ନୂଆଦିଲ୍ଲୀ: ପୁଣି କଡ଼ ଲେଉଟାଇଲାଣି କରୋନା ମହାମାରୀ। ବିଶ୍ବରେ ଲକ୍ଷ ଲକ୍ଷ ଜୀବନ ନେଇ ଭୟାବହ ପରିସ୍ଥିତି ସୃଷ୍ଟି କରିଥିବା ଏହି ଭୂତାଣୁ ମାମଲା ହଂକଂ ଏବଂ ସିଙ୍ଗାପୁରରେ ବଢ଼ିବାରେ ଲାଗିଛି। ଏହି ଦୁଇ ସ୍ଥାନରେ ନୂତନ କରୋନା ରୋଗୀ ମିଳିଛନ୍ତି ଏବଂ କରୋନା ରୋଗୀଙ୍କ ସଂଖ୍ୟା ହଠାତ୍ ବୃଦ୍ଧି ପାଇବାର ସୂଚନା ମିଳିଛି। ଯଦିଓ ଏହା ପୂର୍ବ ସଂକ୍ରମଣ ଭଳି ଉଗ୍ର ରୂପ ନେଇନି ତଥାପି ଭୟ ବଢିଲାଣି । ସେହିଭଳି ସିଙ୍ଗାପୁରରେ ମଧ୍ୟ ସଂକ୍ରମଣ ବୃଦ୍ଧି ପାଇଲାଣି । ମେ ୩ ସୁଦ୍ଧା କୋଭିଡ୍ ମାମଲା ୧୪,୨୦୦ରେ ପହଞ୍ଚିଛି । କୋଭିଡ୍ ସଂକ୍ରମଣ ପାଇଁ ହସ୍ପିଟାଲରେ ମାମଲା ୩୦% ବୃଦ୍ଧି ପାଇଛି ।
ଏହା ପୂର୍ବରୁ ସିଙ୍ଗାପୁରରୁ ବି ଏଭଳି ରିପୋର୍ଟ ସାମ୍ନାକୁ ଆସିଥିଲା। ଏଠାରେ କିଛି ଦିନ ମଧ୍ୟରେ କରୋନା ମାମଲା ୨୮ ପ୍ରତିଶତ ବୃଦ୍ଧି ପାଇଛି। ଏପ୍ରିଲ ଶେଷ ସପ୍ତାହ ସୁଦ୍ଧା ଏହି ଦେଶରୁ ୧୧, ୧୧୦ ରୋଗୀ ଚିହ୍ନଟ ହୋଇଥିଲେ। ଏହା ମେ’ ପ୍ରଥମ ସପ୍ତାହବେଳକୁ ୧୪, ୨୦୦ରେ ପହଞ୍ଚି ଯାଇଛି। ସେହିପରି ଡାକ୍ତରଖାନାରେ ଭର୍ତ୍ତି ହେଉଥିବା ରୋଗୀଙ୍କ ସଂଖ୍ୟା ୩୦ ପ୍ରତିଶତ ପର୍ଯ୍ୟନ୍ତ ବୃଦ୍ଧି ପାଇଛି। ଏହି ମହାମାରୀ ପୁଣିଥରେ ଭୟଙ୍କର ରୂପ ଧାରଣ କରିପାରେ ବୋଲି ସ୍ବାସ୍ଥ୍ୟ ଅଧିକାରୀମାନେ ଚେତାବନୀ ଦେଇଛନ୍ତି। ଏହା ଏସିଆର ଅନ୍ୟ ଭାଗକୁ ମଧ୍ୟ ବ୍ୟାପିପାରେ ବୋଲି କୁହାଯାଉଛି। ଅନ୍ୟପକ୍ଷରେ ଚୀନ୍ ଏବଂ ଥାଇଲାଣ୍ଡ ସରକାର ମଧ୍ୟ କରୋନାକୁ ନେଇ ସତର୍କ ରହିଛନ୍ତି। ଚୀନ୍ରେ କରୋନା ମାମଲା ଦ୍ବିଗୁଣିତ ହୋଇଯାଇଛି। ସ୍ଥିତିକୁ ଦେଖି ଲୋକଙ୍କୁ ବୁଷ୍ଟର ଡୋଜ୍ ଲଗାଇବାକୁ ପରାମର୍ଶ ଦିଆଯାଇଛି। ପୁଣିଥରେ କରୋନା ଲହର ଆସିପାରେ ବୋଲି ‘ଚାଇନିଜ ସେଣ୍ଟର ଫର ଡିଜିଜ ଆଣ୍ଡ ପ୍ରିଭେନସନ’ ପକ୍ଷରୁ କୁହାଯାଇଛି। ସେହିପରି ଥାଇଲାଣ୍ଡରେ ଦୁଇଟି ଅଲଗା ଅଞ୍ଚଳରେ କରୋନା ମାମଲା ବୃଦ୍ଧି ପାଇଛି।
