ନୂଆଦିଲ୍ଲୀ : ଏବେ ଏକଜୁଟ୍ ହେବାର ଆବଶ୍ୟକତା ରହିଛି। ପହଲଗାମ୍ ଆକ୍ରମଣର ପ୍ରତିଶୋଧ ସ୍ବରୂପ ମଙ୍ଗଳବାର ମଧ୍ୟରାତ୍ରିରେ ପାକିସ୍ତାନର ୯ଟି ଆତଙ୍କୀ ଆଡ୍ଡା ଉପରେ ଏୟାରଷ୍ଟ୍ରାଇକ୍ କରିବା ପରେ ଏଭଳି କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ଗୁରୁବାର ଦିନ ‘ଅପରେସନ୍ ସିନ୍ଦୂର’ ବିଷୟରେ ସମସ୍ତ ଦଳକୁ ସୂଚନା ଦେବା ସମୟରେ ପ୍ରଧାନମନ୍ତ୍ରୀ ବିରୋଧୀ ଦଳଗୁଡ଼ିକୁ ଏକତ୍ରିତ ହେବାକୁ ଅନୁରୋଧ କରିଛନ୍ତି। ଏହା ସହ ଭାରତ, ପାକିସ୍ତାନରେ ଥିବା ଆତଙ୍କବାଦୀ ଶିବିର ଉପରେ ଆକ୍ରମଣ କରିବା ସମୟରେ ସଶସ୍ତ୍ର ବାହିନୀର ବୀରତ୍ୱ ବିଷୟରେ ବିରୋଧୀ ଦଳଗୁଡ଼ିକୁ କୁହାଯାଇଛି। ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହଙ୍କ ଅଧ୍ୟକ୍ଷତାରେ ଅନୁଷ୍ଠିତ ସର୍ବଦଳୀୟ ବୈଠକରେ ଗୃହମନ୍ତ୍ରୀ ଅମିତ ଶାହ, ବୈଦେଶିକ ମନ୍ତ୍ରୀ ଏସ୍ ଜୟଶଙ୍କର, କେନ୍ଦ୍ରମନ୍ତ୍ରୀ ଜେପି ନଡ୍ଡା ଏବଂ ନିର୍ମଳା ସୀତାରମଣ ଯୋଗ ଦେଇଥିଲେ। ରାହୁଲ ଗାନ୍ଧୀ ଏବଂ ମଲ୍ଲିକାର୍ଜୁନ ଖାଡଗେ କଂଗ୍ରେସ ପକ୍ଷରୁ ପ୍ରତିନିଧିତ୍ୱ କରିଥିବା ବେଳେ, ତୃଣମୂଳ କଂଗ୍ରେସ ପକ୍ଷରୁ ସନ୍ଦୀପ ବନ୍ଦୋପାଧ୍ୟାୟ ଏବଂ ଡିଏମକେର ଟିଆର ବାଲୁ ବୈଠକରେ ଯୋଗ ଦେଇଥିଲେ।
ଭାରତୀୟ ସେନାର ଅପରେସନ ସିନ୍ଦୂର ଏବେ ମଧ୍ୟ ଜାରି ରହିଛି ଏବଂ ପାକିସ୍ତାନ ଉପରେ ମିସାଇଲ ଆକ୍ରମଣର ତୀବ୍ରତା ଆହୁରି ବୃଦ୍ଧି ପାଇବ ବୋଲି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଘୋଷଣା କରିଛନ୍ତି। ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣର ପ୍ରତିଶୋଧ ସ୍ୱରୂପ ଭାରତ ପାକିସ୍ତାନ ଏବଂ ପାକିସ୍ତାନ ଅଧିକୃତ କାଶ୍ମୀରରେ ଆତଙ୍କବାଦୀଙ୍କ ଅଡ୍ଡା ଉପରେ ଲଗାତାର ମିସାଇଲ ଆକ୍ରମଣ କରୁଛି। ଏହି ଅଭିଯାନରେ ଜୈଶ-ଏ-ମହମ୍ମଦ ଏବଂ ଲସ୍କର-ଏ-ତୈୟବା ପରି ଆତଙ୍କବାଦୀ ସଂଗଠନଙ୍କ ଅନେକ ଠିକଣା ଧ୍ୱଂସ କରାଯାଇଛି। ରାଜନାଥ ସିଂହ ସର୍ବଦଳୀୟ ବୈଠକ ପରେ ଗଣମାଧ୍ୟମକୁ କହିଛନ୍ତି, “ଆମେ ଆତଙ୍କବାଦକୁ କୌଣସି ମୂଲ୍ୟରେ ବରଦାସ୍ତ କରିବୁ ନାହିଁ। ପାକିସ୍ତାନ ଯଦି ଭାରତକୁ ପରମାଣୁ ଆକ୍ରମଣର ଧମକ ଦେଉଛି, ତେବେ ଆମେ ମଧ୍ୟ ତା’ର ଜବାବ ଦେବା ପାଇଁ ପ୍ରସ୍ତୁତ। ଅପରେସନ ସିନ୍ଦୂର କେବଳ ଆରମ୍ଭ, ଆଗକୁ ଆମର କାର୍ଯ୍ୟାନୁଷ୍ଠାନ ଆହୁରି କଠୋର ହେବ।”
ସୂଚନାଯୋଗ୍ୟ, ପାକିସ୍ତାନ ଲଗାତାର ଭାରତକୁ ପରମାଣୁ ଆକ୍ରମଣର ଧମକ ଦେଉଛି, ଯାହା ଦୁଇ ଦେଶ ମଧ୍ୟରେ ଉତ୍ତେଜନାକୁ ଆହୁରି ବୃଦ୍ଧି କରିଛି। ତେବେ, ଭାରତର ଏହି ଦୃଢ଼ ପଦକ୍ଷେପ ପାକିସ୍ତାନକୁ ଏକ ସ୍ପଷ୍ଟ ବାର୍ତ୍ତା ଦେଇଛି ଯେ ଆତଙ୍କବାଦୀ କାର୍ଯ୍ୟକଳାପକୁ କୌଣସି ଅବସ୍ଥାରେ ସହ୍ୟ କରାଯିବ ନାହିଁ। ଏହି ଅଭିଯାନରେ ଭାରତୀ ସେନାର ଉନ୍ନତ ମିସାଇଲ ତଥା ଡ୍ରୋନ ଟେକ୍ନୋଲୋଜିର ବ୍ୟବହାର କରାଯାଉଛି, ଯାହା ଆତଙ୍କବାଦୀ ଅଡ୍ଡାକୁ ନିର୍ଦ୍ଦିଷ୍ଟ ଭାବେ ଟାର୍ଗେଟ କରୁଛି। ସେନା ସୂତ୍ରରୁ ମିଳିଥିବା ଖବର ଅନୁଯାୟୀ, ଏହି ଅପରେସନରେ ଅନେକ ବରିଷ୍ଠ ଆତଙ୍କବାଦୀ ନେତା ମଧ୍ୟ ନିହତ ହୋଇଛନ୍ତି। ଜାତୀୟ ସୁରକ୍ଷା ପରିଷଦର ଜରୁରୀ ବୈଠକରେ ମଧ୍ୟ ଏହି ଅଭିଯାନକୁ ଆହୁରି ତୀବ୍ର କରିବା ପାଇଁ ନିଷ୍ପତ୍ତି ନିଆଯାଇଛି। ରାଜନାଥ ସିଂହଙ୍କ ଏହି ଦୃଢ଼ ବୟାନ ଦେଶବାସୀଙ୍କ ମନୋବଳକୁ ଆହୁରି ଉଚ୍ଚ କରିଛି। ସେ କହିଛନ୍ତି, “ଭାରତ ଶାନ୍ତି ଚାହେଁ, କିନ୍ତୁ ଆମର ସୁରକ୍ଷା ସହ କୌଣସି ଆପୋଷ କରାଯିବ ନାହିଁ।”
