ଭୁବନେଶ୍ୱର, ଜୁଲାଇ 20: ଦେଶରେ ବାଇକ୍ ଟ୍ୟାକ୍ସି ପାଇଁ ପ୍ରମାଣଭିତ୍ତିକ, ସମନ୍ୱିତ ଓ ସନ୍ତୁଳିତ ନିୟାମକ ବ୍ୟବସ୍ଥା ଆବଶ୍ୟକ ବୋଲି କଟ୍ସ ଇଣ୍ଟରନ୍ୟାସନାଲ୍ର ଏକ ନୂଆ ରିପୋର୍ଟରେ କୁହାଯାଇଛି। ଏହା ଦ୍ୱାରା ବିଭିନ୍ନ ରାଜ୍ୟର ଭିନ୍ନ ଭିନ୍ନ ନିୟମ ଯୋଗୁଁ ସୃଷ୍ଟି ହେଉଥିବା ସମସ୍ୟା ଦୂର ହେବା ସହ ଗିଗ୍ କର୍ମୀଙ୍କ ଜୀବିକା, ପ୍ରଥମ ଓ ଶେଷ
ପର୍ଯ୍ୟାୟର ଯାତ୍ରା ସୁବିଧା ଏବଂ ଯାତ୍ରୀଙ୍କ ସୁରକ୍ଷା ସୁନିଶ୍ଚିତ ହୋଇପାରିବ।
‘ହାର୍ମୋନାଇଜିଂ ବାଇକ୍ ଟ୍ୟାକ୍ସି ରେଗୁଲେସନ୍ସ ଇନ୍ ଇଣ୍ଡିଆ: ଆନ୍ ଏଭିଡେନ୍ସ-ବେସ୍ଡ ଆସେସମେଣ୍ଟ ଆଣ୍ଡ ସଜେଷ୍ଟେଡ୍ ପାଥୱେଜ୍ ଫର୍ ରିଫର୍ମ’ ଶୀର୍ଷକ ଏହି ରିପୋର୍ଟକୁ ନୂଆଦିଲ୍ଲୀରେ ବିଜେପିର ଜାତୀୟ ମୁଖପାତ୍ର (ଆର୍ଥିକ ବ୍ୟାପାର) ଗୋପାଳ କୃଷ୍ଣ ଅଗ୍ରୱାଲ ଉନ୍ମୋଚନ କରିଥିଲେ।
ଏହି ଅବସରରେ ଅଗ୍ରୱାଲ କହିଥିଲେ, ଭାରତରେ ଜୀବନଯାପନକୁ ଅଧିକ ସହଜ କରିବା ଦିଗରେ ସମନ୍ୱିତ ସହରାଞ୍ଚଳ ପରିବହନ ବ୍ୟବସ୍ଥା ସଂଯୋଗ, ରୋଜଗାର, ଉତ୍ପାଦନଶୀଳତା ଓ ସ୍ଥାୟୀ ବିକାଶକୁ ବଳ ଦେଇପାରିବ।
ରିପୋର୍ଟରେ କୁହାଯାଇଛି ଯେ, ଦେଶର ବିଭିନ୍ନ ରାଜ୍ୟ ବାଇକ୍ ଟ୍ୟାକ୍ସି ପାଇଁ ଭିନ୍ନ ଭିନ୍ନ ନୀତି ଗ୍ରହଣ କରୁଥିବାରୁ ଯାତ୍ରୀ, ଗିଗ୍ କର୍ମୀ, ଅନ୍ଲାଇନ୍ ପ୍ଲାଟଫର୍ମ ଓ ସରକାରଙ୍କ ମଧ୍ୟରେ ଅନିଶ୍ଚିତତା ସୃଷ୍ଟି ହେଉଛି। ତେଣୁ ଦେଶବ୍ୟାପୀ ଏକ ସ୍ପଷ୍ଟ ଓ ସମାନ ନୀତିର ଆବଶ୍ୟକତା ରହିଛି।
