ଜୟଦେବବିହାରରୁ ନନ୍ଦନକାନନ ରାସ୍ତାରେ ଭିଡ଼ କମାଇବା ପାଇଁ ରାଜ୍ୟ ସରକାରଙ୍କ ବଡ଼ ପଦକ୍ଷେପ । ଏଥିପାଇଁ ଗତକାଲି ରାଜ୍ୟ କ୍ୟାବିନେଟ୍ରେ ୫୭୯ କୋଟି ଟଙ୍କା ଅନୁମୋଦନ କରିଛନ୍ତି ମୁଖ୍ୟମନ୍ତ୍ରୀ । ଆଠ ଲେନ୍ ବିଶିଷ୍ଟ ଏହି ରାସ୍ତା ୨ ବର୍ଷରେ ଶେଷ ହେବା। ସୁଧୁରିବ ଟ୍ରାଫିକ ସମସ୍ୟା । ସହଜ ହେବ ଗମନା ଗମନ ।
ପୂର୍ତ୍ତ ବିଭାଗ ଯୋଜନା ଅନୁଯାୟୀ, କଳିଙ୍ଗ ଷ୍ଟାଡିୟମ୍ ଗେଟ୍ ନଂ-୪ରୁ ରଘୁନାଥପୁର ସେତୁ ପର୍ଯ୍ୟନ୍ତ ପ୍ରାୟ ୯ କିମି ୫୦୦ ମିଟରର ରାସ୍ତାର ରୂପରେଖ ବଦଳିବ । ବର୍ତ୍ତମାନ ରାସ୍ତା ୬ ଲେନ୍ ରହିଥିବା ବେଳେ ଏହାକୁ ୮ ଲେନ୍ କରାଯିବ । ଏହାସହ ସର୍ଭିସ୍ ରୋଡ୍ ରହିବ । ଏଥିରେ ଜୟଦେବ ବିହାର ଛକ ଏନ୍ଏଚ୍-୧୬ ଫ୍ଲାଏଓଭର ଉପରେ ୪ଲେନ୍ କେବଲ୍ ଷ୍ଟେଡ୍ ସେତୁ ନିର୍ମାଣ କରାଯିବ । କଳିଙ୍ଗ ହସ୍ପିଟାଲ୍ ଛକ, ଡମଣା ଛକ, କିଟ୍ ଛକ ସମେତ କଳାରାହାଙ୍ଗ ଛକରେ ସ୍ୱତନ୍ତ୍ର ୪-ଲେନ୍ ବିଶିଷ୍ଟ ଫ୍ଲାଏଓଭର, ମାଇନର ବ୍ରିଜ୍, କ୍ରସ୍ ଡ୍ରେନେଜ୍ ସଂରଚନା, ଫ୍ଲାଏଓଭର ସହ ୮ଲେନ୍ ବିଶିଷ୍ଟ ରାସ୍ତା ରହିବ । ଅର୍ଥାତ୍ ଫ୍ଲାଏଓଭରରେ ୪ଲେନ୍ ତଳେ ୪ଲେନ୍ ରାସ୍ତା ହେବ ।
ରାସ୍ତା ସହ ଡ୍ରେନେଜ୍ ସୁବିଧା, ୫.୫ ମିଟରର ସଭିସ୍ ରୋଡ୍, ୭.୫ ମିଟରର ସ୍ଲିପ୍ ରୋଡ୍, ଛକଗୁଡ଼ିକର ଉନ୍ନତୀକରଣ, ରାସ୍ତା ସୌନ୍ଦର୍ଯ୍ୟୀକରଣ, ରୋଡ୍ ମାର୍କିଂ, ସଡ଼କ ସୁରକ୍ଷା, ପାର୍କିଂ ବେ, ବ୍ରିଜ୍ ଆଲୋକୀକରଣ ସହ ରାସ୍ତାରେ ପର୍ଯ୍ୟାପ୍ତ ବୃକ୍ଷରୋପଣ କରିବାକୁ ଲକ୍ଷ୍ୟ ରଖାଯାଇଛି । ଏହାକୁ ନେଇ ଟାଉନ ପ୍ଲାନର୍ କହିଛନ୍ତି ଏହା ସାମୟିକ ଆଶ୍ୱସ୍ତି ଦେଇପାରେ । କିନ୍ତୁ ଭବିଷ୍ୟତ ପାଇଁ ବସ୍ ସେବାକୁ ସୁଦୃଢ଼ କରିବା ସହ ମେଟ୍ରୋ ଭଳି ପ୍ରକଳ୍ପ କରାଯିବାର ଆବଶ୍ୟକତା ରହିଛି ।
ଅପରପକ୍ଷେ ଏହି ରାସ୍ତାରେ ପୂର୍ବରୁ ମେଟ୍ରୋ ଟ୍ରେନ ପାଇଁ ଏଲିଭେଟେଡ୍ କରିଡର୍ ଡିଜାଇନ୍ ହୋଇଥିଲା । ସେହି ସ୍ଥାନରେ ଫ୍ଲାଏଓଭର ନିର୍ମାଣ ହେବାକୁ ଥିବାରୁ ମେଟ୍ରୋ ବାଟ ପୂରା ବନ୍ଦ ହୋଇଯିବା। ଅନ୍ୟପଟେ ରାସ୍ତା ନିର୍ମାଣ ହେଲେ ୧୦ ହଜାରରୁ ଅଧିକ ଉଠା ଦୋକାନ ଉଚ୍ଛେଦ ହେବ । ତେଣୁ ବିସ୍ଥାପିତ ହେବାକୁ ଥିବା ଦୋକାନୀଙ୍କୁ ପ୍ରଥମେ ଥଇଥାନ କରିବାକୁ ନିବେଦନ କରିଛି ଉଠାଦୋକାନୀ ସଂଘ । ସରକାରଙ୍କ ଏହି ବୃହତ୍ ପ୍ରକଳ୍ପର କେବେ ସଫଳ ରୂପାୟନ ହେବ ଏବଂ ଏହାର ସୁଫଳ କେତେ ମିଳିବ ତାହା ସମୟ କହିବ ।
