ଭୁବନେଶ୍ବର: ଅକ୍ଟୋବର ମାସ ପ୍ରଥମ ସପ୍ତାହ ଯାଇ ଦ୍ବିତୀୟ ସପ୍ତାହ ହେଲାଣି । ତଥାପି ରାଜ୍ୟରେ ଛେଚୁଚି ବର୍ଷା । ପୂର୍ବାହ୍ନରେ ଖରାଦିନ ଭଳି ଖରା ହେଉଛି, ଅପରାହ୍ନରେ ଘୋଟି ଆସୁଛି କଳାହାଣ୍ଡିଆ ମେଘ । ଆଉ ମାଠିଆରୁ ଢାଳିଲା ଭଳି ଢ଼ାଳୁଛି । ଏତେ ଜୋରରେ ବର୍ଷୁଛି ଯେ ମାତ୍ର କିଛି ସମୟରେ ବେହାଲ ହେଉଛି ଓଡ଼ିଶା। ସକାଳୁ ଖରାଟିଆ ପାଗ ହୋଇଥିବାବେଳ ହଠାତ୍ ମଧ୍ୟାହ୍ନରେ ଘୋଟି ଆସିଥିଲା କଳାହାଣ୍ଡିଆ ମେଘ । ଚର୍ତୁଦିଗ ଅନ୍ଧକାର କରି ମୂଷଳ ଧାରାରେ ବର୍ଷିଥିଲା । ଏତେ ଜୋରରେ ଢ଼ାଳିଥିଲା ଯେ ମାତ୍ର କିଛି ସମୟ ସମୟରେ ରାଜଧାନୀରେ ବନ୍ୟାର ଭ୍ରମ ସୃଷ୍ଟି ହୋଇଥିଲା । ଯୁଆଡେ ଚାହିଁବ ଖାଲି ଖାଲି ପାଣି ହିଁ ଦେଖାଯାଉଥିଲା । ରାସ୍ତାରେ ଗାଡି ମଟର ଯିବା ଏକ ପ୍ରକାର ଅସମ୍ଭବ ହୋଇପଡିଥିଲା । ଜନପଥ, ବମିଖାଲ, ରାଜମହଲ ଭଳି ସ୍ଥାନରେ ଭୟଙ୍କର ସ୍ଥିତି ଉପୁଜିଥିଲା । ରାସ୍ତାରେ ଆଣ୍ଠୁଏ ଉଚ୍ଚର ପାଣି ଚାଲିବାରୁ ଯାତାୟତ ବାଧାପ୍ରାପ୍ତ ହୋଇଥିଲା । ଫଳରେ ଟ୍ରାଫିକ୍ ସମସ୍ୟା ସୃଷ୍ଟି ହୋଇଥିଲା । ଓସକାର ସିଟି ଭଳି ତଳିଆ ଅଂଚଳରେ ଲୋକଙ୍କ ଘରେ ପାଣି ପଶିଛି ।
ପାଣିପାଗ ବିଭାଗର ଆକଳନ ଅନୁସାରେ ପ୍ରାୟ ଅଧା ଓଡ଼ିଶାରେ ବର୍ଷା ହୋଇଛି । ସବୁଠି ସମାନ ସ୍ଥିତି । ବିଶେଷକରି ଉପକୂଳ ଓ ଉତ୍ତର-ଆଭ୍ୟନ୍ତରୀଣ ଓଡ଼ିଶାରେ ପ୍ରବଳ ବର୍ଷିଛି । ଆଗାମି ୩ଦିନ ପର୍ଯ୍ୟନ୍ତ ଏଭଳି ପ୍ରଭାବ ଜାରି ରହିବ ବୋଲି ଆକଳନ କରିଛି ଆଇଏମଡି । ଆଇଏମଡିର ଆକଳନ ଅନୁସାରେ, କାଲି ସକାଳ ପର୍ଯ୍ୟନ୍ତ ଉପକୂଳ, ଉତ୍ତର-ଓଡ଼ିଶା, ଆଭ୍ୟନ୍ତରୀଣ ଓଡ଼ିଶାର ୨୪ ଜିଲ୍ଲାରେ ବର୍ଷା ହେବାର ସମ୍ଭାବନା ରହିଛି । ତାପରେ ଦିନ ତମାମ ୨୦ରୁ ଅଧିକ ଜିଲ୍ଲାରେ ପବନ ସହ ବର୍ଷା ହେବାର ସମ୍ଭାବନା ରହିଛି । ତେବେ ପାଣିପାଗର ପାରିପାର୍ଶ୍ବକ ସ୍ଥିତିକୁ ଦେଖି ଅକ୍ଟୋବରରେ ବାତ୍ୟା ଆଶଙ୍କା କମ୍ ରହିଛି । ନଭେମ୍ବରରେ ବାତ୍ୟା ଆଶଙ୍କା ଅଧିକ ରହିଛି ବୋଲି କହିଛନ୍ତି ଆଇଏମଡି ପୂର୍ବତନ ଡିଜି । କାର୍ତ୍ତିକ ମାସରେ ପାଣିପାଗର ଏଭଳି ଖେଳ ସମସ୍ତଙ୍କୁ ଚିନ୍ତାରେ ପକାଇଛି ।
ଏଥିସହ ୧୦ ତାରିଖ ବେଳକୁ ଉତ୍ତର-ବଙ୍ଗୋପସାଗର ଅଞ୍ଚଳରେ ପୁଣି ଏକ ଘୂର୍ଣ୍ଣିବଳୟ ସୃଷ୍ଟି ହେବାର ସମ୍ଭାବନା ରହିଛି। ଏହା ବିଶେଷ ଘନୀଭୂତ ହେବାର ସମ୍ଭାବନା ନାହିଁ। ତଥାପି କିଛି ସ୍ଥାନରେ ବିଜୁଳି ଘଡଘଡି ସହ ବର୍ଷା ଜାରି ରହିବ। ଓଡ଼ିଶାରୁ ମୌସୁମୀ ବିଦାୟ ନେବାର ସମୟ ୧୫ ତାରିଖ ହୋଇଥିବା ବେଳେ ଆଗାମୀ ୫ ଦିନରେ ମୌସୁମୀ ବିଦାୟ ନେବା ପାଇଁ ପାଗ ଅନୁକୂଳ ନଥିବା ଆଂଚଳିକ ପାଣିପାଗ ବିଭାଗ ନିର୍ଦ୍ଦେଶିକା ମନୋରମା ମହାନ୍ତି ସୂଚନା ଦେଇଥିବା ବେଳେ ପାଣିପାଗ ବିଶେଷଜ୍ଞଙ୍କ ଆକଳନ ୧୭ ଅକ୍ଟୋବର (+-3 ଦିନ) ପରେ ରାଜ୍ୟରୁ ଧୀରେ ଧୀରେ ବାୟୁ ଚଳାଚଳର ଦିଗ ବଦଳିବା ସହିତ ପଶ୍ଚିମ ଓଡ଼ିଶାର କିଛି ସ୍ଥାନରୁ ମୌସୁମୀ ବାୟୁ ବିଦାୟ ନେବା ପାଇଁ ପାଗ ଅନୁକୂଳ ହେବ ।
ତେବେ ଆଜି ମଧ୍ୟ ରାଜ୍ୟରେ ଜାରି ରହିବ ବଜ୍ରପାତ ଜନିତ ବର୍ଷା । ଆଜିଠାରୁ ଆସନ୍ତାକାଲି ସକାଳ ସାଢ଼େ ୮ଟା ଯାଏଁ ୨୪ଟି ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି କରାଯାଇଛି। ମାଲକାନଗିରି, କୋରାପୁଟ, ଖୋର୍ଦ୍ଧା, ପୁରୀ , କଟକ , କେନ୍ଦ୍ରାପଡ଼ା ପାଇଁ ୟେଲୋ ୱାର୍ଣ୍ଣିଂ ଜାରି କରାଯାଇଛି । ୧୦ ତାରିଖ ପାଇଁ ସାରା ଓଡ଼ିଶାର ସବୁ ଜିଲ୍ଲା ପାଇଁ ୟେଲୋ ୱାର୍ଣ୍ଣିଂ ଜାରି କରାଯାଇଛି ।
