ଭୁବନେଶ୍ୱର: ଓଡ଼ିଶା ରାଜ୍ୟ ବିପର୍ଯ୍ୟୟ ପରିଚାଳନା ପ୍ରାଧିକରଣ (ଓଏସଡିଏମଏ), ଜାତୀୟ ବିପର୍ଯ୍ୟୟ ପରିଚାଳନା ପ୍ରାଧିକରଣ (ଏନଡିଏମଏ) ସହଯୋଗରେ, ରାସାୟନିକ ବିପର୍ଯ୍ୟୟ ପରିଚାଳନା ଉପରେ ଏକ ରାଜ୍ୟସ୍ତରୀୟ ମକ୍ ଡ୍ରିଲ୍ ଆୟୋଜନ କରିବ। ଏହି ମକ୍ ଡ୍ରିଲ୍ରେ ଅନୁଗୁଳ, ଢ଼େଙ୍କାନାଳ, ବାଲେଶ୍ବର, ଭଦ୍ରକ, କଟକ, ଗଞ୍ଜାମ, ଜଗତସିଂହପୁର, ଯାଜପୁର, ଖୋର୍ଦ୍ଧା, କୋରାପୁଟ, ମୟୂରଭଞ୍ଜ, ରାୟଗଡା, ଝାରସୁଗୁଡା, ସୁନ୍ଦରଗଡ, ବଲାଙ୍ଗୀର, ଏବଂ ସମ୍ବଲପୁର ସମେତ ୧୬ଟି ଜିଲ୍ଲାର ୨୪ଟି ଶିଳ୍ପ ୟୁନିଟ୍ ସାମିଲ ହେବେ। ଏହି ମକ୍ ଡ୍ରିଲ୍ର ପ୍ରାଥମିକ ଉଦ୍ଦେଶ୍ୟ ହେଉଛି ରାସାୟନିକ ବିପର୍ଯ୍ୟୟ ପାଇଁ ପ୍ରସ୍ତୁତି ଏବଂ ପ୍ରତିକ୍ରିୟା ପ୍ରଣାଳିକୁ ବୃଦ୍ଧି କରିବା। ଏହାର ଲକ୍ଷ୍ୟ ଶିଳ୍ପ, ସରକାରୀ ଏଜେନ୍ସି ଏବଂ ଜରୁରୀକାଳୀନ ପ୍ରତିକ୍ରିୟା ଦଳ ସମେତ ପ୍ରମୁଖ ଅଂଶୀଦାରମାନଙ୍କ ମଧ୍ୟରେ ପ୍ରଭାବଶାଳୀ ସମନ୍ୱୟ ସୁନିଶ୍ଚିତ କରିବା। ଏଥିରେ ଦ୍ରୁତ ସତର୍କତା ପ୍ରଣାଳୀ, ସ୍ଥାନାନ୍ତର ପ୍ରକ୍ରିୟା ଏବଂ କ୍ଷେତ୍ରସ୍ତରୀୟ ଜରୁରୀକାଳୀନ ପରିଚାଳନା ରଣନୀତି ଉପରେ ଧ୍ୟାନ ଦିଆଯିବ।
ପ୍ରସ୍ତୁତିମୂଳକ ପଦକ୍ଷେପ ସ୍ୱରୂପ, ଭୁବନେଶ୍ୱରର ରାଜ୍ୟ ଜରୁରୀକାଳୀନ କାର୍ଯ୍ୟ କେନ୍ଦ୍ରରେ ଏକ ଟେବୁଲ-ଟପ୍ ମକ୍ ଡ୍ରିଲ୍ କରାଯାଇଥିଲା। ୧୬ଟି ଜିଲ୍ଲାର ପ୍ରଶାସନିକ ଅଧିକାରୀ ଏବଂ ଚିହ୍ନଟ ଶିଳ୍ପର ପ୍ରତିନିଧିମାନେ ଆଲୋଚନାରେ ଅଂଶଗ୍ରହଣ କରିଥିଲେ। ବିପର୍ଯ୍ୟୟ ପ୍ରତିକ୍ରିୟା ପ୍ରୟାସକୁ ସୁଗମ କରିବା ପାଇଁ ଅଂଶଗ୍ରହଣକାରୀମାନେ ଏକ ମାନକ କାର୍ଯ୍ୟ ପ୍ରଣାଳୀ (ଏସଓପି) ଚୂଡ଼ାନ୍ତ କରିଥିଲେ। ଅତିରିକ୍ତ ସ୍ୱତନ୍ତ୍ର ରିଲିଫ୍ କମିଶନର ପଦ୍ମନାଭ ବେହେରା ଏବଂ ଓଏସଡିଏମଏର କାର୍ଯ୍ୟନିର୍ବାହୀ ନିର୍ଦ୍ଦେଶକ କମଳ ଲୋଚନ ମିଶ୍ରଙ୍କ ତତ୍ତ୍ୱାବଧାନରେ ଏହି ମକ୍ ଡ୍ରିଲ୍ ଆୟୋଜିତ ହେଉଛି। ଅବସରପ୍ରାପ୍ତ କମାଣ୍ଡାଣ୍ଟ ଆଦିତ୍ୟ କୁମାର ଅଧିବେଶନକୁ ପରିଚାଳନା କରିଥିଲେ, ଯେତେବେଳେ ଏନଡିଏମଏ ସଦସ୍ୟ ଲେଫ୍ଟନାଣ୍ଟ ଜେନେରାଲ ସୟଦ ଆତା ହାସନୈନ (ଅବସରପ୍ରାପ୍ତ) ମଡେରେଟର ଭାବରେ ଅଂଶଗ୍ରହଣକାରୀମାନଙ୍କୁ ସମ୍ବୋଧିତ କରିଥିଲେ।
ଏହି ପ୍ରୟାସରେ ଏନଡିଅରଏଫ, ଭାରତୀୟ ସେନା, ଭାରତୀୟ ବାୟୁସେନା, ଭାରତୀୟ ନୌସେନା, ସିଆଇଏସଏଫ, ଅଗ୍ନିଶମ ସେବା, ଜରୁରୀକାଳୀନ ପ୍ରତିକ୍ରିୟା ସେବା, ଓଡୀଆରଏଏଫ, ନାଗରିକ ପ୍ରତିରକ୍ଷା, ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ, ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ବିଭାଗ, ଓଡ଼ିଶା ପୁଲିସ, ରାଜ୍ୟ ଫୋରେନସିକ୍ ବିଜ୍ଞାନ ପରୀକ୍ଷାଗାର, ଏସଆରସି ଏବଂ ଓଡ଼ିଶା ମେରିଟାଇମ୍ ସମେତ ବିଭିନ୍ନ ସଂଗଠନ ସକ୍ରିୟ ଭାବରେ ଅଂଶଗ୍ରହଣ କରିଥିଲେ। ଭାରତୀୟ ତଟରକ୍ଷୀ ବାହିନୀ, ଆଇଏନଏସ ଚିଲିକା ଏବଂ ଅନ୍ୟାନ୍ୟ ରାଜ୍ୟ ସରକାରୀ ବିଭାଗର ପ୍ରତିନିଧିମାନେ ମଧ୍ୟ ଭର୍ଚୁଆଲ୍ ମୋଡ୍ ଆଲୋଚନାରେ ଯୋଗ ଦେଇଥିଲେ। ଜିଲ୍ଲା ସ୍ତରରେ, ଜିଲ୍ଲା କଲେକ୍ଟର, ଅତିରିକ୍ତ ଜିଲ୍ଲା କଲେକ୍ଟର, ଜିଲ୍ଲା ଜରୁରୀକାଳୀନ ଅଧିକାରୀ ଏବଂ ଚିହ୍ନଟ ଶିଳ୍ପ ଏବଂ ସମ୍ପୃକ୍ତ ବିଭାଗର ଅଧିକାରୀମାନେ ଭର୍ଚୁଆଲ୍ ବୈଠକରେ ଅଂଶଗ୍ରହଣ କରିଥିଲେ। ବୈଠକରେ ରାସାୟନିକ ବିପର୍ଯ୍ୟୟ ପରିଚାଳନା ମକ୍ ଡ୍ରିଲ୍ର ମୁଖ୍ୟ ଉଦ୍ଦେଶ୍ୟ ଏବଂ କାର୍ଯ୍ୟକ୍ଷମ ଦିଗଗୁଡ଼ିକୁ ଉଲ୍ଲେଖ କରାଯାଇଥିଲା, ଯାହା ଚଳିତ ଫେବ୍ରୁଆରି ମାସ ୨୮ ତାରିଖରେ ହେବାକୁ ଯାଉଛି।
