ଭୁବନେଶ୍ୱର: ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ନେତୃତ୍ବାଧୀନ ବିଜେପି ସରକାର ଆଜି ଅବସରପ୍ରାପ୍ତ ଆଇପିଏସ୍ ଅଫିସର ତଥା ପୂର୍ବତନ ଡିଜିପି ପ୍ରକାଶ ମିଶ୍ରଙ୍କୁ ମୁଖ୍ୟମନ୍ତ୍ରୀଙ୍କ ଉପଦେଷ୍ଟା ଭାବେ ନିଯୁକ୍ତି ଦେଇଛନ୍ତି। ଶ୍ରୀ ମିଶ୍ରଙ୍କୁ କ୍ୟାବିନେଟ୍ ମନ୍ତ୍ରୀ ପାହ୍ୟା ପ୍ରଦାନ କରାଯାଇଛି। ଏହି ଗୁରୁତ୍ୱପୂର୍ଣ୍ଣ ପଦବୀରେ ନିଯୁକ୍ତି ପାଇବା ପରେ ଶ୍ରୀ ମିଶ୍ର କହିଛନ୍ତି ଯେ ସରକାର ତାଙ୍କୁ ଏହି ଗୁରୁ ଦାୟିତ୍ୱ ଦେଇଛନ୍ତି ଏବଂ ସେ ଓଡ଼ିଶାବାସୀଙ୍କ ସେବା କରିବାର କର୍ତ୍ତବ୍ୟ ନିର୍ବାହ କରିବାକୁ ଚେଷ୍ଟା କରିବେ। ନୂଆ ବିଜେପି ସରକାର କିପରି ସଠିକ ଭାବେ କାର୍ଯ୍ୟ କରିବ ଓ ରାଜ୍ୟବାସୀଙ୍କ ସମସ୍ୟାର ସମାଧାନ କରିବ ସେଦିଗରେ ଗୁରୁତ୍ୱ ଦିଆଯିବ ବୋଲି ଶ୍ରୀ ମିଶ୍ର କହିଛନ୍ତି।
ଶ୍ରୀ ମିଶ୍ର ୨୦୧୨ ଜୁଲାଇରୁ ୨୦୧୪ ଜୁଲାଇ ପର୍ଯ୍ୟନ୍ତ ଓଡ଼ିଶାର ଡିଜିପି ଭାବେ କାର୍ଯ୍ୟ କରିଥିଲେ। ତତ୍କାଳୀନ ବିଜେଡି ସରକାର ଜୁଲାଇ ୨୦୧୪ରେ ତାଙ୍କୁ ଓଡ଼ିଶା ପୁଲିସ ମୁଖ୍ୟ ପଦରୁ ହଟାଇ ୨୦୧୪ ସେପ୍ଟେମ୍ବରରେ ଭିଜିଲାନ୍ସ ମାମଲା ରୁଜୁ କରିଥିଲେ। ପରେ ସେ କେନ୍ଦ୍ରୀୟ ଡେପୁଟେସନରେ ଯାଇ ସିଆରପିଏଫର ମହାନିର୍ଦ୍ଦେଶକ ଭାବେ ଯୋଗ ଦେଇଥିଲେ ଏବଂ ଫେବୃଆରୀ ୨୦୧୬ରେ ଅବସର ନେଇଥିଲେ ।
୨୦୦୬ରୁ ୨୦୦୯ ମଧ୍ୟରେ ଓଡ଼ିଶା ପୁଲିସ ଗୃହ ନିର୍ମାଣ ଓ କଲ୍ୟାଣ ନିଗମର ଅଧ୍ୟକ୍ଷ ଓ ପରିଚାଳନା ନିର୍ଦ୍ଦେଶକ ଥିବା ସମୟରେ ଶ୍ରୀ ମିଶ୍ର ସାମଗ୍ରୀ ଯୋଗାଣକାରୀମାନଙ୍କୁ ଅଯଥା ଫାଇଦା ଦେଖାଇ ରାଜ୍ୟ ରାଜକୋଷକୁ ୭.୨୭ କୋଟି ଟଙ୍କାର କ୍ଷତି ପହଞ୍ଚାଇଥିବା ନେଇ ଓଡ଼ିଶା ଭିଜିଲାନ୍ସ ଅଭିଯୋଗ କରିଥିଲା। ୨୦୧୫ ଜୁନ୍ ମାସରେ ଓଡ଼ିଶା ହାଇକୋର୍ଟ ଶ୍ରୀ ମିଶ୍ରଙ୍କ ବିରୋଧରେ ଆସିଥିବା ଅଭିଯୋଗକୁ ରଦ୍ଦ କରିଥିଲେ। ୨୦୧୬ରେ ରାଷ୍ଟ୍ରପତି ଶାସନ ଲାଗୁ ହେବା ପରେ ଉତ୍ତରାଖଣ୍ଡର ତତ୍କାଳୀନ ରାଜ୍ୟପାଳ କେ କେ ପାଉଲ ଦୁଇ ପରାମର୍ଶଦାତାଙ୍କ ମଧ୍ୟରୁ ଶ୍ରୀ ମିଶ୍ରଙ୍କୁ ଅନ୍ୟତମ ଭାବେ ନିଯୁକ୍ତ କରାଯାଇଥିଲା।
୨୦୧୯ ମାର୍ଚ୍ଚ ୨୪ତାରିଖରେ ସେ ବିଜେପିରେ ଯୋଗଦେବା ପରେ ୨୦୧୯ରେ ତାଙ୍କୁ କଟକ ସଂସଦୀୟ କ୍ଷେତ୍ରରୁ ପ୍ରାର୍ଥୀ କରିଥିଲା, ଯେଉଁଥିରେ ସେ ଭର୍ତ୍ତୃହରି ମହତାବଙ୍କଠାରୁ ପରାଜିତ ହୋଇଥିଲେ, ଯିଏ କି ୨୦୧୯ ନିର୍ବାଚନରେ ବିଜେଡିର ପ୍ରାର୍ଥୀ ଥିଲେ କିନ୍ତୁ ବର୍ତ୍ତମାନ ଏହି ନିର୍ବାଚନ ମଣ୍ଡଳୀକୁ ବିଜେପି ସାଂସଦ ଭାବେ ପ୍ରତିନିଧିତ୍ୱ କରୁଛନ୍ତି।