ପ୍ରଥମ ଆଲୋଚନାଚକ୍ର “ରାଜ୍ୟଗୁଡ଼ିକ ମଧ୍ୟରେ ନିୟମାବଳୀର ସାମଞ୍ଜସ୍ୟ: ନୀତିଗତ ଓ ଆଇନଗତ ଅସ୍ପଷ୍ଟତାର ସମାଧାନ” ଶୀର୍ଷକରେ ଅନୁଷ୍ଠିତ ହୋଇଥିଲା। କଟ୍ସ ଇଣ୍ଟରନ୍ୟାସନାଲ୍ର ରିସର୍ଚ୍ଚ ନିର୍ଦ୍ଦେଶକ ଅମୋଲ କୁଲକର୍ଣ୍ଣୀ ଏହାକୁ ପରିଚାଳନା କରିଥିଲେ। ଏଥିରେ ଚିରାଲ୍ କନ୍ସଲ୍ଟିଂର ପ୍ରତିଷ୍ଠାତା ଓ ପ୍ରିନ୍ସିପାଲ୍ କନସଲଟାଣ୍ଟ ଛବି ବନ୍ସୱାଲ୍, ଉବର୍ ଇଣ୍ଡିଆ ଓ ଦକ୍ଷିଣ ଏସିଆର ପବ୍ଲିକ୍ ପଲିସି ଏବଂ ସରକାରୀ ସମ୍ପର୍କ ବିଭାଗ ମୁଖ୍ୟ ପରୋମା ଭଟ୍, ଆଇଆଇଆଇଟି ଦିଲ୍ଲୀର ସେଣ୍ଟର ଅଫ୍ ଏକ୍ସିଲେନ୍ସ ଅନ୍ ସସ୍ଟେନେବଲ୍ ମୋବିଲିଟିର ପ୍ରବେଶ ବିୟାନୀ, ରାପିଡୋର ଲ’, ପଲିସି ଓ ରେଗୁଲେସନ୍ ବିଭାଗର ସିନିୟର ମ୍ୟାନେଜର ଶାନ୍ତନୁ ଶର୍ମା ଏବଂ ଚେଜ୍ ଆଡଭାଇଜର୍ସର ସିନିୟର ଆକାଉଣ୍ଟ ଡାଇରେକ୍ଟର (ପବ୍ଲିକ୍ ପଲିସି) ନିଖିଲ ରାଠୀ ଯୋଗଦେଇଥିଲେ।
ଆଲୋଚନାରେ ଯାତ୍ରୀଙ୍କ ସୁରକ୍ଷା, କର୍ମୀଙ୍କ କଲ୍ୟାଣ, ନବସୃଷ୍ଟି, ଉପଭୋକ୍ତାଙ୍କ ପସନ୍ଦ ଏବଂ ନିୟାମକ ବ୍ୟବସ୍ଥାର ସ୍ଥିରତାକୁ ସନ୍ତୁଳିତ ରଖିବା ପାଇଁ ପ୍ରମାଣଭିତ୍ତିକ ଓ ସମନ୍ୱିତ ନିୟମାବଳୀର ଆବଶ୍ୟକତା ଉପରେ ଗୁରୁତ୍ୱ ଦିଆଯାଇଥିଲା। ବକ୍ତାମାନେ କହିଥିଲେ ଯେ, ସୁଲଭ ସ୍ୱଳ୍ପ ଦୂରତାର ଯାତ୍ରା, ପ୍ରଥମ ଓ ଶେଷ ପର୍ଯ୍ୟାୟର ସଂଯୋଗ ଏବଂ ରୋଜଗାର ସୃଷ୍ଟିରେ ବାଇକ୍ ଟ୍ୟାକ୍ସି ଗୁରୁତ୍ୱପୂର୍ଣ୍ଣ ଭୂମିକା ନିଭାଉଥିବାରୁ ଏହାକୁ ଭାରତର ବ୍ୟାପକ ସହରୀୟ ପରିବହନ ବ୍ୟବସ୍ଥାର ଏକ ଅଂଶ ଭାବେ ଦେଖିବା ଉଚିତ।
କଟ୍ସ ଇଣ୍ଟରନ୍ୟାସନାଲ୍ ପ୍ରମାଣଭିତ୍ତିକ ନୀତି ପ୍ରଣୟନକୁ ସମର୍ଥନ କରିବା ସହ ସରକାର, ଶିଳ୍ପ, ଶିକ୍ଷାନୁଷ୍ଠାନ ଓ ସାମାଜିକ ସଂଗଠନମାନଙ୍କ ମଧ୍ୟରେ ନିରନ୍ତର ସହଯୋଗ ବଢ଼ାଇ ସ୍ୱଚ୍ଛ, ପୂର୍ବାନୁମାନଯୋଗ୍ୟ ଏବଂ ସମସ୍ତଙ୍କୁ ସାମିଲ କରୁଥିବା ନିୟମାବଳୀ ପ୍ରଣୟନ ପ୍ରତି ନିଜର ପ୍ରତିବଦ୍ଧତା ପୁଣିଥରେ ବ୍ୟକ୍ତ କରିଛି।
