ପୁରୀ ୩।୭: ଜୁଲାଇ ୧୬ରେ ଅର୍ଥାତ୍ ଆଉ ମାତ୍ର ୧୨ ଦିନ ପରେ ମହାପ୍ରଭୁଙ୍କର ବିଶ୍ବ ପ୍ରସିଦ୍ଧ ରଥଯାତ୍ରା। ଚଳିତବର୍ଷ ରଥଯାତ୍ରାକୁ କିଭଳି ଶାନ୍ତି ଶୃଙ୍ଖଳାର ସହ ସମାପନ କରାଯିବ ସେନେଇ ଶ୍ରୀମନ୍ଦିର ପ୍ରଶାସନ ପକ୍ଷରୁ ସମସ୍ତ ପ୍ରସ୍ତୁତି ଚୂଡାନ୍ତ ପର୍ଯ୍ୟାୟରେ ପହଞ୍ଚିଛି। ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢୀ ପ୍ରତିକ୍ରିୟା ଦେଇ କହିଛନ୍ତି ରଥଯାତ୍ରାରେ ଏକ ବଡ କାର୍ଯ୍ୟ ହେଉଛି ରଥ ନିର୍ମାଣ। ଚଳିତ ବର୍ଷ ଯୋଡ଼ା ଜ୍ୟେଷ୍ଠ ଯୋଗୁଁ ରଥ ନିର୍ମାଣ ବେଶ୍ ଆଗୁଆ ରହିଛି। ରଥ ନିର୍ମାଣରେ ନିୟୋଜିତ ମହାରଣା, ରୂପକାର, ଚିତ୍ରକାର, ଭୋଇ, କମାର, ଦରଜୀ ସେବକ ମାନେ ନିଷ୍ଠା, ଭକ୍ତି ଓ ସମର୍ପଣ ମନୋଭାବ ନେଇ କାର୍ଯ୍ୟ କରୁଛନ୍ତି।ମହାପ୍ରଭୁଙ୍କ ଆଶୀର୍ବାଦରୁ ରଥ ନିର୍ମାଣ ଠିକ୍ ସମୟରେ ଶେଷ ହୋଇଯିବ। ବିଶ୍ଵପ୍ରସିଦ୍ଧ ରଥଯାତ୍ରା ପାଇଁ ଆସନ୍ତା ୬ ତାରିଖ ସକାଳ ୧୦.୧୫ ମିନିଟରେ ପୁରୀ ଟାଉନ ହଲରେ ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ଶେଷ ସମୀକ୍ଷା ବୈଠକ ଅନୁଷ୍ଠିତ ହେବ। ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ନିର୍ଦ୍ଦେଶ ଅନୁଯାୟୀ ପରବର୍ତ୍ତୀ କାର୍ଯ୍ୟ କରାଯିବ। ଠାକୁରଙ୍କ ନୀତିକାନ୍ତିରେ ସମନ୍ଵୟ ରକ୍ଷା ପାଇଁ ବିଭିନ୍ନ ନିଯୋଗ ସହ ବିଭିନ୍ନ ସ୍ତରରେ ବୈଠକ କରାଯାଇଛି। ରଥ ଉପରେ ଅନଧିକୃତ ଓ ଛଦ୍ମବେଶୀଙ୍କ ବିରୁଦ୍ଧରେ ଦୃଢ଼ କାର୍ଯ୍ୟନୁଷ୍ଠାନ ନିଆଯିବ ବୋଲି କହିଛନ୍ତି ମୁଖ୍ୟ ପ୍ରଶାସକ। ଏ ନେଇ ପୂର୍ବରୁ ଛତିଶା ନିଯୋଗ ଓ ଶ୍ରୀମନ୍ଦିର ପରିଚାଳନା କମିଟି ବୈଠକରେ ବିସ୍ତୃତ ଭାବେ ଆଲୋଚନା କରାଯାଇଛି। ରଥ ଉପରେ କେହି ମୋବାଇଲ ଫୋନ୍ ବ୍ୟବହାର କରିପାରିବେ ନାହିଁ ବୋଲି କହିଛନ୍ତି ମୁଖ୍ୟ ପ୍ରଶାସକ।
ରଥଯାତ୍ରା ଆଉ ଖୁବ୍ କମ୍ ଦିନ ଥିବାରୁ ମହାପ୍ରଭୁଙ୍କ ଜନ୍ମବେଦୀ ଗୁଣ୍ଡିଚା ମନ୍ଦିରର ଉନ୍ନତିକରଣ କାର୍ଯ୍ୟ ଚାଲିଛି। ମହାପ୍ରଭୁଙ୍କ ଜନ୍ମସ୍ଥାନ ହେଉଛି ଗୁଣ୍ଡିଚା ମନ୍ଦିର। ଘୋଷ ଯାତ୍ରାରେ ମହପ୍ରଭୁ ନବଦିନାତ୍ମକ ଯାତ୍ରାରେ ଗୁଣ୍ଡିଚା ମନ୍ଦିର ଯିବେ। ଗତ ବର୍ଷ ଠାରୁ ଗୁଣ୍ଡିଚା ମନ୍ଦିର ଉନ୍ନତିକରଣ ଓ ସୌନ୍ଦର୍ଯ୍ୟକରଣ କାର୍ଯ୍ୟ ଆରମ୍ଭ ହୋଇଥିଲା। ଗୁଣ୍ଡିଚା ମନ୍ଦିର ବାହ୍ୟ ପାଚେରୀ ଖଣ୍ଡେଲାଇଟ୍ ପଥର ଦ୍ବାରା ଆଛାଦିତ କରାଯାଇଛି।