ରାଜ୍ୟ ଜନସ୍ୱାସ୍ଥ୍ୟ ନିର୍ଦ୍ଦେଶକ କହିଛନ୍ତି ଯେ, ଏସିଆ ମହାଦେଶକୁ ଫେରିଲା କୋଭିଡ। ଥାଇଲାଣ୍ଡ, ହଂକଂ ଓ ସିଙ୍ଗାପୁରରେ କେଶ ବଢୁଛି। ବର୍ଷର ସର୍ବାଧିକ ସଂକ୍ରମଣ ମାମଲା ହଂକଂରୁ ରିପୋର୍ଟ ହୋଇଛି। ଓଡ଼ିଶା ସରକାରଙ୍କ ସ୍ୱାସ୍ଥ୍ୟ ବିଭାଗ ବିଶ୍ୱ ସ୍ୱାସ୍ଥ୍ୟ ସଂଗଠନ ସହ ଆଲୋଚନା କରିଛି। ସେମାନେ କୌଣସି କେଶ ରିପୋର୍ଟ କରି ନାହାନ୍ତି। ତେବେ କେନ୍ଦ୍ର ସରକାରଙ୍କ ସହ ବି ଯୋଗାଯୋଗରେ ଅଛନ୍ତି ରାଜ୍ୟ ସରକାର। ଆଲର୍ଟ ରହିବାକୁ କୁହାଯାଇଛି। କାରଣ ସିଙ୍ଗାପୁର, ଥାଇଲାଣ୍ଡ ଓ ହଂକଂରେ କେଶ ବଢିବା ସହ ମୃତ୍ୟୁ ଖବର ବି ଆସିଛି। ଏହା ନୂଆ ଭାରିଆଣ୍ଟ ନ ହୋଇଥିଲେ ବି ଶରୀରରୁ ପ୍ରତିଷେଧକ ବା ଆଣ୍ଟିବଡି କମିବାରୁ ଏହି ସଂକ୍ରମଣ ହୋଇଥିବା କୁହାଯାଉଛି। ଓଡ଼ିଶାର ସବୁ ଜିଲ୍ଲା ମୁଖ୍ୟାଳୟ ହସ୍ପିଟାଲ ଓ ମେଡିକାଲ କଲେଜରେ ଟେଷ୍ଟିଙ୍ଗ ଚାଲିଛି। ବହୁ ଦିନରୁ ପଜିଟିଭ କେଶ କିଛି ଆସିନାହିଁ ବୋଲି ରାଜ୍ୟ ଜନସ୍ୱାସ୍ଥ୍ୟ ନିର୍ଦ୍ଦେଶକ ଡାକ୍ତର ନୀଳକଣ୍ଠ ମିଶ୍ର କହିଛନ୍ତି।
ବିଶେଷ କରି ଯେଉଁମାନଙ୍କର ରୋଗ ପ୍ରତିରୋଧକ କ୍ଷମତା କମ୍ ଓ ଅଧିକ ପୀଡ଼ିତ ହେବାର ସମ୍ଭାବନା ରହିଛି ସେମାନଙ୍କୁ ବୁଷ୍ଟର୍ ଟିକା ନେବାକୁ ସ୍ୱାସ୍ଥ୍ୟ କର୍ତ୍ତୃପକ୍ଷ ପରାମର୍ଶ ଦେଇଛନ୍ତି । ହଂକଂ ପପ୍ ଷ୍ଟାର ଏସନ ଚାନ୍ କୋଭିଡ୍ ପଜିଟିଭ୍ ଥିବା ଜଣାପଡ଼ିବା ପରେ ତାଙ୍କ ତାଇଵାନ୍ କନ୍ସର୍ଟକୁ ସ୍ଥଗିତ ରଖାଯାଇଛି । ବ୍ଲୁମ୍ବର୍ଗ ରିପୋର୍ଟ କରିଛି ଯେ, ଚୀନ୍ ମଧ୍ୟ କୋଭିଡ୍ର ଏକ ନୂତନ ଲହର ଦେଇ ଗତି କରୁଛି । ଗତ ପାଞ୍ଚ ସପ୍ତାହ ମଧ୍ୟରେ ଚୀନ୍ବାସୀଙ୍କ ମଧ୍ୟରେ କୋଭିଡ୍ ସଂକ୍ରମଣ ହାର ଦୁଇଗୁଣରୁ ଅଧିକ ହୋଇଛି ।
