ପାରାଦୀପ: ପାରାଦୀପ ବନ୍ଦର ଓ ବୃହତ୍ ବନ୍ଦର କ୍ରୀଡ଼ା ନିୟନ୍ତ୍ରଣ ବୋର୍ଡର ମିଳିତ ଆନୁକୁଲ୍ୟରେ ଆୟୋଜିତ ୨୫ତମ ବୃହତ୍ ବନ୍ଦର ସାଂସ୍କୃତିକ ପ୍ରତିଯୋଗିତା ୨୦୨୫-୨୬ ଜାନୁଆରୀ ୮ତାରିଖ ଦିନ ଅପରାହ୍ନରେ ପାରାଦୀପର ବାଣୀପୀଠ ଜୟଦେବ ସଦନ ଠାରେ ଉଦ୍ଘାଟିତ ହୋଇଯାଇଛି । ଗୋପବନ୍ଧୁ କ୍ରୀଡ଼ା ସଂସଦର ସଭାପତି ତଥା ପାରାଦୀପ ବନ୍ଦରର ମୁଖ୍ୟ ଯନ୍ତ୍ରୀ ଇଞ୍ଜିନିୟର ହିମାଂଶୁ ରାଉତଙ୍କ ଅଧ୍ୟକ୍ଷତାରେ ଆୟୋଜିତ ଉଦ୍ଘାଟନୀ କାର୍ଯ୍ୟକ୍ରମରେ ମୁଖ୍ୟ ଅତିଥି ବନ୍ଦର ଅଧ୍ୟକ୍ଷ ପି ଏଲ ହରନାଧ ସମାରୋହକୁ ଆନୁଷ୍ଠାନିକ ଭାବେ ଉଦଘାଟନ କରିଥିଲେ । ଉପସ୍ଥିତ ଜନତାଙ୍କୁ ସମ୍ବୋଧିତ କରି ସେ କହିଥିଲେ ଯେ ସଂସ୍କୃତି ମାନବ ଆତ୍ମାର ଆଭ୍ୟନ୍ତରୀଣ ସୁନ୍ଦରତା କୁ ପ୍ରତିଫଳିତ କରେ ଏବଂ ଏକତା ଓ ସଦ୍ଭାବନାକୁ ପ୍ରୋତ୍ସାହିତ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରେ । ସେ କହିଥିଲେ ଯେ ସମୃଦ୍ଧ ସାଂସ୍କୃତିକ ଐତିହ୍ୟ, ଶାସ୍ତ୍ରୀୟ ଓଡ଼ିଶୀ ନୃତ୍ୟ ଏବଂ କଳାତ୍ମକ ଉତ୍କର୍ଷତା ପାଇଁ ପ୍ରସିଧ ଓଡ଼ିଶା ରାଜ୍ୟରେ ସାଂସ୍କୃତିକ ସମାରୋହର ୨୫ତମ ସଂସ୍କରଣ ଆୟୋଜନ କରିବା ପାରାଦୀପ ବନ୍ଦର ପାଇଁ ଗର୍ବର ବିଷୟ । ବିଭିନ୍ନ ବନ୍ଦରରୁ ଆସିଥିବା ୨୦୦ରୁ ଅଧିକ ପ୍ରତିଯୋଗୀ ମାନଙ୍କର ପାରାଦୀପରେ ରହଣି ସୁଖମୟ ହେବା ବୋଲି ଆଶା କରିଥିଲେ । ସଂସଦର କାର୍ଯ୍ୟକାରୀ ସଭାପତି ଡକ୍ଟର ଦୁର୍ଗା ପ୍ରସାଦ ସେଠୀ ସ୍ବାଗତ ଭାଷଣ ଦେଇଥିଲେ । ଏହି ଉଦ୍ଘାଟନୀ କାର୍ଯ୍ୟକ୍ରମରେ ବନ୍ଦରର ବିଭାଗ ମୁଖ୍ୟ ମାନେ ତଥା ବରିଷ୍ଠ ଅଧିକାରୀ ଓ କର୍ମଚାରୀ ବହୁ ସଂଖ୍ୟାରେ ଉପସ୍ଥିତ ଥିଲେ । ଏହି ପ୍ରତିଯୋଗିତାରେ ଆୟୋଜକ ପାରାଦୀପ ବନ୍ଦର ସମେତ ଭାରତର ୯ ଗୋଟି ବୃହତ୍ ବନ୍ଦର ଅଂଶ ଗ୍ରହଣ କରୁଛନ୍ତି । ୪ ଦିନ ଧରି ଆୟୋଜିତ ହେବାକୁ ଯାଉଥିବା ଏହି ପ୍ରତିଯୋଗିତାର ପ୍ରଥମ ଦିନ ମୁମ୍ବାଇ ଓ ବିଶାଖାପାଟଣା ବନ୍ଦର ସେମାନଙ୍କର କଳା ନୈପୁଣ୍ୟ ପ୍ରଦର୍ଶନ କରିଥିଲେ ଯେଉଁଥିରେ ନିଜ ନିଜ ରାଜ୍ୟର ସଂସ୍କୃତିର ଝଲକ ଦେଖିବାକୁ ମିଳିଥିଲା । ଭାଷାର ବିଭିନ୍ନତା ଥାଇ ମଧ୍ୟ କଳାକାର ମାନଙ୍କର ପ୍ରଦର୍ଶନ ଉପସ୍ଥିତ ଦର୍ଶକଙ୍କୁ ଭରପୁର ମନୋରଞ୍ଜନ ଦେଇଥିଲା । ପରିଶେଷରେ ସଂସଦର ସମ୍ପାଦକ ଧୂନ ଚନ୍ଦ୍ର ତରାଇ ଧନ୍ୟବାଦ୍ ଅର୍ପଣ କରିଥିଲେ ।