ଉତ୍ତର ପାର୍ଶ୍ୱ ଗୁମୁଟ, ବିଜେ ପଥ, ଭିତର ଚକଡ଼ା, ଜଗମୋହନ ଓ ନାଟମଣ୍ଡପ ଉନ୍ନତିକରଣ, ନବୀକରଣ କାର୍ଯ୍ୟ କରାଯାଇଛି। ଅବଢ଼ା ଯୋଜନାରେ ତୁଣିଆ ମହଲ, ବଲ୍ଲଭ ଘର, ରୋଷ ଘର ନୂତନ ରୂପ ନେଇଛି।ଏଥିସହ ବଗିଚା ଓ ଶରଧାବାଲିର ଉନ୍ନତିକରଣ କରାଯାଇଛି। ଏଏସଆଇ ପକ୍ଷରୁ ରଥଯାତ୍ରା ୯ ଦିନ ଭିତରେ ହିଁ ଶ୍ରୀମନ୍ଦିର ଗର୍ଭଗୃହ ମରାମତି ଓ ସଂରକ୍ଷଣ କାର୍ଯ୍ୟ କରାଯିବ। ଏହି ୯ ଦିନ ହିଁ ପ୍ରକୃଷ୍ଟ ସମୟ। ଏନେଇ ପୂର୍ବରୁ ଏଏସଆଇ କୁ ଚିଠି ଲେଖାଯିବ ସହ ଶ୍ରୀମନ୍ଦିର ମୁଖ୍ୟ ପ୍ରଶାସକ ନିଜେ ଏଏସଆଇ ଡିଜିଙ୍କୁ ଭେଟିଥିଲେ।ଏଏସଆଇ ସହ ଶ୍ରୀମନ୍ଦିର ବୈଷୟିକ ପରାମର୍ଶ କମିଟି, ସେଣ୍ଟ୍ରାଲ ବିଲ୍ଡିଙ୍ଗ ରିସର୍ଚ୍ଚ ଇନଷ୍ଟିଚ୍ୟୁଟ, ମାଡ୍ରାସ ଆଇଆଇଟି ପକ୍ଷରୁ ଶ୍ରୀମନ୍ଦିର ଗର୍ଭଗୃହ, ନାଟମଣ୍ଡପ ସହ ଭୋଗ ମଣ୍ଡପର ମରାମତି ଓ ସଂରକ୍ଷଣ କାର୍ଯ୍ୟ କରାଯିବ। ତେବେ ରଥଯାତ୍ରା ପରେ ଶ୍ରୀମନ୍ଦିର ନାଟମଣ୍ଡପରେ ରାମ୍ପ ବ୍ୟବସ୍ଥା କରାଯିବ। ଏଥିପାଇଁ ଭୁବନେଶ୍ୱର ଆଇଆଇଟି ବୈଷୟିକ ଅନୁଧ୍ୟାନ କରୁଛି। ରଥଯାତ୍ରା ପାଇଁ ଭିତର ରତ୍ନଭଣ୍ଡାର ଅଳଙ୍କାରର ଗଣତି କାର୍ଯ୍ୟ ସ୍ଥଗିତ ରଖାଯାଇଛି। ତେବେ ଚଳନ୍ତି ବା ବାହାର ରତ୍ନଭଣ୍ଡାର ଗଣତି ମଣତି ସମୟରେ ଶ୍ରୀଅଙ୍ଗରେ ଲାଗିଥିବା ବିଭିନ୍ନ ଅଳଙ୍କାର ଗଣତି ମଣତି ହୋଇପାରିନାହିଁ। ସ୍ନାନପୂର୍ଣ୍ଣମୀ ପୂର୍ବ ଦିନ ଶ୍ରୀଅଙ୍ଗରୁ ରୂପା ରସିକ ଶୁଆ ଥଣ୍ଟିଆ ଖୋଲାଯାଇଛି। ଆସନ୍ତା ୧୯ ତାରିଖ ଦିନ ଏହାର ଗଣତି କରାଯିବ।ନୀଳାଦ୍ରି ବିଜେ ପରେ ଓ ଚିତାଲାଗି ଅମାବାସ୍ୟା ପୂର୍ବରୁ ମହାପ୍ରଭୁଙ୍କ ରାହୁ ରେଖା ଓ ସୁବର୍ଣ୍ଣ ଖଚିତ ଚିତାର ଗଣତି କାର୍ଯ୍ୟ କରାଯିବ ବୋଲି ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢୀ ସୂଚନା ଦେଇଛନ୍ତି।
ରଥଯାତ୍ରା ପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ସମସ୍ତ ପ୍ରସ୍ତୁତି ଚୂଡାନ୍ତ ପର୍ଯ୍ୟାୟରେ ପହଞ୍ଚିଛି। ମହାପ୍ରଭୁଙ୍କ ନୀତିକାନ୍ତି, ଭକ୍ତଙ୍କ ଶୃଙ୍ଖଳିତ ଦର୍ଶନ, ସେବାୟତ ନିଯୋଗ ସହିତ ଉତ୍ତମ ସମନ୍ବୟ ରକ୍ଷା ନେଇ ବିଶେଷ ଗୁରୁତ୍ୱ ଦେଇଛି ଶ୍ରୀମନ୍ଦିର ପ୍ରଶାସନ। ତେବେ ମହାପ୍ରଭୁଙ୍କ କୃପାରୁ ଚଳିତ ବର୍ଷ ଘୋଷଯାତ୍ରା ଶାନ୍ତି ଶୃଙ୍ଖଳାର ସହ ସମାପନ ହେବ ବୋଲି ଆଶା ରଖିଛନ୍ତି ମୁଖ୍ୟ ପ୍ରଶାସକ।
