ଭଦ୍ରକ: ବଡ଼ବଡ଼ ଗ୍ରାମ ଓ ପଡ଼ାକୁ ଗମନାଗମନ ସୁବିଧା ପାଇଁ କେନ୍ଦ୍ର ଠାରୁ ରାଜ୍ୟ ସରକାରଙ୍କ ଯାଏଁ କୋଟିକୋଟି ଟଙ୍କା ବ୍ୟୟ କରୁଛନ୍ତି। ପ୍ରଧାନମନ୍ତ୍ରୀ ଗ୍ରାମସଡକ ସହିତ ମୁଖ୍ୟମନ୍ତ୍ରୀ ଗ୍ରାମ ସଡ଼କ ଓ ଅନ୍ୟାନ୍ୟ ଯୋଜନାରେ ନୂତନ ରାସ୍ତା ନିର୍ମାଣ ହେଉଥିବା ବେଳେ ଅନେକ ରାସ୍ତାର ପୁନଃରୁଦ୍ଧାର ମଧ୍ୟ ହେଉଛି। ଏହାସତ୍ୱେ ପ୍ରଶାସନିକ ଅପାରଗତା ହେଉ କିମ୍ବା ଆଂଚଳିକ ସ୍ତରରେ ରାଜନୈତିକ ନେତୃବୃନ୍ଦଙ୍କ ପରସ୍ପର ବିରୋଧାଭାସ ଯୋଗୁ ଆଜି ବି ସୁଦ୍ଧା ଅନେକ ଗାଁକୁ ଭଲ ରାସ୍ତାଟିଏ ନାହିଁ। ଏମିତିକି ପୁରୁଣା ରାସ୍ତାରେ ୨୦ବର୍ଷ ହେବ ମୋରମ ଗଣ୍ଡିଏ ପଡିପାରୁନାହିଁ। ଯେଉଁଥିପାଇଁ ଗ୍ରାମବାସୀ ମାନେ ଗମନାଗମନ ସୁବିଧାରୁ ବଂଚିତ ହେଉଛନ୍ତି। ଏମିତି ଏକ ରାସ୍ତାର ଚିତ୍ର ଦେଖିବାକୁ ମିଳିଛି ଭଦ୍ରକ ଜିଲା ଭଣ୍ଡାରିପୋଖରୀ ବ୍ଲକ ରହଣିଆ ପଞ୍ଚାୟତ ରାଢୋ ଗାଁ ଠାରେ। ତିନିଗୋଟି ୱାର୍ଡକୁ ନେଇ ପଂଚାୟତର ସର୍ବବୃହତ ଗ୍ରାମ ଭାବେ ପରିଚିତ ଉକ୍ତ ଗ୍ରାମର ଲୋକସଂଖ୍ୟା ପ୍ରାୟ ଦୁଇହଜାରରୁ ଅଧିକ ହେବ। ଗାଁର ରାଢୋ ଛକ ପୂର୍ତ ବିଭାଗ ରାସ୍ତା ଠାରୁ ରାଉତସାହି ଯାଏଁ ସଂଯୋଗ ହୋଇଥିବା ପ୍ରମୁଖ ଗ୍ରାମ୍ୟ ରାସ୍ତାଟି ଏବେ ଜରାଜୀର୍ଣ୍ଣ ଅବସ୍ଥାରେ। ଏହି ରାସ୍ତା ସହିତ ତିନିଗୋଟି ସାହିର ଅନ୍ୟ ରାସ୍ତା ମଧ୍ୟ ସଂଯୋଗ ହୋଇଛି। ତେଣୁ ରାତିପାହିଲେ ଗ୍ରାମବାସୀ ମାନେ ସାହି ରାସ୍ତାଦେଇ ପ୍ରମୁଖ ଗ୍ରାମ୍ୟ ରାସ୍ତାକୁ ଆସି ପୂର୍ତ ରାସ୍ତା ଦେଇ ବିଭିନ୍ନ ଆଡକୁ ଯାଇଥାନ୍ତି। ଏହି ଗ୍ରାମ୍ୟ ରାସ୍ତାଟି ଗମନାଗମନର ପ୍ରମୁଖ ମାଧ୍ୟମ ହୋଇଥିବା ବେଳେ ଦୀର୍ଘ ବର୍ଷ ହେବ ଏହାର ନବୀକରଣ କାର୍ଯ୍ୟ ନହେବା ପରିତାପର ବିଷୟ ପାଲଟିଛି। ପ୍ରାୟ ୧୫/୨୦ବର୍ଷ ପୂର୍ବରୁ ପଡ଼ିଥିବା ମୋରମ ଓ ମେଂଟାଲ ଧୀରେ ଧୀରେ ଉଠିଯିବା ସହିତ ଆଉକିଛି ମାଟିରେ ପୋତି ହୋଇଗଲାଣି। ଏବେ ରାସ୍ତା ତମାମ ଖାଲଖମାରେ ଭର୍ତି ହୋଇଯାଇଥିବା ବେଳେ ସାଇକେଲ ମୋଟର ସାଇକେଲ ତ ଦୂରର କଥା ଚାଲିଚାଲି ଯିବା ଗ୍ରାମବାସୀଙ୍କ ପାଇଁ କଷ୍ଟକର ହୋଇପଡୁଛି। ରାସ୍ତାର ଶଙ୍ଖୁଆ ସାହି ନିକଟ ନୟନଯୋରୀ ଉପରେ ଥିବା କର୍ଲଭର୍ଟଟି ପ୍ରାୟ ୭୦ ଭାଗ ଭାଙ୍ଗି ଗଲାଣି। ପଡ଼ିଥିବା ହୋମ ପାଇପ ମଧ୍ୟ ନଷ୍ଟ ହୋଇଯାଇଛି। ରାସ୍ତା ପାର୍ଶ୍ୱକୁ ଲାଗି ସ୍କୁଲ, ଶନିମନ୍ଦିର, ଇଲେକ୍ଟ୍ରି ସବ ଷ୍ଟେସନ ରହିଥିବା ବେଳେ ସକାଳୁ ରାତିଯାଏଁ ରାସ୍ତା ଉପରେ ଗ୍ରାମବାସୀ ମାନେ ଗମନାଗମନ କରିଥାନ୍ତି। ଗତ ଦାନା ବାତ୍ୟା ସମୟରେ ମାତ୍ରାଧିକ ବର୍ଷା ହେବାରୁ ରାସ୍ତାଟିର ଅର୍ଦ୍ଧାଧିକ ଭାଗ ବୁଡ଼ିଯାଇଥିଲା। ଫଳରେ ଗ୍ରାମବାସୀ ମାନେ ପ୍ରାୟ ୨୪ଘଂଟା ଧରି ଜଳବନ୍ଦୀ ହୋଇ ରହିଥିଲେ। ପାଣି କମିବା ପରେ ରାସ୍ତା ଅବସ୍ଥା ଆହୁରି ଶୋଚନୀୟ ହୋଇଯାଇଛି। ଜରାଜୀର୍ଣ୍ଣ ଅବସ୍ଥାରେ ଥିବା ଉକ୍ତ ଗ୍ରାମ୍ୟ ରାସ୍ତାଟିକୁ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ ସାମିଲ କରିବା ପାଇଁ ପୂର୍ବରୁ ବାରମ୍ବାର ପଞ୍ଚାୟତ ସମିତି ଓ ଜିଲ୍ଲା ପରିଷଦ ବୈଠକରେ ଦାବି କରାଯାଇଥିଲେ ସୁଦ୍ଧା ତାହା ବିଫଳ ହୋଇଛି। ଏପଟେ ବ୍ଲକ ପ୍ରଶାସନ ହାତରେ ରହିଥିବା ରାସ୍ତାଟିର ଭାଗ୍ୟ ଆଜି ବି ସୁଦ୍ଧା ଅନ୍ଧାର ମଧ୍ୟରେ ପଡିଛି। ଗାଁ ଲୋକ ପୁଣି ୨୦ବର୍ଷ ପୂର୍ବ ଅବସ୍ଥାକୁ ଫେରିଯାଇ ଅସରାଏ ବର୍ଷା ହେଲେ ପାଣି କାଦୁଅରେ ଗମନାଗମନ କରୁଛନ୍ତି। ଯାହାକି ଶାସନ ବ୍ୟବସ୍ଥାକୁ ଅଟହାସ୍ୟ କରୁଛି। ତେଣୁ ଆଗାମୀ ଦିନରେ ଗ୍ରାମ୍ୟ ରାସ୍ତାଟିର ନବୀକରଣ କାର୍ଯ୍ୟ କରାନଗଲେ ବାଧ୍ୟହୋଇ ଗ୍ରାମବାସୀ ମାନେ ମୁଖ୍ୟ ରାସ୍ତାକୁ ଆସି ଆନ୍ଦୋଳନାତ୍ମକ ପନ୍ଥା ଗ୍ରହଣ କରିବେ ବୋଲି ସୂଚନା ଦେଇଥିବା ବେଳେ ତୁରନ୍ତ ଏହା ଉପରେ ସାଂସଦ, ବିଧାୟକ ଓ ଜିଲ୍ଲାପାଳ ଦୃଷ୍ଟି ଦେବାକୁ ଦାବି ମଧ୍ୟ କରିଛନ୍ତି।
