ଭୁବନେଶ୍ୱର : ବାରିପଦାସ୍ଥିତ ହରିବଳଦେବଜୀଉ ମନ୍ଦିରର ସେବାୟତଗଣ ମନ୍ଦିରର ବିଭିନ୍ନ ସମସ୍ୟା ନେଇ ଗତ ୨୮ ତାରିଖରୁ ୯ ଦିନ ଧରି ପଦଯାତ୍ରା କରି ଭୁବନେଶ୍ୱର ଅଭିମୁଖେ ବାହାରିଥିଲେ। ଆଜି ରାଜଧାନୀରେ ପହଞ୍ଚି ମୁଖ୍ୟମନ୍ତ୍ରୀଙ୍କୁ ଭେଟିବାକୁ ଚେଷ୍ଟା କରିଥିଲେ ହେଁ ମୁଖ୍ୟମନ୍ତ୍ରୀଙ୍କ ଦେଖା ମିଳିନଥିଲା। ଶେଷରେ ନିରାଶ ହୋଇ ଲୋୟର ପିଏମ୍ଜିରେ ଘଣ୍ଟ ପିଟି ଗଭୀର ନିଦରେ ଶୋଇଥିବା ମୁଖ୍ୟମନ୍ତ୍ରୀ ଓ ସରକାରଙ୍କୁ ନିଦରୁ ଉଠାଇବାକୁ ଚେଷ୍ଟା କରିଥିଲେ। ଅଭିଯୋଗ ଶୁଣାଇବା ପାଇଁ ଏଭଳି ଅଭିନବ ଉପାୟ ଆପଣାଇଥିଲେ ହେଁ ସରକାର କି ସରକାରୀ କଳର କେହି ହେଲେ ସେମାନଙ୍କ ଅଭିଯୋଗ ଶୁଣିବାକୁ ଆସିନଥିଲେ। ସେମାନେ ନିରାଶ ହୋଇ ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କୁ ଭେଟି ଅଭିଯୋଗ ଜଣାଇଥିଲେ। ଶ୍ରୀ ପଟ୍ଟନାୟକ ଏହାର କାର୍ଯ୍ୟକାରିତାକୁ ହୃଦ୍ବୋଧ କରି ବିଧାନସଭାରେ ଏହି ପ୍ରସଙ୍ଗ ଉତ୍ଥାପନ କରିବା ନେଇ ପ୍ରତିଶ୍ରୁତି ଦେଇଥିବା ସେବାୟତ କହିଛନ୍ତି।
ସୂଚନାନୁସାରେ, ବାରିପଦା ଦେବୋତ୍ତର ବିଭାଗ ଅଧୀନରେ ଦଶଟି ମନ୍ଦିର ଓ ମଠ ପରିଚାଳିତ ହେଉଛି। ଏହାର ରକ୍ଷଣାବେକ୍ଷଣା ଓ ପରିଚାଳନା ପାଇଁ ୭ ଶହ ଏକର ଜମି ଖଞ୍ଜା ଯାଇଛି। ହେଲେ ଠାକୁରଙ୍କ ପାଇଁ ଉଦ୍ଦିଷ୍ଟ ଏହି ଜମିରୁ ବହୁ ପରିମାଣର ଜମି ବିଭିନ୍ନ ସରକାରୀ ସଂସ୍ଥା, ମୁଷ୍ଟିମେୟ ଲୋକଙ୍କ ଜବରଦଖଲରେ ରହିଛି। ଫଳସ୍ୱରୂପ ଉକ୍ତ ଜମିରୁ ରାଜସ୍ୱ ଆଦାୟ ହୋଇପାରୁନି। ତେଣୁ ଉକ୍ତ ଜମିକୁ ଦେବୋତ୍ତର ବିଭାଗକୁ ଆଣି ମଠ ଓ ମନ୍ଦିର ଆଦି ପରିଚାଳନାରେ ଜମି ଆୟବ୍ୟୟ କରିବା ପାଇଁ ସେବାୟତମାନେ ଅନୁରୋଧ କରିଛନ୍ତି। ଏଥିସହ ଠାକୁରଙ୍କ ବେଶରେ ବ୍ୟବହାର ସୁନା ଓ ରୁପା ଅଳଙ୍କାର ଏବେ ସବୁ ଭାଙ୍ଗିରୁଜି