ଜଳୁଛି ପଶ୍ଚିମ ଓଡ଼ିଶାର ଅଧିକାଂଶ ସ୍ଥାନ
ଭୁବନେଶ୍ୱର: ଆହୁରି ୫ ଦିନ ଜଳିବ ଓଡ଼ିଶା । ଗୁଳୁଗୁଳିରେ ସନ୍ତୁଳି ହେବ ଉପକୂଳ । ପୂରା ରାଜ୍ୟ ଗରମ ଓ ଗୁଳୁଗୁଳିରେ ଆଉଟୁ ପାଉଟୁ ହେଉଥିବା ବେଳେ,୨୭ ତାରିଖ ଯାଏଁ ଏଭଳି ଗ୍ରୀଷ୍ମପ୍ରବାହ ସ୍ଥିତି ଲାଗି ରହିବ । ତା ପରେ ତାପମାତ୍ରାରେ ସାମାନ୍ୟ ହ୍ରାସ ଘଟିବ ବୋଲି ପୂର୍ବାନୁମାନ କରିଛି ପାଣିପାଗ ବିଭାଗ ।
ମୁଣ୍ଡ ଉପରେ ଖସୁଛି ନିଆଁହୁଳା ପାଦତଳେ ଜଳୁଛି ରଡ଼ ଅଙ୍ଗାର । ମଝିରେ ପୋଡ଼ପିଠା ଭଳି ସିଝିଚାଲିଛି ଜୀବଜଗତ । ସତେ ଯେମିତି ଗ୍ୟାସ୍ ଚାମ୍ବର୍ ଭିତରେ ସଢ଼ୁଛି ମଣିଷ । କେଇ ମିନିଟ୍ ଖରାରେ ରହିବା ମୁସ୍କିଲ । ମୁଣ୍ଡ ବୁଲାଇ ଦେଉଛି, ଦେହ ଝାଇଁ ମାରିଯାଉଛି । ବହୁଛି ତତଲା ପବନ । ନିଶ୍ୱାସ ପ୍ରଶ୍ୱାସରେ ବି ନିଆଁ ଧାସ । ଦିନ ତ ଦିନ, ରାତିରେ ବି ତ୍ରାହି ନାହିଁ । ଏସି କି ଫ୍ୟାନ୍ ନଥିଲେ, ଦେହରୁ ଗମ୍ ଗମ୍ ଝାଳ ବୋହି ଚାଲିଛି । ଏ ବର୍ଷ ଖରାଦିନ କେବେ ସରିବ, ମୌସୁମୀ କେବେ ଭିଜାଇବ, ତାକୁ ହିଁ ଚାତକ ଭଳି ଚାହିଁ ବସିଛନ୍ତି ସମସ୍ତେ ।
ପ୍ରାୟ ସପ୍ତାହେ ଧରି ରେକର୍ଡ ପରେ ରେକର୍ଡ ଭାଙ୍ଗୁଥିବା ତାତି, ଆହୁରି ୫ ଦିନ ଅର୍ଥାତ୍ ୨୭ ତାରିଖ ଯାଏଁ କଲବଲ କରିବ । ୨୮ରୁ ପାରଦ ଧିରେ ଧିରେ ଖସିବ ବୋଲି ପୂର୍ବାନୁମାନ କରିଛି ପାଣିପାଗ ବିଭାଗ । ୫ ଦିନ ଯାଏଁ ସର୍ବାଧିକ ତାପମାତ୍ରାରେ ବିଶେଷ ପରିବର୍ତ୍ତନ ହେବାର ସମ୍ଭାବନା ନାହିଁ । ଏହାପରେ ୨ରୁ ୩ ଡିଗ୍ରି କମିବ ତାତି । ଅତ୍ୟଧିକ ଗ୍ରୀଷ୍ମପ୍ରବାହ ସତର୍କତା ଭାବେ ଆସନ୍ତାକାଲି ପାଇଁ ଝାରସୁଗୁଡ଼ା, ସମ୍ୱଲପୁର ଓ ବଲାଙ୍ଗିର ଜିଲ୍ଲା ପାଇଁ ଜାରି ହୋଇଛି ଅରେଞ୍ଜ ୱାର୍ଣ୍ଣିଂ । ବଲାଙ୍ଗିରରେ ଉଷ୍ଣରାତି ଅନୁଭୂତ ହେବ । ଏଥିସହ ଗରମ ଓ ଗୁଳୁଗୁଳି ପାଇଁ ୧୪ ଜିଲ୍ଲାକୁ ଏବଂ କାଳବୈଶାଖୀ ପାଇଁ ୨୦ ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି ହୋଇଛି । ସେପଟେ ଦକ୍ଷିଣ-ପଶ୍ଚିମ ମୌସୁମୀ ବାୟୁ ପୁଣି ଆଗକୁ ବଢ଼ିଛି । ଆରବ ସାଗରର କିଛି ଅଂଶ, କୋମୋରିନ ଅଞ୍ଚଳ, ଦକ୍ଷିଣ-ପଶ୍ଚିମ, ଦକ୍ଷିଣ-ପୂର୍ବ ଓ ପୂର୍ବ-ମଧ୍ୟ ବଙ୍ଗୋପସାଗର ଏବଂ ଆଣ୍ଡାମାନ ସାଗରର ଅଧିକାଂଶ ଅଞ୍ଚଳକୁ ଅଗ୍ରସର ହୋଇଛି ।
