ନୂଆଦିଲ୍ଲୀ: ନିଟ୍-ୟୁଜି ପ୍ରଶ୍ନପତ୍ର ଲିକ୍ ନେଇ ବିରୋଧୀ ଦଳ ନେତା ରାହୁଲ ଗାନ୍ଧୀ ଶନିବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସରକାରର ତୀବ୍ର ସମାଲୋଚନା କରିଛନ୍ତି। ରାହୁଲ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ତୁରନ୍ତ ଇସ୍ତଫା ଦାବି କରିଛନ୍ତି। ସାମାଜିକ ଗଣମାଧ୍ୟମ ‘ଏକ୍ସ’ରେ ଏକ ପୋଷ୍ଟ କରି ରାହୁଲ ଲେଖିଛନ୍ତି, ନିଟ୍ ପରୀକ୍ଷା ଦେଇଥିବା ୨୨ ଲକ୍ଷ ଛାତ୍ରଛାତ୍ରୀଙ୍କ ସହିତ ବିଶ୍ବାସଘାତକତା ହୋଇଛି। ପ୍ରଧାନମନ୍ତ୍ରୀ ମୋଦୀ ଏହି ପ୍ରସଙ୍ଗରେ ନିରବ ଥିବା କହି ସମାଲୋଚନା କରିଛନ୍ତି।
ରାହୁଲ କହିଛନ୍ତି ପ୍ରଧାନମନ୍ତ୍ରୀ ତୁରନ୍ତ ଧର୍ମେନ୍ଦ୍ର ପ୍ରଧାନଙ୍କୁ ହଟାନ୍ତୁ ନଚେତ୍ ନିଜେ ଏଥିପାଇଁ ଦାୟୀ ରୁହନ୍ତୁ। ରାହୁଲ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ହଟେଇବାକୁ ଦାବି କରିଛନ୍ତି। ସୂଚନାଯୋଗ୍ୟ, ଡାକ୍ତରୀ ଶିକ୍ଷାରେ ନାମଲେଖା ପାଇଁ ମେ ୩ ତାରିଖରେ ନିଟ୍ -ୟୁଜି ପ୍ରବେଶିକା ପରୀକ୍ଷା ଅନୁଷ୍ଠିତ ହୋଇଥିଲା। ତେବେ ପ୍ରଶ୍ନପତ୍ର ଲିକ୍ ହୋଇଥିବା ଜଣାପଡ଼ିବା ପରେ ନିଟ୍ ପରୀକ୍ଷା ବାତିଲ କରାଯିବା ସହିତ ଜୁନ୍ ୨୧ରେ ପୁନଃ ପରୀକ୍ଷା ପାଇଁ ସରକାର ଘୋଷଣା କରିଛନ୍ତି।
ପ୍ରଶ୍ନପତ୍ର ଲିକ୍ ଉପରେ ରାହୁଲ ଗାନ୍ଧୀ କହିଛନ୍ତି ଯେ, ୨୨ ଲକ୍ଷ ଛାତ୍ରଛାତ୍ରୀ ପରୀକ୍ଷା ପାଇଁ ଦୁଇ ବର୍ଷ ହେଲା ରାତି ଦିନ ପରିଶ୍ରମ କରୁଥିଲେ। କିନ୍ତୁ ସେମାନଙ୍କ ପରିଶ୍ରମ ବୃଥା ଗଲା। ସାରା ଦେଶ ଜାଣିଥିଲା ଯେ, ନିଟ୍ ପରୀକ୍ଷାର ଦୁଇ ଦିନ ପୂର୍ବରୁ ପ୍ରଶ୍ନପତ୍ର ହ୍ବାଟ୍ସଆପ୍ରେ ବୁଲୁଥିଲା। କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏହି ବିବାଦ ପାଇଁ ଦାୟୀ ହେବାକୁ ରାଜି ନାହାନ୍ତି।
ରାହୁଲ ଆହୁରି ମଧ୍ୟ କହିଛନ୍ତି ଯେ, ଆର୍ଏସ୍ଏସ୍, ବିଜେପି ଓ ବିଶ୍ବବିଦ୍ୟାଳୟ ଅଧିକାରୀଙ୍କ ସମ୍ପର୍କ ଏ ଦେଶର ଶିକ୍ଷା ବ୍ୟବସ୍ଥାକୁ ନଷ୍ଟ କରିଦେଲାଣି। ବିଶ୍ବବିଦ୍ୟାଳୟରେ ନିଯୁକ୍ତି ମଧ୍ୟ ମେଧା ବଦଳରେ ବୈଚାରିକ ସମ୍ପର୍କ ଆଧାରରେ କରାଯାଉଛି। ଦେଶରେ ୮୦ ଥର ପ୍ରଶ୍ନପତ୍ର ଲିକ୍ ହେଲାଣି, ଦେଶର ଦୁଇ କୋଟି ଯୁବପିଢ଼ିଙ୍କ ଭବିଷ୍ୟତ ନଷ୍ଟ ହୋଇଗଲାଣି ବୋଲି ରାହୁଲ କହିଛନ୍ତି। ରାହୁଲ ଗାନ୍ଧୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବି ସହିତ ପ୍ରଶ୍ନପତ୍ର ଲିକ୍ରେ ସମ୍ପୃକ୍ତ ବ୍ୟକ୍ତି ବିଶେଷଙ୍କ ଉପରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି।
