଣ୍ଡ ଜନମତ ସହ ନିରଙ୍କୁଶ ସଂଖ୍ୟା ଗରିଷ୍ଠତା ହାସଲ ପରେ ସରକାର ଗଠନର ଏଭଳି ଭବ୍ୟ ଆୟୋଜନ ନା କେବେ ଓଡ଼ିଶା ଦେଖିଥିଲା ନା କିଏ ଭାବିଥିଲା । ଏହି ଐତିହାସିକ ମୁହୂର୍ତ୍ତର ମୁକସାକ୍ଷୀ ବନିଥିଲେ ୯ଟି ରାଜ୍ୟର ମୁଖ୍ୟମନ୍ତ୍ରୀ, କେନ୍ଦ୍ର ମନ୍ତ୍ରୀମଣ୍ଡଳର ଅନେକ ସଦସ୍ୟ, ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସମେତ ରାଜନୀତି, କ୍ରୀଡା, ବ୍ୟବସାୟ ଓ ମନୋରଂଜନ କ୍ଷେତ୍ରରେ ପ୍ରତିଷ୍ଠିତ ଏକାଧିକ ବିଶିଷ୍ଟ ବ୍ୟକ୍ତିତ୍ୱ । ରାଜ୍ୟ ତଥା ରାଜ୍ୟ ବାହାରର ବହୁ ସାଧୁସନ୍ଥ ବି ପହଁଚିଥିଲେ ନୂଆ ସରକାରକୁ ଆଶୀର୍ବାଦ କରିବାକୁ । ନେତା, କର୍ମୀ, ସମର୍ଥକ ଓ ଶୁଭେଚ୍ଛୁଙ୍କ ସହ ହଜାର ହଜାର ସାଧାରଣ ଜନତାଙ୍କ ମଧ୍ୟରେ ଉତ୍ସାହର ତ ସୀମା ନଥିଲା ।
ନିମନ୍ତ୍ରଣ ପତ୍ରରୁ ଶପଥ ସମାରୋହ ସ୍ଥଳ, ସବୁଠି ଓଡ଼ିଆ ଅସ୍ମିତାର ଛାପ । ତୋରଣରେ ଶୁଦ୍ଧ ଓଡ଼ିଆ ଲେଖା ସହ ମୁଖ୍ୟ ଫାଟକରେ ଶୋଭା ପାଇଥିଲା କୋଣାର୍କ ଘୋଡା ଓ ଧଉଳି ହାତୀ । ଭିଆଇପି ଗେଟରେ ପୁରୀ ସାହିଯାତର ଝଲକ, ସଭାସ୍ଥଳକୁ ଯିବାର ଦୁଇ ପାର୍ଶ୍ବରେ ରହିଥିଲା ଓଡ଼ିଶାର ବରପୁତ୍ର ମାନଙ୍କ ଫଟୋଚିତ୍ର ଓ ପ୍ରତିମୂର୍ତ୍ତି । ଭିତରେ ମଂଚ ତଳେ ଐତିହ୍ୟ କୋଣାର୍କ ଆକୃତିର ସାଜସଜ୍ଜା, ଓଡ଼ିଆ ଅସ୍ମିତାର ପ୍ରତୀକ ଭାଗବତ ଟୁଙ୍ଗି ଓ ମାଣବସା ଗୁରୁବାରର ମହକ ସହ ପ୍ରତିଫଳିତ ହେଉଥଲା ଓଡ଼ିଆ ସଂସ୍କୃତି ଓ ପରମ୍ପରା । ନୂଆ ସରକାରକୁ ସ୍ବାଗତ ଜଣାଇ କେଉଁଠି ଘୋଡା ନାଚ ହେଉଥିଲା ତ ଆଉ କେଉଁଠି ସମ୍ବଲପୁରୀ, ଢେମସା ଓ ଛଉ ନୃତ୍ୟ ଦୁଲୁକୁଥିଲା ସାରା ଭୁବନେଶ୍ବର ।
ଏପ୍ରିଲ ୨୦ ତାରିଖ । ବ୍ରହ୍ମପୁରର କନିଷି ନିର୍ବାଚନୀ ସଭାରେ ପ୍ରଥମଥର ପାଇଁ ରାଜ୍ୟରେ ବିଜେପି ସରକାର ଗଠନ ନେଇ ଦମ୍ଭ ଦେଖାଇଥିଲେ ପ୍ରଧାନମନ୍ତ୍ରୀ ମୋଦି । ଜଣେ ଓଡ଼ିଆ ମୁଖ୍ୟମନ୍ତ୍ରୀଙ୍କ ଶପଥ ସମାରୋହକୁ ଆସିବା ନେଇ ଦେଇଥିଲେ ପ୍ରତିଶ୍ରୁତି । ଆଉ ସେହି ପ୍ରତିଶ୍ରୁତି ପୂରଣ କରି ଓଥ୍ ଟେକିଂ ସେରିମୋନିର ୨ ଘଣ୍ଟା ପୂର୍ବରୁ ଭୁବନେଶ୍ବରରେ ପହଁଚିଯାଇଥିଲେ ପ୍ରଧାନମନ୍ତ୍ରୀ । ସାକ୍ଷୀ ବନିଥିଲେ ଓଡ଼ିଶାରେ ଐତିହାସିକ ସରକାରର ଶପଥ ଗ୍ରହଣ ସମାରୋହର ।
ଦୁଇ ଉପମୁଖ୍ୟମନ୍ତ୍ରୀ ଓ ୮ କ୍ୟାବିନେଟ୍ ମନ୍ତ୍ରୀଙ୍କ ସମେତ ୧୬ ଜଣିଆ ମନ୍ତ୍ରିମଣ୍ଡଳର ଶପଥ ସହ ଓଡ଼ିଶାରେ ଆଜିଠୁ ଆରମ୍ଭ ହୋଇଛି ମୋହନ ସରକାର
