ଦୁନିଆର ସବୁଠାରୁ ବୃହତ ସମବାୟ ସଂସ୍ଥା ଇଫକୋ: ଅମିତ୍ ଶାହା
ପାରାଦୀପ: ୨୦୦୫ରେ ପାରାଦୀପର ଏକ ଘରୋଇ କମ୍ପାନୀ ଠାରୁ ଇଫକୋ ଯେତେବେଳେ ଏହି ସାର କାରଖାନାକୁ ୨୫୦୦ କୋଟି ଟଙ୍କାରେ କିଣିଥିଲା ସେତେବେଳେ ବାର୍ଷିକ ଉତ୍ପାଦନ ଥିଲା ମାତ୍ର୭.୫ମିଲିୟନ ଟନ୍। ଏବେ ବାର୍ଷିକ ଉତ୍ପାଦନ କ୍ଷମତା ୨୨ ଲକ୍ଷ ମେଟ୍ରିକ ଟନ୍ ହେଉଛି।ଏବଂ ବିଶ୍ବର ପ୍ରଥମ ନାନୋ ତରଳ ସାର ଏହି କାରଖାନାରୁ ଉତ୍ପାଦନ ହୋଇଛି।ଏବେ ବିଶ୍ବର ଅନେକ ଦେଶକୁ ଇଫକୋ ଏହି ନାନୋ ତରଳ ସାର ରପ୍ତାନୀ କଲାଣି। ସମବାୟ ସଂସ୍ଥା ଭାବେ ଏହା ଦୁନିଆର ସବୁଠାରୁ ବୃହତ ବୋଲି ବୋଲି କେନ୍ଦ୍ର ଗୃହ ଓ ସମବାୟ ମନ୍ତ୍ରୀ ଅମିତ୍ ଶାହା କହିଛନ୍ତି। ପାରାଦୀପ ଇଫକୋ କାରଖାନା ପରିସରରେ ଶୁକ୍ରବାର ଅପରାହ୍ନରେ ମନ୍ତ୍ରୀ ଶାହା ସଲଫୁରିକ୍ ଏସିଡ୍ କାରଖାନା ୩ ର ଲୋକାର୍ପଣ କରିବା ଅବସରରେ ଏହା କହିଥିଲେ।ଶାହାଙ୍କ ଅଭିଭାଷଣ ଜୟ ଜଗନ୍ନାଥରୁ ଆରମ୍ଭ ହୋଇଥିଲା।ସାଧାରଣ ନିର୍ବାଚନ ପରେ ଏହା ତାଙ୍କର ପ୍ରଥମ ସାର୍ବଜନିକ ଗସ୍ତ ବୋଲି କହିଥିଲେ।ସେ କହିଥିଲେ ଏବେ ଡବଲ ଇଞ୍ଜିନ୍ ସରକାର ବିକାଶ ପଥରେ ଆଗେଇ ଚାଲିଛି।ମୁଁ କଥା ଏବଂ ଭରସା ଦେଉଛି ଓଡିଶା ଦେଖୁଦେଖୁ ବିକଶିତ ହେବ।ଓଡ଼ିଶାର ମାଟି ତଳେ ଅନେକ ସମ୍ପଦ ରହିଛି।ମହାନଦୀ ପାଖରେ ଉର୍ବର ଜମି, ବିସ୍ତିର୍ଣ୍ଣ ସମୁଦ୍ର ଊପକୂଳ,ଚିଲିକା ଅଛି।ନୂଆ ସରକାର ଏହାର ଭିତ୍ତିଭୂମି ବିକାଶ ପାଇଁ ଖସଡ଼ା କଲେଣି।ଆସନ୍ତା ଦିନରେ ଗୁଜରାଟ ଭଳି ଓଡିଶା ବିକାଶ ହେବ।ସମବାୟ ଜରିଆରେ ଗ୍ରାମୀଣ ମହିଳା, ଜନଜାତି, ଓବିସି,ମତ୍ସ୍ୟଜୀବୀ ଙ୍କୁ ସାମିଲ କରାଯିବ।ଏହି ବ୍ୟବସ୍ଥାରେ ପ୍ରତି ଗାଁରେ ଡାଏରୀ ପହଞ୍ଚିବ।ଗୁଜରାଟ ଅମୁଲ୍ ଉଦାହରଣ ଦେଇ କହିଥିଲେ,୩୬ ଲକ୍ଷ ଗ୍ରାମୀଣ ମହିଳାଙ୍କୁ ଏଥିରେ ସାମିଲ କରାଯାଇଛି ଏବଂ ବାର୍ଷିକ ୧ଲକ୍ଷ୩୦ହଜାର କୋଟି ଟଙ୍କାର ବେପାର କରୁଛି।ସେହିଭଳି ଓଡ଼ିଶାର ଗ୍ରାମୀଣ ବର୍ଗଙ୍କ ବିକାଶ ପାଇଁ କେନ୍ଦ୍ର ଓ ରାଜ୍ୟ ସରକାର ବଦ୍ଧପରିକର ବୋଲି ସେ କହିଥିଲେ।
