ଖୋଲା ବଜାରରେ ଆଉ ମିଳୁନି ପନିର କି ଛେନା। ନା ରାସ୍ତା କଡ଼ରେ ନା ଦୋକାନ ଷ୍ଟଲରେ। ରାଜ୍ୟ ବ୍ୟାପୀ ଅପମିଶ୍ରିତ ପନିର୍ ବିକ୍ରିର ପ୍ରମାଣ ସହ ଧରପଗଡ଼ ପରେ ଏବେ ପନିର୍ ଶୂନ୍ୟ ହୋଇଗଲାଣି ଦୋକାନ୍ ବଜାର। ଏ ହେଉଛି କଟକ ବାଦାମବାଡ଼ି ଛକରେ ଥିବା ଏକ ପନିର ଏବଂ ଛେନା ଦୋକାନ। ଦେଖନ୍ତୁ ପୂରା ଖାଲି। ୨ ଦିନ ହେଲାଣି ନା ପନିର ଆସୁଛି ନା ଛେନା। କଟକ ସହରରେ ଏଭଳି ଏକାଧିକ ମିଠା ଓ ସୁଇଟ୍ ଷ୍ଟଲରେ ଛେନା ଓ ପନିର ଗାୟବ। ଯେଉଁ ବ୍ୟବସାୟୀ ଦିନକୁ ୧୫ରୁ ୨୦ କିଲୋ ପନିର ବିକୁଥିଲେ, ତାଙ୍କ ପାଖରେ ଏବେ ଅଛି ମାତ୍ର କେଜିଏ ଦୁଇ କେଜି। କେବଳ କଟକ ନୁହେଁ, ଶତପ୍ରତିଶତ ଅସଲି କହି ଖୋଲାମେଲାରେ ବିକ୍ରି ହେଉଥିବା ପନିର ନକଲି ଏବଂ ସ୍ବାସ୍ଥ୍ୟପ୍ରତି ହାନୀକାରକ ବୋଲି ପ୍ରମାଣିତ ହେବା ପରେ ରାଜ୍ୟର ଅନେକ ସହରରେ ଏବେ ଏଭଳି ସ୍ଥିତି। କିନ୍ତୁ ଦୁର୍ଭାଗ୍ୟ, ଏହି ମଉକାରେ ଦର ଉଚ୍ଚା କରି କିଛି ମୁନାଫାଖୋର୍ ବ୍ୟବସାୟୀ ପନିର୍ ଆଉ ଛେନା ବିକ୍ରି କରୁଥିବା ଅଭିଯୋଗ ହୋଇଛି।
ଅପରପକ୍ଷେ, ପନିର୍ ନାଁରେ ପଏଜନ୍ ବିକ୍ରି ନେଇ ଓଟିଭିର ଖବର ପ୍ରସାରଣ ପରେ ଖୋଲାମେଲାରେ ବିକ୍ରି ହେଉଥିବା ପନିରର ତ ପ୍ରାୟ ଆଉ ଦର୍ଶନ ନାହିଁ। ତାହାରି ଭିତରେ ସୁଇଟ୍ ଷ୍ଟଲ୍ ମାଲିକ ଏବଂ ବ୍ୟବସାୟୀ ବି ତରକି ଗଲେଣି। ତାଙ୍କ ପାଖକୁ ବିକ୍ରି ପାଇଁ ପହଞ୍ଚୁଥିବା ପନିର୍ କିମ୍ବା ଛେନା ଆସିଲା ମାତ୍ରେ ବଜାରରେ ମିଳୁଥିବା ଆଣ୍ଟି ରାପିଡ୍ କିଟ୍ ଦ୍ୱାରା ପରୀକ୍ଷା କରି ପନିରର ଶୁଦ୍ଧତା ଜାଣୁଛନ୍ତି ଏବଂ ବେପାରୀଙ୍କଠାରୁ ଛେନା ପନିର୍ ରଖୁଛନ୍ତି। କାରଣ ସିନ୍ଥେଟିକ୍ କିମ୍ବା ଅପମିଶ୍ରିତ ପନିର୍ ହୋଇଥିଲେ ଆଣ୍ଟି ରାପିଡ୍ କିଟ୍ ଦ୍ବାରା ପରୀକ୍ଷା କଲେ ହଳଦିଆ ବଦଳରେ କଳା ପଡ଼ିଯିବ। ଏଭଳି ସ୍ଥିତିରେ ଦୁଗ୍ଧ ବ୍ୟବସାୟୀ ସଂଘ କହିଛି, ସରକାର ଦୁଗ୍ଧ ଚାଷୀମାନଙ୍କ ପାଇଁ ସ୍ବତନ୍ତ୍ର ମଣ୍ଡି ବ୍ୟବସ୍ଥା କରନ୍ତୁ। ଫଳରେ ଏଭଳି ଅସାଧୁ କାରବାର ଉପରେ ରୋକ୍ ଲାଗିପାରିବ।
ପନିରର ଗୁଣବତ୍ତା ନେଇ ସନ୍ଦେହ ଉଠିବା ପରେ ଉପାନ୍ତରୁ ଉପକୂଳ, ପଶ୍ଚିମରୁ ଦକ୍ଷିଣ। ସବୁଠି ଜାରି ରହିଛି ବିଷ ପନିର ବିରୋଧରେ ଧରପଗଡ଼। ସବୁଠି ଛାପା ମାରୁଛନ୍ତି ଫୁଡ୍ ସେଫଟି ଟିମ୍। ଅପମିଶ୍ରିତ ପନିରକୁ ନେଇ ଯୋଗାଣ ମନ୍ତ୍ରୀ ବି କହିଛନ୍ତି, ସରକାର ଆକ୍ସନ ନେଉଛନ୍ତି। ନକଲି ସାମଗ୍ରୀ ପ୍ରସ୍ତୁତକାରୀ ଓ ବେପାରୀଙ୍କ ବିରୋଧରେ କଡ଼ା ନଜର ରଖାଯାଇଛି। ସେମାନଙ୍କୁ ଫାଇନ ଆଦାୟ ସହ ଦରକାର ପଡ଼ିଲେ ଗିରଫ କରାଯିବ।
ଆଗକୁ ରାକ୍ଷୀ, ତା’ପରେ ପରେ ଗଣେଶ ପୂଜା ସହ ଆରମ୍ଭ ହୋଇଯିବ ପାର୍ବଣ ୠତୁ। ଆଉ ପାର୍ବଣର ମଉଜ ଭିତରେ ଜମିବ ପିଠା ମିଠାର ଆସର। ଏଭଳି ସ୍ଥିତିରେ ମୁନାଫାଖୋର୍ ବ୍ୟବସାୟୀ, ହାଟ ବଜାରରେ ଛେନା ଆଉ ପନିରର କୃତ୍ରିମ ଅଭାବ ସୃଷ୍ଟି କରି ଗ୍ରାହକଙ୍କ ମୁଣ୍ଡରେ ଲଦି ଦେବେନି ତ ଦରବୃଦ୍ଧିର ଟେନସନ୍ ? ଏବେ ଏଭଳି ଆଶଙ୍କା ଉପୁଜିଛି।
