ନୂଆଦିଲ୍ଲୀ: ଭାରତୀୟ ସେନାରେ ଆଜିଠୁ ଆରମ୍ଭ ହୋଇଛି ନୂଆ ଅଧ୍ୟାୟ। ଭାରତୀୟ ସେନାର ନୂଆ ମୁଖ୍ୟ (Chief of Army Staff) ଭାବେ ଦାୟିତ୍ୱ ଗ୍ରହଣ କରିଛନ୍ତି ଜେନେରାଲ୍ ଧୀରଜ ସେଠ୍। ଏହା ପୂର୍ବରୁ ସେ ସେନାର ଉପ-ମୁଖ୍ୟ ଭାବେ କାର୍ଯ୍ୟ କରୁଥିଲେ। ଆଜି ଅର୍ଥାତ୍ ଜୁନ୍ ୩୦ରେ ସେ ଏହି ସର୍ବୋଚ୍ଚ ସାମରିକ ପଦବୀର କାର୍ଯ୍ୟଭାର ସମ୍ଭାଳିଛନ୍ତି। ଅନ୍ୟପଟେ ସେନା ମୁଖ୍ୟ ଜେନେରାଲ୍ ଉପେନ୍ଦ୍ର ଦ୍ୱିବେଦୀ ସେବାରୁ ଅବସର ନେଇଛନ୍ତି। ଅବସର ଅବସରରେ ନୂଆଦିଲ୍ଲୀସ୍ଥିତ ସାଉଥ୍ ବ୍ଲକ୍ ଲନ୍ରେ ତାଙ୍କୁ ସେନା ପକ୍ଷରୁ ଗାର୍ଡ ଅଫ୍ ଅନର୍ ପ୍ରଦାନ କରାଯାଇଛି।
ଜେନେରାଲ୍ ଧୀରଜ ସେଠ୍ ନ୍ୟାସନାଲ୍ ଡିଫେନ୍ସ ଏକାଡେମୀ (NDA) ଖଡ଼ଗୱାସଲାର ଜଣେ ପୂର୍ବତନ ଛାତ୍ର। ସେ ଡିସେମ୍ବର ୧୯୮୬ରେ ଭାରତୀୟ ସେନାର ଆର୍ମଡ୍ କୋରରେ କମିଶନ ପାଇଥିଲେ। ପ୍ରାୟ ଚାରି ଦଶନ୍ଧିର ଏହି ଗୌରବମୟ ସାମରିକ କ୍ୟାରିୟର ମଧ୍ୟରେ ସେ ଅପରେସନାଲ, ରଣନୀତିକ, ସାମର୍ଥ୍ୟ ବିକାଶ ଏବଂ ସାଂସ୍ଥାନିକ କ୍ଷେତ୍ରରେ ବ୍ୟାପକ ଅଭିଜ୍ଞତା ହାସଲ କରିଛନ୍ତି। ଭାରତୀୟ ସେନାର ଯୁଦ୍ଧ କ୍ଷମତା ଏବଂ ଦୀର୍ଘକାଳୀନ ପରିବର୍ତ୍ତନରେ ତାଙ୍କର ଗୁରୁତ୍ୱପୂର୍ଣ୍ଣ ଅବଦାନ ରହିଛି।
ରଣନୀତି ପ୍ରସ୍ତୁତ କରିବାରେ ମାହିର ଜେନେରାଲ ସେଠ୍ ଅନେକ ଗୁରୁତ୍ୱପୂର୍ଣ୍ଣ ସାମରିକ ଅଭିଯାନର ନେତୃତ୍ୱ ନେଇଛନ୍ତି। ସେ ମରୁଭୂମି ଅଞ୍ଚଳରେ ଏକ ଆର୍ମଡ୍ ରେଜିମେଣ୍ଟ, ପଶ୍ଚିମ ସୀମାନ୍ତରେ ଏକ ଆର୍ମଡ୍ ବ୍ରିଗେଡ୍ ଏବଂ ଜମ୍ମୁ-କାଶ୍ମୀରରେ ଆତଙ୍କବାଦୀ ନିରୋଧୀ ବଳର କମାଣ୍ଡ ସମ୍ଭାଳିଛନ୍ତି। ଏହା ବ୍ୟତୀତ ସେ ଭାରତୀୟ ସେନାର ପ୍ରମୁଖ ଷ୍ଟ୍ରାଇକ୍ ଫର୍ମେସନ ‘ସୁଦର୍ଶନ ଚକ୍ର କୋର୍’ର କମାଣ୍ଡ ମଧ୍ୟ ସମ୍ଭାଳି ସାରିଛନ୍ତି। ଦିଲ୍ଲୀ ଅଞ୍ଚଳର ଜେନେରାଲ ଅଫିସର କମାଣ୍ଡିଂ (GoC) ଭାବେ ସେ କାର୍ଯ୍ୟ କରିବା ସହ ସେନାର ଦକ୍ଷିଣ ପଶ୍ଚିମ ଓ ଦକ୍ଷିଣ କମାଣ୍ଡର ଦାୟିତ୍ୱ ମଧ୍ୟ ତୁଲାଇଛନ୍ତି।
ଯୁଦ୍ଧକ୍ଷେତ୍ରରେ ନୂଆ ଟେକ୍ନୋଲୋଜି ଓ ଭବିଷ୍ୟତର ଯୁଦ୍ଧ ପରିସ୍ଥିତିକୁ ନଜରରେ ରଖି ସେନାର ଆବଶ୍ୟକତାକୁ ସୁସଂହତ କରିବାରେ ତାଙ୍କର ବଡ଼ ଯୋଗଦାନ ରହିଛି।