ଗଲାଣି। ତେଣୁ ଗହଣା ଉପଯୁକ୍ତ ମରାମତି କରାଯାଇ ଠାକୁର ବେଶରେ ବ୍ୟବହାରଯୋଗ୍ୟ କରାଯାଉ। ଠାକୁରଙ୍କ ଦୈନନ୍ଦିନ ନିତି ପାଇଁ ଛତିଶାନିଯୋଗ ସେବାର ବ୍ୟବସ୍ଥା ଥିବା ବେଳେ ଏବେ ସଠିକ ପାଉଣା ନମିଳିବାରୁ ସେବାୟତମାନେ ସେବା ପୂଜା ଛାଡ଼ି ଦେଉଛନ୍ତି। ଫଳରେ ବହୁ ସେବା ପଦ ଫାଙ୍କା ରହୁଛି। ତେଣୁ ଠାକୁରଙ୍କ ନୀତି ନିୟମ ସଠିକ ଭାବେ ହୋଇପାରୁନି। ତେଣୁ ତୁରନ୍ତ ସେବାୟତ ନିଯୁକ୍ତି କରିବା ପାଇଁ ଦାବି କରାଯାଉଛି। ସେହିପରି ରାଜ୍ୟର ବିଭିନ୍ନ ଆଧ୍ୟାତ୍ମିକ ପୀଠକୁ ଯେଭଳି ସୌନ୍ଦର୍ଯ୍ୟୀକରଣ କରାଯାଉଛି, ସେହିଭଳି ଏହି ମନ୍ଦିରର ଉନ୍ନତୀକରଣ ଓ ସୌନ୍ଦର୍ଯ୍ୟୀକରଣ କରାଯାଉ।
ସେହିପରି ବାରିପଦା ସହରରେ ଦେବୋତ୍ତର ବିଭାଗ ଅଧୀନରେ ଥିବା ସ୍ଥାନରେ ମୁଷ୍ଟିମେୟ ବ୍ୟବସାୟୀମାନେ ଦୋକାନ ଗୃହ କରି ଅର୍ଥ ଉପାର୍ଜନ କରୁଛନ୍ତି। ଅନ୍ୟପକ୍ଷରେ ଠାକୁରଙ୍କ ସେବା ପୂଜା କରୁଥିବା ସେବାୟତମାନେ ସ୍ୱଳ୍ପ ପାଉଣାରେ କାମ କରି ଦହଗଞ୍ଜ ହେଉଛନ୍ତି। ତେଣୁ ସେହି ସ୍ଥାନରେ ସେବାୟତମାନଙ୍କୁ ଦୋକାନ ଘର ଦିଆଯାଉ। ଏଥିସହ ସେବାୟତଙ୍କ ମାସିକ ଭତ୍ତା ପ୍ରଦାନ ବ୍ୟବସ୍ଥାରେ ସୁଧାର ଅଣାଯାଉ ବୋଲି ସେବାୟତଙ୍କ ପକ୍ଷରୁ ଦାବି କରାଯାଉଛି। ସେବାୟତ କାମେଶ୍ୱର ତ୍ରିପାଠୀଙ୍କ କହିବାନୁସାରେ, ଆମେ ଗତ ୯ ଦିନ ଧରି ୫ଜଣ ସେବାୟତ ପଦଯାତ୍ରାରେ ବାରିପଦାରୁ ଭୁବନେଶ୍ୱର ଆସିଲୁ। କିନ୍ତୁ, ଦୁଃଖର ବିଷୟ ୯ଟି ନିର୍ବାଚନ ମଣ୍ଡଳୀ ଅତିକ୍ରମ କରି ଆସିଥିଲେ ହେଁ କେହି ହେଲେ ଜନପ୍ରତିନିଧି ଆମକୁ ଦେଖା କଲେନି। ଅତ୍ୟନ୍ତ କଷ୍ଟର ସହ ରାଜଧାନୀରେ ପହଞ୍ଚି ମୁଖ୍ୟମନ୍ତ୍ରୀଙ୍କୁ ଭେଟିବାକୁ ଚେଷ୍ଟା କରିଥିଲେ ହେଁ ସମ୍ଭବ ହୋଇନଥିଲା। ତେଣୁ ସରକାର ଆମ ଅଭିଯୋଗ ଓ ଦାବି ଉପରେ ତୁରନ୍ତ ବିଚାର କରିବାକୁ ସେ ଦାବି କରିଛନ୍ତି।