ଇଫକୋ ପ୍ରସଙ୍ଗରେ କହିଥିଲେ,ଇଫକୋ ହେଉଛି ଦୁନିଆର ସବୁଠାରୁ ବଡ଼ ସମବାୟ ସଂସ୍ଥା।ଏହା ଅଧିନରେ ୩୬ ହଜାର ସମବାୟ ୟୁନିଟ୍ ଓ ୫ କୋଟି କୃଷକ ଏହାର ଅସଲ ମାଲିକ।ବାର୍ଷିକ ୩୮ଶହ କୋଟି ଟଙ୍କାର ଲାଭାଂଶ ଦେଶର ୫ କୋଟି କୃଷକ ପାଇଥାନ୍ତି।ଯାହା ଇଫକୋର ଅସଲି ଶକ୍ତି। ଏବେ ଇଫକୋ ସଲଫୁରିକ୍ ଆବଶ୍ୟକତା ପାଇଁ ଆଉ ବିଦେଶ ଉପରେ ନିର୍ଭରଶୀଳ ହେବନାହିଁ।ଆଶା କରୁଛି ଆଗାମୀ ଦିନରେ ଇଫକୋ ସମସ୍ତ ସାର କାରଖାନାର ସଲଫୁରିକ୍ ଆବଶ୍ୟକତା ପୁରଣ କରିବ।
ମୁଖ୍ୟମନ୍ତ୍ରୀ ମୋହନ ମାଝୀ ତାଙ୍କ ବକ୍ତବ୍ୟରେ କହିଥିଲେ ଗୃହ ମନ୍ତ୍ରୀ ଶାହାଙ୍କୁ ପାରାଦୀପ ପୋର୍ଟ ସହର ସ୍ବାଗତ କରୁଛି।ପାରାଦୀପ ହେଉଛି ଉଦୀୟମାନ ସହର, ଓ ସମୃଦ୍ଧିର ପ୍ରତିବିମ୍ବ।ଦେଶର ପଣ୍ୟ କାରବାର କ୍ଷେତ୍ରରେ ଏବେ ପ୍ରଥମ ସ୍ଥାନ ପାଇଛି।ଆଗକୁ ଏସିଆ ମହାଦେଶର ଗେଟ୍ ଓ୍ବେ (ପ୍ରବେଶ ପଥ)ହେବାକୁ ଯାଉଛି।ଓଡ଼ିଶା ବିକାଶର ପ୍ରୟୋଗଶାଳା ପାରାଦୀପ ବୋଲି ସେ କହିଥିଲେ।ୟୁରିଆ ସାର ଉତ୍ପାଦନ କ୍ଷେତ୍ରରେ ଇଫକୋ ଦେଶର ଅଗ୍ରଣୀ ଭୂମିକା ନେଉଛି।ଆଗକୁ ସମବାୟ ଯୁଗର ଆରମ୍ଭ ହେବାକୁ ଯାଉଛି ବୋଲି ସେ କହିଥିଲେ।
କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ତାଙ୍କ ବକ୍ତବ୍ୟରେ କହିଥିଲେ, ପ୍ରଧାନମନ୍ତ୍ରୀ ଗତ ୧୦ ବର୍ଷ ତଳେ ପାରାଦୀପ ଗସ୍ତ ଅବସରରେ କହିଥିଲେ ଏହା ପୂର୍ବ ଭାରତର ବିକାଶ ପଥ ହେବ।ଯାହା ଏବେ ସାକାର ହେବାକୁ ଯାଉଛି।ପାରାଦୀପରୁ ତାଳଚେର ପର୍ଯ୍ୟନ୍ତ ନଦୀ ପଥ ବିକାଶ ଠାରୁ ଅନେକ ଯୋଜନା ଏବେ ହାତକୁ ନିଆଯାଇଛି।ସମବାୟ ଜରିଆରେ ସବୁ ବର୍ଗର ଲୋକଙ୍କୁ ଯୋଡାଯିବାକୁ ଯୋଜନା ରହିଛି।ଆଗକୁ ସେହି ଗ୍ରାମୀଣ ଲୋକ ସମବାୟ ମାଧ୍ୟମରେ ମାଲିକ ହେବେ ବୋଲି ସେ କହିଥିଲେ।
ଅନ୍ୟମାନଙ୍କ ମଧ୍ୟରେ ସ୍ଥାନୀୟ ବିଧାୟକ ତଥା ଶିଳ୍ପ ମନ୍ତ୍ରୀ ସମ୍ପଦ ସ୍ବାଇଁ, ଜଗତସିଂହପୁର ଏମପି ବିଭୁପ୍ରସାଦ ତରାଇ, ଜଗତସିଂହପୁର ବିଧାୟକ ଅମରେନ୍ଦ୍ର ଦାଶ, କେନ୍ଦ୍ର ସମବାୟ ସଚିବ ଆଶିଷ କୁମାର ଭୁଟାନୀ ପ୍ରମୁଖ ଉପସ୍ଥିତ ଥିଲେ।ଆରମ୍ଭରେ ଇଫକୋ ପରିଚାଳନା ନିର୍ଦ୍ଦେଶକ କେ ଜେ ପଟେଲ ସ୍ବାଗତ ବକ୍ତବ୍ୟ ରଖିବା ସହ ଇଫକୋ ସଲଫୁରିକ୍ ଏସିଡ୍ କାରଖାନା ସମ୍ପର୍କରେ ସୂଚନା ଦେଇଥିଲେ।ଇଫକୋ ଅଧ୍ୟକ୍ଷ ଦିଲ୍ଲୀପ ସାଂଘାନୀ ତାଙ୍କ ବକ୍ତବ୍ୟରେ ଭବିଷ୍ୟତ କାର୍ଯ୍ୟପନ୍ଥା ଉପରେ ଆଲୋକପାତ କରିଥିଲେ।ଏବଂ ଶେଷରେ ପାରାଦୀପ ୟୁନିଟ୍ ମୁଖ୍ୟ ପ୍ରଦୀପ କୁମାର ମହାପାତ୍ର ଧନ୍ୟବାଦ ଦେଇଥିଲେ।ଏହି ସମାବେଶରେ ଇଫକୋ ନିର୍ଦ୍ଦେଶକ ମଣ୍ଡଳୀ ଉପସ୍ଥିତ ଥିଲେ।
